NGGGERMETI JABU SI ERTOTO RAS PERKUAH (JABU ASLI PURBA, SE, ANGGOTA SINODE No. 188)

           Gelarna Asli Karo-karo Purba bere-bere Tarigan, umurna 48 tahun. Ia anak peteluken bas 4 ersembuyak. Nande itengah jabu gelarna Ira Wati br. Perangin-angin Pencawan umurna 44 tahun. Dua anak ipelimiken Dibata ku tengah jabuna: Eloi Rena br. Puba, genduari enggo kelas 2 SMA ras Feby Ola br. Purba, kelas 2 SMP.

            Uga kin tempas jabu enda, enggo alu merembo-rembo banci isehken kami rikutken penatap P. Moses Elias Situmorang OFMCap bagi si iturikenna tupung nuri-nuri bas ulang tahun perjabun kalak enda si ilakoken bas tanggal 10 Juni 2015,  raduken lakon Mengket Rumah Mbaru si inganina genduari i Jln. LetJend. Jamin Ginting, Raya, Berastagi.

             “Bapa Rena enda selaku dilaki, adi kuakap datna ponten 8. Subuk bas rupa, pengeranana bage pe bas pengkebetna. Adi kerna rupa ras perbestangna terlebih pe bukna, genduari pe, adi nggit ia tentu lako denga jadi model minyak rambut. Bage ka pe nande beru Perangin-angin enda, tek aku la padah er-make-up, mbaru medak pe mejile! Janah seakatan meparas, ia pe sekalak nande si metunggung rikutken penggejapen kalak Karo, sikap ngepkep anak-anakna!”, nina pastor Moses  sanga e.

            Bage pe anak-anakna, Rena br. Purba ras pe agina Feby Ola br. Purba, seakatan i sekolahna juara terus, ikut olympiade utusen sekolahna bage pe ikut kejuaran-kejuaran si deban, ras si la kurang pentingna ikut ia muat bagi bas Gereja raduken bapa ras nandena. Rena mekatep siidah jadi organis i Gereja, bage pe Feby jadi mesdinar!”, nina ka pastor e ndube nuriken penatapna kerna jabu enda.

            Maka bas Majalahta edisi Juli si ncakapken kerna Jabu si Ertoto ras Perkuah, mehuli akap kami sinehenlah terbagesen uga kin kegeluhen jabu enda, si iangkat kami arah wawancara.

(RGG = Ralinggungi. AP = Asli Purba).

RGG: “Banci turikenndu uga pengkebet toto bas perdalinen jabundu, senina?”

AP   : “Perlebe kuturiken, Motto geluh selaku pengulu jabu, emkap pedah Dibata bagi si isuratken Matius 6:33: “daramilah lebe kinirajanNa, janah dalanken si ngena ateNa, maka icukupiNa kai si perlu man bandu”. Uga carana kita ndarami kinirajanNa, perlebe arus sitandai Ia selaku Simeraja ras meteh sura-suraNa nandangi kita. Lako metehsa arus kap rusur kita ngoge Kata Dibata ras terlebih pe, mekatep ercakap-cakap ras Ia arah toto.”

RGG: “Jadi, Uga nge si ikatakenndu e idalankenndu alu sembaba?”

AP   : “Selaku kalak Kristen tentu kita iajari kitik-kitik nari kerna ora et labora, senina. Bas aku bage pe bas jabu kami, ora et labora kuantusi ras kuantusken dingen kugeluhken alu ertoto 100% ras erdahin 100%. Labo ertoto 50% ras erdahin 50%. Sope erdahin bage pe tep-tep menaken dahin erkomunikasi aku lebe ras Dibata arah toto.

