BULAN MEI BULAN MARIA

BETLEHEM KETAREN

 

Kesemalen  nghamati Nande Maria ibas bulan Mei e me kesemalen si dem   kiniulin (Paus Paulus VI, ensiklik Maio, Mei 1965).

 

 Kerna bulan Mei selaku bulan Maria tentu enggo me radu si antusi.  Mungkin enggo jadi kesemalen pe banta subuk ibas stasi, lingkungen, perpulungen Mudika, perpulungen Pernanden ras terlebih-lebih ibas perpulungen komunitas-komunitas: ngelakoken ibadat salu ertoto rosario tah pe jiarah ku gua-gua Maria.  Perbahanen-perbahanen enda pe ilakoken ka ibas bulan Oktober, piah lanai si antusi kai  si pelain bulan Mei ras bulan Oktober janah megati kita ngataken bulan Mei ras Oktober emkap bulan Maria tah pe bulan Rosario.

Situhuna, nai-nai nari pe  kesemalen Gereja enggo nangkasken maka bulan Mei bulan Maria ras bulan Oktober bulan Rosario, e maka ibas tulisen enda perlu niakap kami terbagesen ipetangkas kerna bulan Mei bulan Maria.

Bulan Mei Bulan Maria: Rikutken Bena-bena Litna ibas Kesemalen Umat.

Ibas tahun 1200-en ndube, i taneh Spanyol enggo nggeluh kesemalen ngerayaken bulan Mei guna pehagaken Maria, janah kesemalen e dungna ibaba ku Gereja Timur.  I taneh Italia kesemalen e enggo nggeluh ibas tahun 1500-en nari janah ije  nari me tersiar ku belang-belang Eropa Tengah.  Ibas perpudi tahun 1700-en kesemalem erdevosi kempak Maria tuhu-tuhu enggo mbelang beritana, janah tambah-tambah tersena erdandanken ibas tahun 1854 Paus Pius IX ngkahkahken bohan, malu penganak nabalken dogma Maria Dikandung Tanpa Noda, ras kejadin tanda sengget Maria ncidahken bana i Lourdes, Prancis ibas tahun 1858.

Ibas dampar si deban lit ka si nangkutken bulan Maria ras “Mei” gelar bulan si pelimaken e, sini itandai arah kata “Maia” cakap Junani siadi e me “beru kinihumuren”, nande Hermes, ras Hermes e me si ikataken selaku si isuruh kerina dewa.  Guna nghamati Maia, kalak Junani ngerudangi ganah dewi Maia, ras si enda iusih kalak Katolik kempak Maria si igejapken patut ngaloken kinihamaten sabap ia Nande Jesus Kristus si isuruh Dibata si Madameganjang ras jadi Kata Dibata si njadi jelma.

Mula tangtangna bulan Mei ilakoken guna ndalanken kinihamaten kempak diri Santa Maria si sokeliamen, nginget bulan Mei e me bulan “kinijilen”, bulan sampur kegeluhen ras la lit si jilen asa Maria, nina Angelo Comastri, Uskup Agung ras Vikjen Vatikan, Mei 2006 (i Eropa bulan Mei rembang katikana musim semi: si igejapken selaku bulan keturahen mulihi  kerina kegeluhen si mbaru).

Bulan Mei Bulan Maria: Rikutken Pustaka Sibadia (Kalender Liturgi Gereja).

Biasana, perayan paska ndabuh ibas sada wari ibas bulan April, ras kenca Paska bengket kita ku paksa nina-nimai Kenangkihen Tuhan ras wari Pantekosta.  Pustaka Sibadia jine nuriken maka tupung paksa e Maria raduken rasul-rasul megati pulung guna ertoto ras-ras salu tutus (bdgk. Perb. 1: 12-14).  Nginget maka wari-wari e lit dekahna 40 – 50 wari, tentu Maria ras rasul-rasul tetap setia ertoto ras-ras seh  bulan si mbaru reh.  E maka bulan Mei tuhu-tuhu cocok guna mpersingeti kerna diri Maria si ringan ras jadi nande rasul-rasul dingen ras ertoto guna nimai nusurna Kesah Sibadia (Paus Benediktus XVI,  kotbah bas sada perminggun ibas Mei 2007).

