EKOLOGI: KAI RAS UGA?

BETLEHEM KETAREN, BERASTAGI

Kata ‘ekologi’ reh idur Junani logos (pemeteh, peruku-ren, ketangkasen) ras oikos (jabu, sangkep nggeluh). Alu ekologi ipebindang me ulih penggermeten kerna sinuan-sinuan, rubia-rubia tah manusia rikutken ras ubungenna ras kegeluhen si  ngepkepsa. Ekologi bage pe ilmu lingkungen, encidahken kerna kegeluhen ibas kerina si nggeluh, jelma ras kegeluhenna.

Adi ngerana kita kerna ekologi genduari enda, tentu cakapta tertuju kempak sura-sura ras pendahin guna pesikap doni si arah pendalanen waktu enggo tambah-tambah burukna, bagi uis si enggo mbelang rigatna. Linur, banjir, kemarau ras perudan si lanai terteka, asap bage pe ijah-ije deleng mbeltuk tentu jadi tanda-tanda si nangkasken maka pertibi enda enggo mumuk. E maka ekologi arus kap ertujun guna pegedangken kegeluhen manusia raduken ras kerina tinepaNa. Guna si e, ibas  ekologi arus kap lit kinibebasen, kiniadilen si erpalasken ukur mehuli nangdangi kerinana tinepa Dibata.

Ndahiken dahin ras usaha gelah banci nggeluh alu terulin, arus ka me ilakoken alu mperdiateken odak budaya, pemeteh-perukuren bage pe kiniteken. Si enda tuhu-tuhu penting rikutken kinata maka i babo kendit enda ijapa pe, manusia lit ibas suku, budaya, kiniteken bage pe ulu ras ulih pertibi si melala ragam ras erbagena.
Sope kita ncakapken kalak, rarasen tah pe persadan iluar dirinta, ulin kap dirinta jine sipesikap guna erbahan perbahanen-perbahanen ibas kita nggeluhken kegeluhenta ibabo pertibi enda. Uga nge kita ibas ndahiken dahinta i tengah juma, i sabah tah pe i kesainta? Uga nge sibaba tempas Gereja, jabu-jabu, paroki, sekolah, karya-karya sosial, gelah reh sikapna erperbahanen kempak lingkungen i sekelewetta nggeluh.

Tole pe, persoalen lingkungen jadi persoalen kegeluhen umat manusia kap. Tupung doni enda tergejap reh mumukna, lit terpuk-terpuk manusia si ngenanami kiniseran lebihen asangken terpuk-terpuk si deban. Negaranta Indonesia enda umpamana tersena selaku ‘pertibi si mehumur tapi rayatna musil’. Bage me pe Taneh Karo Simalem enda, tergejap maka enggo kurang malemna sabap rimo enggo jadi arimo, cina ras tomat kena pinakit keriting ras merari buah kayu pangan jelma pe ilebei ipangani cit-cit piah lanai terbaba kurumah apai ka kutiga. Adi nggit kena erpenulih ku pudi engkai maka perbeben-perbeben enda jadi, tentu jabapna e me erkiteken kita (alu sedar tah lang) enggo ncedai kiniraturen alam, tah alu mbuasa make racun tah pe pupuk kimia, ngegei kiniraturen kegeluhen i kerangen ras si debanna.

Kerina tinepa Dibata itepaNa tentu guna kiniulin manusia subuk ibas paksa si lewat, paksa si genduari bage pe guna paksa si reh. Uga orat nggunaken ulih taneh, sinuan-sinuan tah pe asuh-asuhen la kap banci ipesirang ras orat kegeluhen ibas kiniras-rasen. Si e ngataken kata maka seakatan perlu siukuri kerna nasibta genduari, perlu ka pe sigermeti kerna nasib sinursurta denggo. Adi sitadingken kin taneh tah lau lanai sehat, tentu sinursurta ersumpah pe ibas ukurna nangdangi kita si niakapna la meteh mehuli.