Kuendesken rencanaku ras kubegiken ka, kai nina nandangi rencanaku e, bage pe rencana-rencana bas jabu kami. Gegeh erdahin kubuat arah toto, ras kuendesken ka man baNa arah toto kerna kai ras uga pendahinku. Kuidah lit kalak bagi isirangkenna bagi toto ras dahin. Toto ya toto, dahin ya dahin, tapi kuakap madin nge ipersada jadi 100% ertoto ras 100% erdahin. Bagem jadi ras terlebih pe tupung menai geluhku kenca lanai tanggungen orangtua. Bage kenca tamat kuliah, erdahin aku i Kabanjahe bas sada bisnis pengembangen perumahen. Kerina perbeben-perbeben bas pendahinku kusingetken man Dibata arah toto, ras erkusik ia maka guna reh majuna geluhku, pindah ka aku erdahin ku Medan jadi sekalak Debt. Collector raduken ras teman-teman sada perkuliahen ndube. Ula kam sengget nangdangi gelar pendahinku e. Adi biasana megi gelar Debt. Collector tentu lit penggejapen keras, pesket,  maksa ras pantang la rulih, tapi situhuna kami labo bage. Ha..ha..ha...”

RGG: “Turikenndu dage kam menaken jabundu ras uga toto bas perdalinen jabundu, senina...”.

AP   : “Tupung aku erdahin i Kabanjahe, aku tading i Berastagi. I Berastagi kami sitandan ras impalta. Sanga si e janahna kuliah, ras kuidah tutus atena erbinaga i Pajak Buah. Selaku sekalak si enggo erlajar ekonomi tentu leket nge ukurku nandangi ia si tutus atena nggeluh, kuliah janah erbinaga. He..he..he. Ia pe bage ka me kuakap. Meteh tutus ateku ku gereja ras ertoto, maun leket ka minter ukurna bangku, senina. Tapi la ndekahsa kami erteman, kenca tamat kuliah, berkat ia ku Jakarta ndarami dahin. Sanga si e ka me aku ku Medan. Kenca mulih ia, ersada arih kami erjabu. Kenca erjabu, guna kiniulin jabu kami arus kupilih apai si mehulina: maba impalta ku Medan tah kuikutken ia erbinaga. I je pe kuinget ndekah sitik aku ertembe-tembe ras Dibata, apai kin si jadi sura-suraNa. Arah toto kudatken maka Dibata nuruh aku ngikutken ia ringan i Berastagi ras erbinaga i Pajak Buah.

 

RGG: “Oe, terusken, senina...”

AP    : “Tupung ibenaken kami erbinaga, senina, labo kami minter er-kios tapi bas kaki lima ngobral. Binaga kami pe binaga kitik-kitik eme assesoris si megati isenangi singuda-nguda anak perana. Bas usaha si kitik e pe megati ka me kami rugi. Tapi si e kerina, selaku perbapan jabu megati kuiyahken impalta gelah tetap ertoto mindo gegeh gelah ula minter medu. Sada kemegahen akap kami kenca dat me sada kios inganta erbinaga, tapi inganna arah pudi kal. Banci ikataken kalak papak-papak ras hobi keliling-keliling  nge si seh ku je. Maka toto kami sanga e, gelah Dibata mere kios kami si arah lebena kal. Maun adi ukuri secara rasional labo kuakap mungkin, sabap ndatken kios arah pudi pe enggo kami erpala-pala. Tapi erkiteken morah kal ate kami ras perlu kal kami lako binaganta bagi perlako barang teman si arah lebe kiosna, bage me rusur totongku ras nande i tengah jabu dingen pe ras anak-anakta. Bas Tuhan labo lit si metahat. Kugejapken bas kiniteken, tentu arah penuruhen Tuhan nge, reh me sekalak teman i Jawa nari ndarami mitra usaha.