Bage pe adi sigermeti Kalender Liturgi, si dat me piga-piga wari perayan kempak Nande Maria, umpamana tanggal 8 Mei: peringeten Maria sinjadi kelang-kelang kerina pasu-pasu; tanggal 13 Mei: peringeten Nande Maria i Fatima; ras tanggal 31 Mei: Perayan Maria ndahi edana Elisabet.  Ibas kerina peringeten ras perayan e patut pe maka i Irlandia, i Inggris ras i Amerika Serikat Maria igelari “The Queen of May” entsh pe “Maienkonigin” (Ratu Bulan Mei).

Devosi man Maria Ibas Bulan Mei

Nginget kiniseran Maria ras rasul-rasul ibas kebiaren, arapen si mbages gelah Jesus nggeluh ras reh mulihi tupung e, bagepe nginget kiniseran ras kinipangen Maria ndahi edana Elisabet si ija dauhna Nasaret nari ku Ain Karim e kurang lebih 100 km, ras paksana ia  mbaru-mbaru mehuli kulana, maka perlebe penggejapen nangdangi bulan Mei ikesahken salu “wari-wari si dem kebiaren”.  Man banta genduari enda peringeten ras perayan e guna pebagesken penggejapen kiniermengkahen ate ras kinijengangen.

Adi ibas bulan Oktober selaku Bulan Rosario, enggo tangkas banta si terutama si ilakoken e me Toto Rosario.  E maka seakatan si e, ibas bulan Mei devosi man Maria raduken perbahanen-perbahanen kinihamaten, e mehuli ilakoken ibas erbage-bage curak ras rupana, umpamana: ngelakoken Novena Santa Maria, notoken Litani Santa Maria, muat bagin ibas misa votif ibas wari Sabtu ras si debanna.  Ertina, seakatan Toto Rosario, jiarah ku guha-guha Maria, retret, rekoleksi, seminar, lomba koor ende-enden kerna Maria pe banci ilakoken nambahi pemeteh ras pengantusen pusuhta kempak pengendesen diri Maria Nande Jesus ras nandeta e.

 

Erbanding-banding muat si mehuli, tentu sitik pe lalit salahna.  I Pilipina ibas bulan Mei perpulungen nghamati Maria aras ngendesken Flores de Mayo, e me kap “rudang-rudang Mei”.  Ibas lakon e perpulungen nirat (nghias) altar ras kerina duru kursi-kursi umat salu rudang-rudang si merim mejile.  Ibas karabenna wari iterusken salu ertoto rosario, ngendesken bunga man Maria janah kenca si e man ras-ras arah nakan pangan sienggo isikapken i rumah nari.

I taneh-taneh Eropa, lit kesemalen nirat ganah Maria salu rudang-rudang si merim mejile, si jadi tanda pujin kerna kegeluhen ras lagu langkah Maria selaku nande si mehuli.  Rudang e pe nandaken keriahen ukur perpulungen kerna kegeluhen si ipelimbarui, sebab enggo turah ras nggeluh mulihi ibas musim e kai kerina si enggo tempa-tempa mate ibas musim si perlebena.

I Portugal, ibas teptep tanggal 31 Mei perpulungen ngerayaken kehamaten kempak Maria arah radu ras sada kota eralep-alep ralopa-lopa ngarakken ganah enteh pe gambar galang Maria ras naruhkensa dingen  ntahtakensa ras-ras ku gereja.

Gendekna, seakatan ertoto Rosario, ibas kesemalenta erbage-bage perbahanen banci silakoken ibas gelar ras palas kekelengen ras kehamaten kempak Nande Maria si setia ertoto kerna kita anak-anakna.

Kesah Singgiahken Devosi kempak Nande Maria.

Gelah devosi kempak Maria erbuahken buah-buah kiniteken si mehuli, maka kesah si nggiahken devosinta, e me si erbahan pusuhta ersuruh guna nghamati Maria, si mehulina e me:

 

• Kesah kinnggiten ermengkah ate ibas kerina kiniulin ukur ras pengelakoken Maria ibas bena-bena pendahin Dibata man kerina jelma ibas anakNa Jesus Kristus;

• Kesah nehken, ngendesken si lit ibas pusuhta kempak Maria, erkata bujur, toto, ende-enden, rudang enteh pe lakon “tapa” si sentudu;

• Kesah guna ncidahken, nuduhken, ngataken maka kita erngena ate man Maria salu tutus;

• Kesah kiniteruken ukur ras kinnggiten erlajar kerna kiniulin-kiniulin Maria selaku sekalak si erkiniteken.