Guna si e, telah-telah bage pe pengajaren arus tetap isusurken guna ngkelengi pertibi kegeluhenta enda. Pendidiken i sekolah-sekolah si genduari teridah terjeng mindahken pemeteh ibas buku nari kempak anak didik, perlu kal itambahi alu ‘aksi-aksi sosial’ guna nempa manusia si bagi manusia. Adi arah ercakap-cakap, arah erlajar dingen arah sekolah jelma se genduari enggo reh pentarna subuk guna pehuli geluhna bage pe ibas ncedai lingkungen kegeluhen, maka arah ercakap-cakap, arah erlajar dingen arah sekolah e ka nge dalan maka seakatan manusia reh beluhna ncari banci ka reh pentarna engkelengi kerina tinepa Dibata.

(BK).

NANDAI SEKELEWET INGANTA TADING JANAH MAKESA ALU TENGTENG

BUDI UTOMO

SEMBI-RING, BERAS-TAGI

Pemenan

Ibas kitab Kejadin maka lit ikataken Dibata maka: ”Demilah janah kuasai doni enda.” Tapi enterem kita ngangkai tenah enda maka alu bage kita banci rate-ate. E maka turah ukur merangap janah pe lit kuan kuan ibas kita: “gundera sala gundera buluh belin kubentur-benturi, kutera kalak kutera, beltekku mbelin kubesuri!.” Tangkas kal, maka alu bage, maka kita labo ngasup ngaloken kai sini itenahken pedah enda man banta.

Siman ukuren ku waktu si enggo lewat kerna pengelakonta.

• Nai sabahta mbue denga siidah nurung,cibet, rangin-angin , gabe , bik ras si debanna si banci jadi gulen ras bengkau;
•  Ibas jumanta melala denga perik si banci man temanta,ia mangani nipe-nipe senuan senuanta .Janah meriah siakap ngidahsa ia reh, janah banci kape sada pertanda wari enggo ben janah kita pe enggo sieteh ersikap sikap mulih ku rumah;
•  Mata lauta enggo reh kitikna janah enggo reh dauhna uluna. Janah deba deba enggo nimpet pe. 
• Musim lego ras udan si lanai siangka katawari rehna,l anai lit siklus si banci kita sieteh katawari rehna;
•  Nai banci sikataken maka Taneh Karo Gugung usurnge lit remang, terutama adi kita mentasi kuta Tongkeh, tempa tempa la lit wari la lit remangna;
•  Las ras bergeh wari si enggo ndauh bedana.

Enda me piga piga perubahen erkiteken pangusna manusia si erkiteken ngakap bana penguasa doni si enggo ibereken Dibata man bana guna nguasisa. E maka kurang nge kita mediate uga jadina sekelewetta.

Jadi kita memang manusia si nipasu-pasu Dibata nguasai doni enda, tapi lit sada si mungkin kita lupa e me kap sada pengelako: BIJAKSANA. (Enterem nge enda jelma pentar, tapi la bijaksana. Tapi adi labo pentar  mesera  ka nge jadi bijaksana.

E maka lit ka nge pedah ngatakenca maka: mbiar  kempak Dibata e mekap pemena kebeluhen. Jadi mbenai sura-sura ibas kegeluhen enda e mekap arah kebeluhen.

Mulihi kita ku temanta ndai, selaku kalak Katolik si erpalas man Dibata maka mari sibayangken inganta tading enda sumpama kuta Doni. Adi lit denga usur sura suranta maka aku nguasiasa, gelah man bangku sisada enggo me kita lepak janah seh kel lepakna. Sabap ijenda lanai bo pernah siukuri ise sapih sapihta. Janah adi kita manusia ersada-arih saja pe gelah kita saja me mahluk Dibata si nggeluh babo kuta Doni enda, enda pe lepak kel.

Jadi mari siukuri lebe menjar anjar kerna pedah Dibata ndai: “Demmilah janah kuasai doni enda.”  Ertina maka kita manusia lit pemeteh ras kuasanta ngendaliken doni enda. Arah pemetehta gelah lit harmoni mahkluk tinepa Dibata sabap e me surga pemena si nibahanna atena. la kap apai pe ateNa sia-sia tinepana . (Siinget sura sura Dibata ibas toto Bapa Kami).