Iturikenna maksudna gelah ikirimina barang i Jawa nari ras aku atena mbagikensa i Berastagi ras ingan-ingan parawisata i deher jenda. Si enda, luar duganku kal. Ras bagi ernipi pe kuakap bangku.  Semalna kita nge ndarami teman si bagenda rupana, ras metahat nge siakap ndaramisa, sabap mesera kal erbahan kalak siteken tentuna apai ka la sitandan sedekah enda. Tapi sekalenda ia si ndarami kita. Tentu enda me jabap Dibata nandangi toto kami sada jabu. Surung me kepe bagi sikupindo iberena man kami kios si arah lebe, subuk fisik tapi bage pe alu cara si deban. Mulai je nari aku me si ngisi barang-barang binaga bagi baju kaos, batik, baju panas man melala kios i Pajak Buah, Gundaling, Semangat Gunung, Tongging bage pe ingan-ingan si deban. Ras genduari enggo ka terban kita rumahta i jenda, gelah banci ka temanta si mentas reh ngelegi barang ku inganta enda. Ateku sanga e, rumahta enda jadi ingan erbinaga, tetap tading i rumahta si Berastagi, tapi anak-anakta senangen ka akapna i jenda, bage me ia, senina”.

RGG: “Semalna kuidah, senina, adi dahin erbinaga tentu mesera akapna nadingken dahinna. Tapi kam la kuidah bage. Kai pe dahin Gereja la kap ketadingen. Selaku koordinator Seksi Keluarga Parokinta, ngaturken kursus-kursus, ercakap erbahan libellus seh ku naruhken teman si perlu iurus perjabunna ku Tribunal pe, menahang nge odakndu, bage pe tupung erwari-wari ngikuti Sinode sanga e.

AP   : “Pasu-pasu, pengarak-ngarak geluh bage pe kerinana si lit bas kami, igejapken kami sada jabu rehna arah Dibata nari. Adi la isampatiNa labo kuakap banci jadi bagenda, senina. Ras bagi si tersinget ndai aku arah lebe motto geluhku ras geluh perjabunku e, senina. Jadi arus kap kita komit ras memang pe senang kuakap ngikutisa. Saja ngenca pemindonku, adi banci, ula min rempet-rempet ngataken dahin si man dahinken, gelah sempat denga aku ngaturken jadwal. Ras adi enggo iaturken ula ka min la surung. Sabap kerinana enggo kusingetken man Dibata bas totongku.

RGG: “Tersingetna kerna Sinode, kai saja nge si erkesan bandu bas Sinode VI KAM sanga e, senina?”

AP   :”Kerina nge erkesan ras meriah ukurku ngikutisa. Terlebih si man siksiken sanga e emkap kerna Jabu, si tentu si e sekerajangenta ras erkepentingen kal kita. Sada nari, bagi pernah kange kusingetken bandu sanga Sinode e, bas kelompokku, kelompok 2, tupung tegunku ngerana, kuusulken gelah sipakelah sistem manajemen bas Gereja enda, ula bagi sigelgelna dalanken kerina alu la ertarget. Teptep pgogram bahanlah kai target ras sibar-sibar keberhasilenna, ningku. Sanga e enterem temanku sada kelompok tawa manku. Genduari arah sosialisasi hasi-hasil Sinode ipetangkas man banta, kerina program iiyahken gelah ertarget ras lit indikator-indikator keberhasilenna!”

RGG: “He...he..., ertina usulndu ialoken ras idalanken. Mantaplah!”

RGG: “Mulihken sitik kita, kerna ertoto, tupung katawari saja kam ertoto pribadi janah ertoto ras-ras sada jabu, senina?”

AP   :”Medak kenca tupung erpagi-pagi ertoto kami ras impalta lako menai wari. Kenca ras kami ertoto, impalta erdakan, aku ngaturken binaganta. Teptep muat ras kenca man ertoto ka kami ras anak-anakta. Muat tunduh pe bage. Anak-anakta pe kukontrol ras kumotivasi tetap ertoto gia bas kamarna.Tambah si e, ertoto bas Perayan Ekaristi, Perpulungen jabu-jabu, retret bage pe kesempaten-kesempaten si ertentun rikutken keperlunna, senina.

RGG :”Kai nge gejapndu ulih toto man perkembangen anak-anakta, senina...?”