La terbuali, enterem denga umat si nangkutken devosi man Maria ras erbage-bage pemindon si meseksek tah pe maun maksa, gelah isampati Maria arah totona.  Si enda tuhu labo salah enteh pe labo perbahenen si la mehuli.  Saja ngenca, salu la sedar si tuhuna perbahenen enda tuhu nguraki erga ketulusan cinta tah  pujinta nangdangi nande Maria. (Ma bage kin?).

Mbera-mbera arah tulisen kerna bulan Mei bulan Maria enda, banci pegiah-giaheken kita kerina gelah reh gegeh ras reh nggitna erbahan erbage-bage perbahanen si nuduhken kehamaten ras kekelengenta nangdangi Maria janah erkiteken si e reh tunggungna kinitekenta kempak Jesus Kristus anak nandeta Maria e. (Isuratken ibas Cakap Karo janah Ipegendek arah ”Bulan Mei Bulan Maria”, F.X. Rahkito Jati, OMI, “Liturgi"

ALAT "KOMUNIKASI" RAS GEREJA

BETLEHEM KETAREN, BERASTAGI

 

Pebelangken Berita Simeriah (Pewartan) e me kap sada tugas ras palas kegehuhen Gereja si pentingna. Penuruhen Jesus alu perkatanNa: “Laweslah ku kerina bangsa manusia, janah bahanlah ia jadi ajar-ajarKu” si isehkenna man ajar-ajarNa, seh ka man kerina umat, e me kalak si enggo ngaloken peridin ibas gelarNa.

Guna pebelangken Berita Simeriah ku sebelang-belang, tentu alat-alat komunikasi seh kal pentingna, ras mbelin kal penampatna.  Koran, Majalah, Tv, HP bage pe Internet, mere kesempaten si pesikapken, pelancarken ras erbahan melukah tenah tah pe berita-berita tah rencana-rencana Gereja erkesehen ku enterem jelma si enterem, terlebih-lebih kempak kalak si mesikel ndarami pemeteh ras gelemen nggeluh. Alu alat-alat komunikasi e, gia sinehken berita la pedempak ayo ras si ngaloken berita, tapi berita banci seh man bana alu sikap.

Penatap Gereja Kerna Alat-alat Komunikasi Modern

Kerna alat-alat komunikasi si tersena i lebe e, Konsili Vatikan II jine  erpengakun maka tehnologi modern e “mbuka kesempaten-kesempaten si mbaru guna alu lancar nehken erbage-bage curak berita, perukuren ras gelemen” (IM 1).  Tambah-tambah si e, Konsili ngiahken lako “nggunakensa alu sikap lako erbage-bage pendahin pengep-kepen” (IM 13), terlebih-lebih guna pebelangken Berita Simeriah.

Tuhu, ibas jaman si genduari enda alat-alat komunikasi e la jarang igunaken guna erbage-bage propaganda, indoktrinasi ras pebelangken informasi. Bage gia, tentu la pentar adi Gereja pedauh bana idur kegeluhen alat-alat komunikasi modern e, tapi tentu pangen me alu muat ras makeken kiniulinna ibas ndalanken tugas Gereja ras petangkasken kesaksin alu nehken kesaksin kalak Kristen selaku Sira ras Tendang kempak jelma si enterem. Alu bage Gereja pe banci mabai kalak si deban gelah radu-radu metenget njagai bana ibas pengaruh ras kuasa media massa e.

Berita-berita si ipebelang alu alat-alat komunikasi arus kap sue ras kebenaren, dingen tujunna pe arus kap pehergaken dingen petunggungken manusia ras kegeluhenna. Propaganda ras indoktrinasi la arus meneken  tah pe ngolang-ngolangi tanggung-jabap ras kepentaren ukur. Penegun-penegun guna gelemen nggeluh si ipebelang oratna kap ibahan ibas ketuhu-tuhun nampati jelma beluh rukur, labo lako maksaken kebenaren sue ras pengakap si empu media massa jine.