E maka mari ka siukuri kidekah kita enggo erdalan ibas kegeluhenta. Alu nginget kai sienggo berubah ibas jangka waktu si niinget kita. Maka adi sedar kita ibas si e maka lanai ndekahsa kita pasti enggo ngalami kesuliten ibas rehna wari-wari.

Jadi banci siukuri sada peradapenta maka katakenlah mulai era tahun 1985 seh ngasa genduari 2014 uga hebatna enggo perubahen. Lenga dem 30 tahun pe. Janah uga pagi 50 tahun ku lebe enda, kai nari pagi warisennta man anak kempunta? Mungkin jabapta me ukurkenna ka pagi. Tapi tanggung jabapta tetep nge pagi ipindo Dibata. Sedarka kita maka Gerejanta nai-nai nari mereken sada pengertin maka kuta doni enda ndai labo harta warisen tapi harta pinjamen nge man anak ras kempu-kemputa.

Erkiteken si e akap kami lit me piga piga usahanta gelah si e terpelihara, mari kita erlajar segedang geluh (tema APP 2014), bijaksana nggunaken pengalonta pasu-pasu Dibata sini aloken kita. Tukur keperlunta saja, ula sinanggel. Sisampat sampaten ibas kekelengen, ula gelah pagi rutang pusuh teman e ateta. Pehuliken min lit usur bas ukurta gia maun maun mberat njingkangkenca.

Alu bage kuta Doni ndai banci kepe jadi Surga sue ras sura sura Dibata. Genduari banci nge sibenaken la gia mbelangsa denga,ijenda ras paksa enda. Sindalan kenca la mantiman isepe: kam ras aku.(BUS)

LAU: RIKUTKEN HAM RAS KEADILEN KETEREMEN

HILARIUS KEMIT, OFMCAP, JPIC KAPUSIN MEDAN

1. Hak Asasi Manusia

Hak Asasi Manusia e me hak-hak si lit ibas hakikat ras kiniliten manusia selaku mahluk Tuhan Simadakuasa ras jadi pemereNa si arus ihamati, ijujung meganjang ras ikepkep negara, hukum, pemerentah ras tep-tep jelma guna kinihamaten ras pemiaran kehagan manusia. (Pasal 1 ayat (1) UU Nomor 39 Tahun 1999 tentang HAM).

Ibas perkatan e nari banci si datken isina, Hak Asasi Manusia e me hak-hak si jadi sekerajangen manusia ras erkiteken hak-hak e lit maka manusia e ikataken manusia. Hak Asasi Manusia lit labo erpalasken pengkebet manusia e tah pe pengkebet badan/organiasai tah kai gia gelarna ras labo rumusen bagi sinisuraken manusia kerna dirina jine.

Hak Asasi Manusia, adi rikutken kiniteken, emkap pemahamen kerna kai si sue ras peraten Dibata kempak manusia. Sura-sura Tuhan ibas Ia nepa manusia e me gelah manusia nggeluh ertuah dingen sangap. Alu bage, rumusen-rumusen kerna hak asasi manusia, subuk i bidang politik, sosial, budaya, ekonomi ras si debanna arus ibas dalan lako ndatken sarat gelah manusia banci nggeluh ermalem ate.

2. Lau ras HAM

Lau emkap sada si arus lit guna pepantek kegeluhen. Selaku sada si arus lit gelah kegeluhen banci erdalan, maka Lau e bagin hak asasi tep-tep manusia kap. Jadi hak asasi labo erkiteken iaturken ibas sada peraturen tah pe konvensi internasional, tapi terlebih-lebih sabap lau e jadi sada sarat guna manusia banci nggeluh. La lit sada pe manusia i doni enda nggeluh adi la lit lau, bagem pe jadi man si nggeluh si debanna. Erkiteken lau e hak asasi, maka la lit sekalak pe subuk pribadi, lembaga, terpuk-terpuk tah pe negara, si banci meneken tah pe ngurangi hak e. Ras erpalasken litna hak e, multak pe kiniarusen man tep-tep jelma, terpuk-terpuk, lembaga tah pe negara lako ngamati hak tep-tep jelma ndatken lau bersih (to respect), miara ulu-ulu guna keperlun ras-ras (to protect) ras njayam litna lau bersih man kerina tinepa si nggeluh (to fulfill).