AP  : “Sikugejapken maka anak-anakta pe reh belinna bas kiniteken, arapen ras kekelengen. Megati ka nge iuji kami anak-anakta, wari Minggu bagenda, ku ja kita? Jabapna minter: Adi wari Minggu kuja? Padah kin sungkun? Wari Minggu ku Gereja!”

RGG: “Asa si kuidah, kam pe sada jabu kalak perkuah, senina...subuk man sangkep nggeluh, teman sada kiniteken bage pe nandangi panitia-panitia pembangunen bage pe peresmin gereja. Terlebih nandangi panitia e, labo penampat ngenca iberendu tapi pe tenaga ras kepentarenndu pe ibagikenndu.

AP   :”Kerina reh bas Dibata nari ras lit ka nge bagin man temanta manusia bas si e, senina. Selaku sakramen, nina pe Gerejanta arus ka nge kita jadi dalan ras pancur pasu-pasu Dibata.

RGG: “Uga ka nge kerna biak perkuah enda nusur ku anak-anakta, rikutken penggejapenndu?

AP   : “Adi anakta si galang, Rena, katepen kuidah ia melukah erbagi kerna talentana bage pe kerna nampati temanna bas pelajaren. Anakta si kitik liten ka perkuahna bas dampar perduiten. Tapi si enda tentu bas proses denga, sabap anakta pe nguda denga ras tentu langa mandiri. Si pentingna kuakap sibere man bana usihen, maka arah nggit mere man si merluken, labo ngkurangi bas kita tapi ndatken tole pe pemere Dibata, senina.”

RGG: “Iyak, bujur melala senina, mbera-mbera kai si icakapken kita enda erguna man teman-temanta si ngoge majalah enda ras datna tenah si mehuli i je nari. Selamat ulang tahun perjabun pe man bandu ras impalta, Dibata simasu-masu jabundu, tetap mere rejeki si simpar bandu, ras anak-anakta pe reh belinnalah min tetap kiniteken, pengarapen ras kekelengenna subuk man kam orangtua bage pe man kerina temanna manusia.”

AP   :”Ue yah, senina ena me buaten!

Betlehem Ketaren

JABU: GEREJA RUMAH TANGGA

A.B. SINAGA, USKUP AGUNG MEDAN

Sinode VI KAM si ilakoken i Nagahuta Pematangsiantar bas tanggal 6 seh 11 September 2016 si lewat, muat tema “Jabu selaku Gereja Rumah Tangga”. Dingen selaku Gereja Rumah Tangga, pengkebet Orangtua bali ras pengkebet Gereja, ikembangken bas telu lako jabat Kristus, “Orangtua selaku guru, Orangtua selaku malim, ras Orangtua selaku permakan.”

Ngurkuri kinibayaken ajaren Gereja kerna orangtua selaku guru, malim ras permakan rumah tangga, enggo ibahan penelitin lapangen, si la terjeng ngendesken data-data si rembang tengah, tapi pe  ningetken ruang-ruang perbeben bas nuduhken pendilon selaku orangtua. Dingen lako ndatken palasna bas kiniteken, ajaren ras tujun jabu selaku guru, malim ras permakan, arus kap alu nggermeti ajaren-jaren Pustaka Sibadia, Bapa Gereja, Konsili Vatikan II ras penurat paksa si genduari terlebih Paus Johanes Paulus II bas Familiaris Consortio. 

Jadi cataten pe maka Jabu Badia Nasaret me si jadi si ngepkep jabu Kristen nai-nai nari. Janah bas tanggal 18 Oktober 2015 Gereja (Paus Fransiskus) enggo ngangkat jabu Luis Martin ras Zelie Mourin, orang tua Santa Teresis Lisieux, pengepkep misi, jadi Pengepkep Jabu. Perkembangen pengepkep jabu bagenda tentu me erpengaruh kempak pertendin ras tujun pengkebet orang tua bas jabu, asa bages usihen geluh idur si dua pengepkep jabu e.

UGA KIN JABU, IKATAKEN GEREJA RUMAH TANGGA?