(Foto: Justie Tarigan, Cispro Multimedia)

  Guna si e Gereja ngiahken kerina jelma gelah ikut njagai gelah alat-alat komunikasi gelah ula sempat ngelukken penge-nehen rayat si rulo ibas palas-palas orat nggeluh ras orat rukur. Janah ras-raslah min kerina erjuang gelah arah alat-alat komunikasi kebenaren Dibata reh mbagesna iantusi ras idalanken reh teremna jelma ras jadi gelemen nggeluh ibas pesikapken kegeluhen jelma si enterem.

NGGEJAPKEN RAS ERMEDIATE Ndahiken dahin Gereja ibas Diakonia ras Martiria

Ibas  terbiten edisi si  pemena tahun 2014 enda ikataken kami perlebe Selamat Tahun Baru man kita kerina umat katolik ras si ngoge majalah ralinggungi. Kita patut ermeriah ukur erkiteken kita enggo  ibereken Dibata kesempaten mentasi tahun 2013 ras enggo bengket ku tahun si mbaru. Entisik kita  nulih ras nginget ku tahun si enggo lewat uga pengalamenta ibas erbage-bage situasi subuk ibas pengalamen si ermeriah ukur bagepe pengalamen si la bagi ukurta. Terlebih ka ibas serayan Dibata uga kita enggo muat bagin.  Janah uga ka pengarapen ras niatta ibas tahun si mbaru.

 Ibas Keuskupan Agung Medan (KAM) tupung i bahan Sinode Pastoral si pelimaken maka iarapken umat ngukuri ras ngelakoken dahin gereja e me kap Kerygma, Koinonia,Liturgia,Diakonia ras Martiria. Ibas bulan 6 tahun 2013 enggo kita enggo bengket ku tahun Martiria si ope denga tahun Diakonia. Salah sada dahin Gereja e me kap Diakonia(ngelai)  ras martiria(kesaksin).  Ibas ndahiken lakon Diakonia si inget  kai si enggo sibahan ibas pendahinta. Enggo nge kita usur ngelai entah ateta i elai. Min si inget kai si kataken Jesus, maka madin  nge kita ngelai asangken i elai. Kai gia jabatenta ibas serayan Dibata, entah umat biasa entah pe pengurus, maka ermeriah ukur min tetap kita ndalankensa. Kejadin ibas mbeltuk deleng sinabung enterem kalak muat bagin encidahken kekelengen alu mere penampat subuk ibas tenaga entahpe arah bentuk barang ras perduiten.   

Ibas dahin martiria uga ka kita encidahken janah pang jadi martir/saksi Kristus aminna kai gia pendahinta. Adi si nehen ibas ajar-ajar Jesus  maka Petrus, e me kap paus pemena, Ia enggo  jadi martir. Uga kalak Kristen si i Roma i bunuhi erkiteken kesaksinna man Jesus.  Stepanus ibenteri alu batu se ia mate,erkiteken kesaksinna. Paulus pe i taban/ i penjaraken, e pe erkiteken kesaksinna. Ras enterem denga kalak si badia ngenanami kiniseran erkiteken kesaksinna e. Ibas jaman si gundari kita pe i arapken pang jadi saksi kristus ibas pendahinta ras si ugapana pe. Kita umat Katolik lit denga la kita pang entah mela erbahan tanda silang, umpamana tupung man i rumah makan/kede nasi. Enda tentu jadi sada penungkunen ibas pusuhta? Uga maka lit denga la pang entah mela erbahan tanda silang e?. Apai ka umat si tading ibas ingan si kalak Katolik ije sitik ngenca entah pe i kataken minoritas. Enda tentu jadi sada perjuangen man banta. 

Ibas pendahin pe kita megati mbiar dengan ersaksi . Umpana kita mela ras kisat lampas reh , ras ertutus ate ibas pendahinta. Lit kalak si erbahan salah pe, la pang kita ngataken situhuna. Umpamana lit kalak si lit i buatna si la arus man buaten, erkiteken e la  sekerajangenna, e me ikataken korupsi. Megati kita sinik saja. Memang adi jadi saksi Kristus i tuntut pengurbanen entah pe nggit kita ngaloken kai akibatna adi kita encidahken kebenaren. Megati kita mecek pusuh.  Arah si enda maka siarapken kita nggeluh ibas kebadian.Ibas tahun si mbaru enda si pindo pergegeh man Tuhan , maka kesah si badia mereken gegeh ras penampat gelah tambah semangatta ersaksi ibas kegeluhenta. Bujur ras mejuah-juah, Selamat tahun baru. Bp Sulngam Ginting.