Ibas tanggal 28 Juli 2010, PBB enggo netapken lau bersih ras sanitasi jadi Hak Azasi Manusia (HAM). Lau inemen si sehat ras bersih bage pe sanitasi si sikap e me Hak Asasi Manusia si penting ras arus ilitken guna kegeluhen manusia. Gelah kiniliten lau bersih e terjayam ras banci inanami kerina tinepa i doni enda maka iperluken pendahin Negara ibas ngaturkenca gelah kiniarusen-kiniarusen ibas ngamati, miara ras ndemi keperlun lau bersih e banci erdalan salu mehuli.

3. Adil ras Kiniadilen Keteremen

Ercakap kerna keadilen, sicakapken e me kerna sipat/biak manusia si adil. Adil, alu gendek banci kap irumusken sibagi ‘ncibalken kerina ibas innganna sue ras arusna”. Janah pe, kiniadilen sosial lebih-lebih erpenuduh ubungen-hubungen jelma keteremen (interaksi jelma-terpuk-terpuk-lembaga negara) si erperbahanen adil. Interaksi e banci ibas bentuk individu ku individu, individu ku terpuk, individu ku negara, terpuk ku individu, ku Negara, Negara ku individu, ku terpuk, ras seterusna. Kiniadilen sosial nekanken kerna kerina bagin ibas dalam struktur sosial keteremen  e, si ndalanken dahinna sekalak-sekalak gelah biak adil pajek ibas kerina bagin ibas stuktur e. Terlebih-lebih negara, erkiteken kekuasan si iendesken man bana guna ngatur, ibas ia kap kiniarusen si mbelinna guna njayam suasana adil man kerina jelma ras terpuk-terpuk bage pe man kerina jelma i doni.

4. Lau ras Keadilan Sirulo

Ibas lau ras HAM bagi si ituriken idatas, itekanken maka lau e hak asasi manusia hak e maba kiniarusen man tep-tep jelma guna ngamati, njayam ras ndemi keperlun lau bersih man kerina jelma. Penungkunen: Uga kin enggo hak ras kiniarusen e erdalan situhuna?

a) Sue ras lapuren Organisasi Kesehatan Dunia (WHO):

- Kira-kira Sekitar 1,1 miliar kalak langa banci ndatken lau bersih ras 2,4 miliar jelma la ersanitasi si patut ras buen ibas si e nggeluh i Afrika ras Asia;

- Kira-kira 80 persen pinakit i doni (kolera, disentri, hepatitis), jadi erkiteken manusia nggunaken lau si la sehat igunaken;

-Perbedan tingkat ekonomi ibas negara-negara Barat ras Timur, njadiken kinilaadilen si mesangat ibas ndatken lau. I AS, tep-tep jelma nggunaken 158 galon lau tep-tepwari, tapi i Senegal, terjeng 7,6 galon ngenca;

b) Arah penggermeten Walhi, 125 juta (65 persen) penduduk Indonesia tading i Pulau si kapasitas kiniliten launa  4,5 persen ngenca. E maka, 60 ibas 470 ulu ras paleren lau si lit i Indonesia ibas kondisi krisis;

c) Lapuren ibas Harian Kompas ngataken maka 85 persen sumur i Jakarta tercemar bakteri e-coli. Janah 40 persen warga perkotaan ras 30 persen warga pedesaan si enggo tersambung jaringen PAM;

d) Data ras sumber si deban ngataken maka korban erkiteken lit buena kurang lebih 211 juta per tahun. Ibas si e 90 persen korban bencana ibahan lau. Ibas si e 50 persen korban banjir, 28 persen perbahan pinakit si rubungen ras lau, ras 11 persen perbahan kekurangen lau.

e) Lepas ibas data-data si idatas, teptep wari pe kita ngidah, megi ras ngenanami uga buena kelegon i sada ingan, ras banjir i ingan si deban, ras uga sampah-sampah ndemi paleren lau, pembangunen si pekitik ras deba nutup paleren lau belin rsd.