Bas norosi kerna “Jabu e Gereja Rumah Tangga”  tentu iperluken palas-palas pengukuren. Sabap alu bage me maka banci alu tegas ras sikap siantusi kerna orangtua e guru, malim ras permakan bagi si enggo ikataken kitap penegun Sinode VI.

Konsili Vatikan II nekanken: “Jabu emkap Gereja Rumah Tangga. Bas jabu, orang tua, alu perkatan bage pe usihen, jadi pewarta kiniteken si pemena nandangi anak-anakna; orangtua erkiniarusen miara pendilon man bana sekalak-sekalak, terlebih pendilon pertendin” (LG, no. 11).

Erdandanken si e, ikataken Paus St. Johanes Paulus II, nina: “Kempak jabu, selaku Gereja rumah tangga, ikenaken kerina geluh Gereja, eme kinibayaken, kiniergan ras kiniarusen si mbelin, bas kinikuhenna, kiniersadanna, kinipatuhenna ras kinihumurenna” (FC no. 50).

Engkai kin maka Jabu e banci ikataken “Gereja Rumah Tangga”? Isehken Paus St. Johanes paulus II dua palas jabapna, emkap: 1. erkiteken jabu ipetubuh Gereja;  ras 2. erkiteken jabu icangkukken ku bas Gereja.

Jabu jadi Gereja Rumah Tangga “terlebih erkiteken Gereja, si jadi Nande, nubuhken, ngajar ras mentuk jabu kristen, dingen bas ubungenna e, alu mereken kemungkinen erdahin nelamatken bagi si enggo ialokenna bas Tuhan nari. Alu pebelangken kata Dibata, petangkaskensa man jabu kristen raduken kinatana uga situhuna, rikutken rancangen Tuhan. Alu ngerayaken sakramen-sakramen, ipebayak ras ipeteguhken jabu kristen e alu pemere Kristus gelah ibadiaken bas kemulian Bapa. Alu terus petampakken perentah si mbaru, kekelengen, jabu kristen ijemba ras itegu Gereja kempak pengelai kekelengen gelah tetap ngusih ras nggeluhken  pengendesen diri Kristus dingen erkiteken  pengendesen diri ras kurban kekelengen si isampitken Tuhan Jesus guna keselamaten kerina manusia” (FC no. 49).

Seakatan si e, palas si peduaken engkai maka ikataken “Gereja Rumah Tangga,” emkap erkiteken jabu kristen enggo icangkukken ku bas rusia Gereja, bagem seh ikut ndatken tading-tadingen bas carana jine nandangi  pendahin keselamaten Gereja; erkiteken gegeh sakramen, pasangen perbulangen ndehara ras orangtua, ‘bas lako jabatna ras cara geluhna ndatken pemere si ertentun bas Umat Dibata.’ E me sabapna engkai maka kalak e la terjeng ngaloken kekelengen Kristus ras jadi persadan si terselamateken, tapi pe idilo lako ncakapken kekelengen Kristus kempak sembuyak-seninana, segelah jadi persadan si nelamatken. Alu bage, dingenna jabu kristen e jadi buah ras tanda kinihumuren kinidibatan Gereja, jabu e pe jadi rupa, saksi ras si muat bagin idur kininanden Gereja” (FC no. 49).

Alu palas si bagenda, terkuhilah rusia ubungen Kristus ras Gereja dingen Gereja jadi penganten si ikelengi, siibuahi ras si isuruhNa pebelangken Berita Simeriah. “Si enda ncidahken rahasia si mbelin kal ertina. Janah aku jine ngidah, maka si enda nuduhken persadan Kristus ras perpulungen.” (Ep 5:32).