SAKRAMEN EKARISTI

1. Antusen Ekaristi

Ekaristi Sibadia e me SAKRAMEN paksa Jesus Kristus ngendesken Kula ras DarehNa-DiriNa jine-man banta gelah kita pe ibas keleng ateta ngendesken diri man baNa dingen ersada ras Ia ibas Missa Sibadia. Alu bage, ersada kita ibas Kula Kristus, e me GEREJA

Kenca Peridin ras Krisma, Ekaristi emkap sakramen inisiasi peteluken ibas Gereja Katolik. Ekaristi me pertumpun rusia idur kerina sakramen sabap pengurbanen Jesus i kayu persilang e ringan ibas perkatan konsekrasi si alu terbuni ras alu lanai nurcurken dareh. Alu bage, perayan Ekaristi jadi “ulu ras tampuk geluh kiniteken Kristen” (Konsili Vatikan II, Lumen Gentium [LG], 11). Kerinana erpenuju ku Ekaristi. Seakatan si e la lit si tertunggungen si banci sidatken. Tupung sipan Hosti Sibadia, ersada kita ras keleng ate Jesus, si enggo ngendesken KulaNa i kayu pesilang. Tupung minem kita idur calung si bali e, ersada kita ras Ia si enggo nguseken Dareh, tanda keleng ateNa man banta. Labo kita si erbahan lakon Ekaristi e. Jesus jine si ngelakoken Man-man Paska Siperpudi ras ajar-ajarNa, sope kematenNa: Ia ngendesken diriNa kempak ajar-ajar ibas rupa roti ras anggur ras nuruhsa gelah tetap ngerayaken Ekaristi, subuk pe kenca kematenNa. “Lakokenlah bage, guna peringet-ingeten nandangi Aku” (1Kor11:24).

2. Paksa Ekaristi Itetapken

Itetapken Kristus EKARISTI SIBADIA ibas berngi si perpudi sope Ia mate, “i bas berngina Tuhan Jesus idudurken” (1Kor 11:23), tupung Ia pulung ras ajar-ajarNa i sada loteng i kota Jesusalem ngerayaken Man-man Siperpudi. [1323, 1337-1340]

210 Uga Kristus netapken Ekaristi?

“Sabap i bas Tuhan nari nge kualoken pengajaren si kuendesken man bandu e, e me: maka i bas berngina Tuhan Jesus idudurken, ibuatNa roti. Janah kenca Ia ertoto ngataken bujur man Dibata, icepik-cepikNa roti e, jenari nina, "Enda me kulangKu si ibereken man gunandu. Lakokenlah bage, guna peringet-ingeten nandangi Aku."Bage ka pe kenca dung man, ibuat Jesus calung, jenari nina, "Calung enda me iketen padan si mbaru si isahken alu darehKu. Tep-tep kam minem tare calung e, lakokenlah bage, guna peringet-ingeten nandangi Aku!” (1Kor 11:23-25).
Perkatan-perkatan si idatas e me perkatan pemenan ibas penetapen Ekaristi si nuduhken kai si jadi i ruang loteng tupung Man-man Berngi Siperpudi. Perkatan e isuratken PAULUS. Tuhu la iidahna kejadin e alu langsung alu matana jine, tapi ialokenna idur saksi mata nari. Gereja Pemena nerusken kesemalen Ekaristi sibagi rusia badia ras tetap irayaken wari lepas wari ibas liturgi. 99

211 Uga kin pentingna Ekaristi e man Gereja?

Perayan e me jantung persadan umat Kristen. Ibas Ekaristi GEREJA ndatken pengertin si mbages. [1325]

Jadi kita selaku Gereja labo erkiteken mehuli perbahanenta jine, tah pe perbahan rembang kita reh arah paroki si bali, tapi erkiteken ibas Ekaristi kita ngaloken Kula Kristus ras erkiteken si e reh ipersadana kita ibas Kula Kristus.

(BK, YOUCAT KARO).