Permasalahen–permasalahen e tangkas nuduhken maka jadi me kinilaadilen sosial ibas ndatken kiniliten lau. Kinilaadilen kerna lau e bagi i ituriken idatas jadi erkiteken gegeh lau la iperdiateken selaku hak ras kiniarusen ras-ras, tapi jadi urusen sekalak-sekalak. Si jadi adi bage kerinana pelebe kepentingenna sekalak-sekalak, erlumba ras rubat. Ulihna, ise si megegeh ia menang. Homo homoni lupus – manusia jadi serigala man manusia si deban.

Perlu pe isuratken, maka: pemena, kiniliten lau labo la ersibar tapi ERSIBAR; Peduaken, lau la banci igancihken alu si deban maka la tertutup kemungkinen lau jadi persoalen si mbelin ibas paksa si pepagin. Sabap lau jadi sarat kegeluhen mesekah ndatkensa ijah ije, maka perubaten ras perang ndatken lau banci jadi ijah ije. E maka banci jadi pagin lau jadi sada si meherga lebihen asang barang si deban.

5. Pengkebet Pemerentah

Nggermeti uga perluna lau guna keterusen kegeluhen kerina si nggeluh ras kemungkinen perubaten jadi me erkiteken la bias lau man kerina jelma, maka enggo patut me tep-tep pemerintah (negara) ertutus ate ngatur ras ngepkep hak teptep rayatna ndatken lau bersih.

Pengelako pemerintah mere kesempaten man pengusaha swasta nguasai ulu-ulu lau guna idayaken ibas bentuk lau kemasen alu privatisasi lau, tuhu-tuhu sada perbahanen si la payo. Alu privatisasi lau e, pemerintah enggo talu ibas paham LAU e me BARANG BINAGA– barang si lit ergana ras mere keuntungen. Kune lau ijadiken barang binaga maka si jadi e me adat tiga. Ras payo me ibas sada paksa lau ergan asangken bensin.... lau jadi perayaken kerina jelma.... lau njadiken bahaya si belinen asangken tsunami.... homo homini lupus: War water.

Sdr. Hilarius Kemit, OFMCap

Staff JPIC Kapusin Medan

Peringeten Wari Lau Sedunia 2011, Isalihken ku Cakap Karo, Betlehem Ketaren.

BAGE ULINA DONI ENDA ITEPA DIBATA

HILARIUS KEMIT, JPIC KAPUSIN MEDAN

Isi doni enda bias man kerina jelma gelah ngeluh mehuli,

Tapi kerina isi doni enda la bias man sekalak jelma si merangap

Peken Pardis

“Turahlah ibas taneh nari kerina sinuan-sinuan, e me, dukut-dukut si erbuah, kayu si erbuah si lit sinuanna i bas buahna.....  lit lah erbage-bage macam mahkluk si nggeluh ndemi lau ras erbage-bage perik ndemi awang-awang.... jadilah bas taneh nari kerina erbage rubia-rubia si nggeluh: kerina erbage asuh-asuhen ras kerina rubia-rubia si meliar, si galang ras si kitik.... sijadikenlah manusia si sentudu ras tempasta, si menam seri ras kita, gelah ikuasaina kerina nurung, perik-perik, bage pe kerina asuh-asuhen, ras rubia-rubia si meliar, seri ras si galang ras si kitik... Emaka ibahan Tuhan Dibata sada taman i Eden, janah i je me itamakenna manusia si enggo ijadikenNa e guna ngusahai ras njagaisa..........”.