Bagi uga si enggo ibereken Paus St. Johanes Paulus II palasna si tersena i datas, Gereja e, bas bentuk si kitik emkap Gereja rumah tangga. Ras bagi uga Kristus kempak GerejaNa emkap “Takal, Guru” (neh. Mat 19:16), Malim Simbelin (Heb 7:26), Permakan Simehuli, si ngendesken kesahna man biri-biriNa (Joh 10:11)” (APSU, 33), bage ka me pe orangtua jadi ‘guru’, ‘malim’ ras ‘permakan’ kempak jabu ras anak-anakna. I bas jabu kap “pengkebet orangtua bas lako jabat guru, malim ras permakan Jesus Kristus ras GerejaNa ndatken perkatan ras pendemina alu tangkas” (FC, 50).

Tuhu-tuhu teluna jabaten perbulangen-ndehara, terlebih bas jabu, selaku guru, malim ras permakan, rurat bas ras maler idur pemaken telu jabaten Kristus kempak kalak si erkiniteken, selaku Nabi tah pe Guru, selaku Malim Simbelin ras selaku Permakan Simehuli. “Jesus Kristus ipasu-pasu Bapa alu Kesah Sibadia ras ijadiken ‘nabi, guru ras raja’ [permakan]. Kerina umat Dibata muat bagin bas telu jabaten Kristus, ras ertanggungjabap bas penuruhen ras pengelai si reh bassa nari” (KGK no. 783).

(Tridarma Orangtua Dalam Keluarga Sebagai Gereja Rumah Tangga, Ekshortasi Diosesan Uskup Agung Medan, Anicetus B. Sinaga, 22 Oktober 2016, -BK)

BENYAMIN NGARAP GINTING: “AWAM PE SERAYAN DIBATA KAP”

 HEPPI GINTING, KA-BANJAHE.

    

Pebelangken Kata Dibata enda, labo pendahin malimta saja, tapi pe iarapken maka kita pe kerina umat ikut muat bagin. La erpendobah  kai gia pendahinta ras kai pe sukunta. Uga orang tuanta si enggo leben megi Berita Simeriah ras uga ka  ia ikut muat bagin, e me kap ibas nampati malim segelah Berita Simeriah e ras Kinirajan Dibata tersiar ku sebelang-belang doni enda, maka alu gegeh ras semangat si ibereken Tuhan suari ras berngi ndahi umat ku kuta-kuta segelah min erteremna jelma nandai ras nggejapken kekelengen Tuhan ras tek kempak Berita Simeriah.

   

Ibas Taneh Karo Simalem enda, Paroki si perlebe pantek e me Paroki Tanah Karo, si genduari enda itandai kita alu gelar Paroki Maria si Sokeliamen i Angkat ku Surga. Je nari me piga-piga orangtuanta subuk si enggo ngadep man Dibata, bage pe si nggeluh dengan ikut nampati malim niar-niar ku kuta-kuta, lako pebelangken Kata Dibata tah pe Berita Simeriah.

Orangtuanta enda lit ibas  tep-tep warina erdahin i sekolah-sekolah Katolik bage pe si erdahin ibas ingan si deban, ras i lluar kesibuken-kesibuken dahinna, iendes-kenna ka diri ras pemetehna  lako nampati malim. Malim tupung si e , pastor-mastor si sangana ertugas i Kabanjahe eme:  P. Licinus Fasol Ginting OFM Cap.; P. Maxiamus Brans Sitepu OFM Cap.; P. Elpidius Van Duijnhoven OFM Cap.; P. Kleopas Sinuhaji OFM Cap.; P. Michael Hutabarat OFM Cap ras ras pastor-pastor si mbaru (nguda denga) si debannna.

Uga pengalamen orangtuanta enda ibas pebelangken Berita Simeriah, lako metehsa ras gelah banci igermeti dingen guna banci ras-ras kita muat sumangatna, maka aron Ralinggungi nungkun man orangtuanta enda, e me kap kerna kai si ilakokenna, engkai maka ia nggit ras kai pedahna man banta si gundari.

Maba Perminggun i Pengunsin, sada keligaten Awam (Foto John F Purba)

Si idahi aron Ralinggungi e me kap orangtuanta Bp Anita Ginting (Benyamin Ngarap Ginting). Bapanta enda gel-gel pernah jadi guru ras Kepala Sekolah SMP Maria Goretti Kabanjahe asalna i Kubu Colia nari. Bapa enda Gundari Ketua lingkungen Elisabet, Stasi Induk Kabanjahe.

Tupung aron Ralinggungi reh ku rumahna i Jalan Sekata Kabanjahe, bagi semalna kita temue ialo-alo si mada jabu, minter me kai tujun kami reh. Megi cakap kami maka kami reh guna nungkuni kerna ka si isenaken kami idatas e, teridah mis meriah kal ukurna bagepe siang kal ayo ras nande i tengah-tengah jabu ngalo-ngalo aron Ralinggungi. Maka iturikenna uga mbarenda ia berkat ku kuta-kuta ras piga-piga serayan Dibata  si deban.

Enda me percakapen kami ras orangtuanta e, sue ras si ilakoken kami i Jalan Sekata Kabanjahe. (Ralinggungi = RLG; Benyamin Ngarap Ginting = BNG).

RLG: “O pa, turiken dage pengalamenndu sue ras kai  si ilakokenndu  tupung kam mbarenda ikut ngelai ibas serayan Dibata.”

BNG: “Bujur ibas sungkun-sungkunndu. Tangtangna mabarenda tupung aku ikut ku kuta-kuta e me kap lako nemani umat maba ende-enden ibas Cakap karo. E maka erdekahna maba liturgi. Piga-piga temanku  sada aron sanga si e, e me kap Bp Nirwan Brahmana (Alm), Bp Ponis Ginting (Alm), bage pe Bp Ngolu Purba. Tupung si e Guru Agama eme: Lima Kuta Girsang (Alm), Maju Tarigan, Ngampis Sembiring, Bp Rabun Sebayang, Bp Dameria Tarigan, Koki Tarigan, Bp Idrus Ginting, Dalan Beluh Pandia, Bp Braveta Tarigan Bp Rumenda Purba, Bp Helena  Sinuraya, Sehat Depari, Bukti Ginting, Bp Riadi Milala, Paksa Ginting, Jaman Tarigan(Alm), Lebat Brahmana, Adrianus G. Sitepu, Ndelmat Depari (Alm) Sada Arih Surbakti,  Biasa Tarigan (Alm), Bp Tangsi.

Kira-kira tahun 1961 aku enggo ikut. Sope denga si e, maka enggo lit piga-piga tahun si leben asangken aku, e me kap, Sadamalem Ginting, P.S. Ginting tah pe Bp Rufina (Alm), Ngambang Sitepu (Alm) Pa Ngolu, Bp Bungaren Ginting, Bp Idrus, bage pe piga-piga si enggo ku kataken ndai ras denga kami ku kuta-kuta. Piga-piga kuta si idahi kami e me kap: Sirumbia, Tanjungpulo, Jandi Meriah, Batukarang, Beganding Sampun ras piga-piga kuta si deban. Lit denga piga-piga kalak nari si ras kami, tapi lanai ku inget. Itambahi nande i tengah jabuna ka (Nd Anita) maka lit ka piga-piga pernanden Katolik si nemanisa e mem kap Nd  Anita br Bangun, Nd Nirwan br Purba, Nd Siti br Sembiring, Nd Ernita br Purba.

Kami berkat nangkih Jeep Malim, e maka kami i pesusur i piga-piga kuta. Je nari i legi ka, kami nggo kenca dung. Maun-maun  melawen maka reh motor, e maka megati enggo lewat tengah berngi maka kami  seh i Kabanjahe. Pernah ka motor kami iambati kalak si la itandai.

Ikuta tupung Lakon i benaken lit ka maun-maun cakap si la bagi ukur, i benter kalak ingan pulung alu batu si kitik. Berngi, Aturen ibenaken jam 8, jam 9 maka enggo reh umat. Perpan pe megati la erturi-turin. Lit ka tantangen sideban, e me kap umat nungkun. Umpamana adi enggo bengket ku Berita Simeriah banci denga kin erpangir ku lau ras perumah begu nina. Enda me sada ketedehen ate nangdangi inkulturasi, kuakap.