Turi-turin kerna Peken Pardis ncidahken uga sura-sura Dibata kerna Doni ras kerina isina si nasa lit, e me kap ngeluh ibas dame. Nabi Jesaya nuriken uga ulina kegeluhen ibas doni enda si dem ibas dame ras sada penggejapen (harmonis),

“serigala ras biri-biri ngeluh ras-ras alu dame, anak lembu ngga-gat ras anak singa, danak-danak kitik si mpermakanisa. Lembu ras beruang  ngagat ras-ras, anak-anakna pe ras medem-medem... anak si kitik denga la kena kai pe, aminna erguro-guro pe ia deherken nipe si erbisa...”.

Nabi Jesaya ncidahken uga ulina kegeluhen ibabo doni enda, kerinana banci rembak ras ersada, sada ku si debanna la lit sicianen, kerinana banci ngeluh rembak ras erjagar-jagar. Kerina si itepa Dibata muat bagin ibas Peken Pardis si njadiken sada perpulungen tah pe runggun si igelari ekosistem.  Adi siertiken kai kin ekosistem e, e me kap ibas kata eko ras kata system. Eko ibas kata Oikos nari (Junani), ertina e me kap ingan tading, jabu, rumah. System ertina e me kap sada persadaan si jadi alu erbage-bage bagi janah kerina bagin enda sikandit-kanditen sapih-sapih ia. E maka ekosistem banci siantusi e me kap kerna sada rumah, janah ibas rumah e lit erbage-bage bagin, janah bagin bagin enda sikandit-kanditen, janah kerinana lit gunana erbahansa jadi sada persadan.

Antusen ekosistem e banci ka nge siban andingen ras sada lereng tah pe gereta angin. Sada lereng ikataken lereng perbahan kerina si lit ibas lereng e, e me kap bagin-bagin si galang ras si kitik, kerinana erdahin alu mehuli. Bagin-bagin e me kap, lit banna, bas ban e pe lit lengkarna, lit ka jari-jarina, lit ban dalamna ras ban luarna janah la ketadingen pintil na. I tengah-tengah jari-jari lereng e lit sada si igelari poros janah i tengah-tengah poros e lit mimis. E maka lit ka segiteluna, lit stang, lit rantai ras dayung-dayungna, ras si debanna. Kerinana bagin bagin enda muat bagin ibas sada persadaan si ikataken gelarna lereng. Ibas persadan enda, rantai e la banci ngataken maka ia me siperluna asangken mimis e, tah pe dayung-dayung e, ngatakan maka ia sipentingna asangken pintil e. Kerinana erguna janah kerinana muat bagin ibas persadan e. Adi la lit pintil tah pe mimis maka la banci ikataken jadi sada lereng si mehuli. Bage ka pe ibas sada ekosistem kerinana lit gunana erbahansa jadi sada persadan.

Peken Pardis bali ras sada ekosistem. Ibas Peken e lit erbage-bage si itepa Dibata, lit suan-suanen, lit batang kayu ras kerangen, lit perik-perik ras rubia-rubia, bage pe ras si debanna, janah la ketadingen ras jelma. Kerina bagin-bagin si tading bas Peken Pardis enda sikandit-kanditen kap. Sada ku si debanna sisangket-sangketten.

Manusia Idilo Ngusahai ras Njagai Peken Pardis

Manusia si itepa Dibata dem ibas pemeteh ras banci rukur, i tamaken Tuhan i Peken Pardis e gelah banci iusahaina ras ijagaina. “.... E maka ibahan Tuhan Dibata sada taman i Pardis, janah i je me itamakenna manusia si enggo ijadikenNa e guna ngusahai ras njagaisa....”.   Kerina si itepa Dibata iberekenna man manusia gelah manusia banci ngeluh metunggung ras sentudu ras peraten Dibata.

Kai ertina ngusahai ras njagai Peken Pardis? Ngusahai ras njagai Peken Pardis e maksudna labo gelah iate-ate manusia kempak kerina si debanna, tapi gelah manusia ngusahaken ras njagai gelah kerina si itepa Dibata e tetap mehuli ibas sada rakuten ras dame, banci ijaga keseimbangen sapih-sapih tinepa Dibata janah sada ku si debanna sisangketten. Manusia la banci ngataken ma ia me sipentingna asangken bulung-bulung si meratah tah pe asangken perik-perik si kabang. Manusia e me kap sada bagin ngenca ibas kerina bagin si ersada ibas Peken Pardis e. Kerina bagin e lit gunana janah kerina bagin e sisangkuten sada ku si debanna.