Kira-kira tahun 1968 lit peridin si keteremen ibahan i Batukarang. Umat enggo erteremna. Gelah umat   ergiah- giah ras meriah akapna, megati ibahan sandiwara tentang Tuhan Jesus tupung wari Natal bage pe Wari Paska. Singaturken Sandiwara enda, e me kap Bp Nirwan Brahmana (Alm) si asalna Doulu nari, Bp Ponis Ginting (Alm) si asalna Sukadame nari.

Ibas berkat ku kuta ndahi umat megati ka i pake teman kami “motor pit” malimta. Teringet aku maka meriah kal niakap umat ngalo-ngalo kerehen kami. Enda me pengalamenku ibas kami ndube ikut ngelai, ibas kira-kira tahun 1961 seh ku pemenan  tahun 1990. Dungna, kenca siidah maka reh semangatna umat bage pe pengurus-pengurus si enggo itetapken i kuta-kuta pe, maka ibahan me sermon i Kabanjahe. Ertina, seakatan kami reh ku kutana, ia pe ibas paksa-paksa tertentu itenahken ka reh ku Kabanjahe.Sermon enda ibahan tujun utamana e me  gelah pengurus awam e reh beluhna maba perminggun.

Tupung i sungkun Ndiganai mulai sermon ei benaken,  ia enggo lupa. Kerna si e isempatken kami ka Bp Juna Sitepu, i Sukajulu nari, janah nina maka sermon si ibabai P. Lisi bage pe P. Kleopas e kira-kira ibas tahun 1970-en.                         

RLG: “Kai nge si njemba-njemba kam maka kam semangat ndalanken dahinndu e, pa?”

BNG: “Labo lit  kai pe i bereken malim man kami. Enda i dalanken kami gelah erteremna jelma bengket ku Berita Simeriah. Maka arah si e kinirajan Dibata termurmur ras kita pe dat pemasu-masun ibas Dibata nari. Kugejapken pe maka sehat-sehat kami, meriah ukur kami ras siangkan kami ibas kami ikut pebelangken kata Dibata e.

RLG: “Kai tenahNdu man pengurus ras umat Katolik si genduari enda, pa?

BNG: “Segelah min kita kerina si erdahin ibas Gereja katolik tah pe Sekolah-sekolah Katolik banci min jadi usihen umat. Bage pe teruslah pebelangke Berita Simeriah rikutken cara ras odak si genduari ka.

Ula si sungkun kai si bereken Gereja man banta, tapi sungkuni min rusur dirinta kerna kai si ibereken kita man Gereja. Bagi Tuhan Jesus enggo mereken usihen man banta. Terlebih si erdain  i sekolah Katolik subuk Guru, pegawai  terlebih ka Guru Agama. Kalak si la erdahin i sekolah Katolik pe eneterem nge mereken dirina guna kemajun Gereja, umpamana Bp Reniati Kaban (Ketua Dewan Paroki SPM). Tapi adi banci kerinalah kam muat bagin rikutken ras pemeteh, biak bage pe pengendesen dirindu sekalak-sekalak”, nina Bp. Anita Ginting e.

 Bagenda me percakapen kami ras Bp Anita Ginting. Enggo iturikenna pengalamenna uga mbarenda ia ras teman-temanna nampati malim guna pebelangken Kata Dibata ku kuta-kuta alu semangat si tuhu-tuhu Erpalasken keriahen ukur, la ia ngukurken upah i doni enda. Janah mbue inget-ingeten si la terlupaken si lit ibas lakon e. Maka arah penuruhenna e kita pe kerina min ikut muan bagi ibas serayan Dibata sue ras pengkebet ras kengasupenta sekalak-sekalak.

Ersentabi kami adi lit kesalahen ibas penulisen gelar bagi si enggo turiken Bapa enda. Bujur ras mejuah-juah. (HG)