Santo Fransiskus i Assisi nari tuhu-tuhu ngejapken kesadanna ras kerina tinepa Dibata si debanna. Igejapkenna maka kerinana rehna ibas Dibata Bapa nari. Bapa Si Sada e kap sinepa kerinana janah bas Ia nari kap rehna kerinana. E maka kerinana kita, bage pe ras rubia-rubia, ras dukut-dukut tah pe batang kayu, lau, perik, batu, langit ras embun ras kerina si lit bas doni enda, ersenina ras erturang kap,  sabap kita kerina bas Bapa Si Sada e nari kap rehna. Sada kap Bapanta. Teridah maka Fransiskus tuhu-tuhu encidahken kehamaten man kerinana. Labo alu bage maka Fransiskus lanai man nakan tah pe man nurung, tapi Fransiskus nuduhken sada kehamaten man kerina rubia-rubia, kemahaten man kerina sinuan-sinuan ras si debanna. Ietehna ersentabi adikin perlu ia man nurung janah ietehna ngataken bujur dung ipanna gadung e, sabab igejapkenna maka ia la tersirangken ras si debanna. Bage pe nini nininta nai, ilakokenna nge persentabin ope denga ia nuan page janah lawes ia rani. Iban nini bulangta nai nge persentabin ope denga itektekna batang kayu e guna erbahan sapo ia ras si debanna. Siinget denga nge maka piga-piga inganen ikeramatken nini nininta nai, lit mata lau, lit kerangen, lit batu galang tah pe batang kayu si galang ras si debanna. Kerinana enda guna njaga keseimbangen, gelahna sada ras si debanna tetap ersada ibas dame. Enda me si igelari keadilen ekologis. Manusia mereken kehamaten man manusia si deban ras man kerina tinepa Dibata si debanna.  Ije me teridah kerna kai siikatekan Mahatma Gandhi,  isi doni enda bias man kerina jelma gelah ngeluh mehuli, la kurang kai pe, tapi kerina isi doni enda la bias man sekalak jelma si merangap.

Manusia Merangap

Kepentaren, kinibeluhen ras kengasupen rukur si ibereken Dibata man jelma si itepaNa la ipakena guna ngusahaken ras njagai Peken Pardis e gelah tetap mehuli bagi sada ekosistem. Manusia atena jadi raja, ngerajai si debanna. Aku me si pentingna nina manusia janah kerina si debana arus runduk man bana. Manusia lupa maka ia sada bagin saja kap si tuhuna ibabo kerina tinepa Dibata, manusia jadi dibata si ngaturken si debanna bali ras sura-surana saja. Lanai iperdiateken manusia kerna Peken Pardis e janah lanai iinget manusia uga maka ia idilo guna ngusahai janah njagai Peken Pardis e. Manusia merangap, janah rangap enda me dosa asal ndube si tetap lit ibas kinijelmanta sekalak-sekalak.

Sapih-sapih manusia e pe dungna sicianen ate, kerinana erlomba-lomba jadi dibata. Manusia erlumba-lumba erban rumahna sigalangna, erlumba-lumba puna taneh sibelangna ibabo doni enda, puna kinibayaken sila erkira-kira gelah banci kerina kalak mehamat man bana. Homo homini lupus nina filsuf Thomas Hobbes, sekalak manusia jadi serigala kempak manusia si debanna. Janah guna si e kerinana, tinepa Dibata si deban e jadi tumbal na. Belang-belang kerangen itabahi, uruk-uruk iperata janah kelbung-kelbung itambusi. Manusia erlumba-lumba muati kai si nasa lit iteruh taneh, si lit i babo taneh ras nangkapi kai si lit i langit. Manusia erlumba-lumba pepulung ertana janah lanai ngukuri jelma si deban  ras la ngukuri kerna uga pepagi kecibalen doni enda.

Perbahanen-perbahanen manusia si la mehamat ras la mehuli kempak tinepa si deban e erbuahken kiniseran ras kematen. Kerangen i tabahi piah rusur reh lau galang mombakken si nasa lit si ikelewatina. Rubia-rubia lanai lit inganna i kerangan, piah reh ku kuta ndarami nakan janah rubati ras manusia. Si ku juma ku rumah, si mulih karaben pe lanai tehna ndingan mejile nuan page, sabap lanai itehna ndigan wari perudan janah ndigan wari perlego. Wari enggo reh murdena. Rusur sinanami maka reh perlenggo bage dekahna janah i kuta si deban lalap ka udan.  Si beluh niktik wari pe enggo kemamangen atena sabap lanai banci itiktik wari erdandanken perdalanen bulan ras matawari.

Pengelako Manusia Sigundari

Pemeteh manusia si iberekan Dibata gelah banci ngusahaken ras njagai Peken Pardis e, la ipakeken manusia bali ras sura-sura Dibata. Manusia ncedai doni enda, encedai jabuna, encedai inganna ngeluh, encedai inganna encari, encedai  kegeluhen kempu-kempuna pepagin, sabap kai si lit si gundari banci jadi lanai pepagin  iidah ras inanami kempu-kempuna. Doni si enggo murde ras si enggo ceda, e me pepagi jadi tading-tadingen man kempu-kempuna.

“Penakit citcit buah” sada contoh uga pengelako manusia i Tanah Karo Simalem  ncidahken uga merangapna kita genduari. Citcit buah labo penakit, tapi e me buah pengelako manusia si la njaga doni enda alu mehuli ras mehamat. E maka labo lit tambar citcit buah. Persoalen citcit buah nuduhken man banta uga enggo murdena “ekosistem” pertanin i Tanah Karo. Taneh ras kerina sinuan-sinuan enggo i putasi. Putas gunana mbunuh, e maka kerina mate. Adi siperdiatekan, pengelako mputasi taneh ras sinuan sinuan e, maka mbue zat tah pe mahluk si erguna ikut mate.

Ibas sada kesempaten, kuikuti kursus pertanian ekologis i Bangkok-Thailand. Sanga si e isuruh me kami ndurung i bulung page i sabah. Dung ndurung ndai, kutungtungken me kai sikudat i das sada papat. Erbage-bage kuat, lit nipe-nipe, lit kaba-kaba, ras si debanna buena 13 erbage. E maka isuruh me aku nerapken apai kin hama (encedai) ras apa predator (si man si encedai). Ibas 13 erbage ndai, lit 4 hama janah 9 si debanna predator kap. E maka idat sada kesimpulen, maka adi sipediat pe situhuna labo ndecai page e, tapi adi sisemprot page e alu putas maka kerinana mate. Bage me pengelakonta i Tanah Karo si encedai taneh ras sinuan-sinuanta. Kerina erlumba ndarami putas simersikna ras si mergana. Bage pe pengelako uga maka sinuan-sinuan e pedas erbuah tas tasak, taneh e pe ikut ikarbit ras ipaksa. Mental instant nina sigundari, e me erbahanca kita perjuma-juma reh cedana. Taneh inganta ernuan nuan ras encari sicedai. Enda me si ikateken “ketidakadilen ekolo-gis”.

Kai me banci siban?

Pengelakonta si enggo semal negai taneh ras suan-suanenta alu putas ras si debanna e arus i pengadi. La lit dalan si deban adi kin atenta pepulih kerna Tanah Karo Simalem jadi tuhu-tuhu malem atenta tading i je. Uga carana? Inget pedah-pedah nininta nai, tuduhken kehamaten ras kehulin ukur man doni enda. Doni enda me jabunta, doni enda me inganta encari, doni enda nge inganta erdahin ras si debanna. Ula sicedai... pengelakonta simputas taneh ras sinuan-sinuanta seh gundari, e me kap sada pengelako “bunuh diri massal secara perlahan” nina. Langa bo melawensa,  cidahken atenta keleng kempak kempu-kempunta alu kekelengen kempak doni enda. Mejuah-juah.