SAKRAMEN IBAS GEREJA KATOLIK

Sakramen-sakramen Gereja ipantekken lako nerusken pendahin penebusen Dibata rikutken paksa-paksana kegeluhenta. Ibas tep-tep perayan sakramen kita ngadep kempak Bapa erkelangken Jesus ibas Kesah Sibadia. 

E maka lit pe palas ras tempas kegeluhen liturgis Gereja, e me kap:

1.    Kula Kristus ibas ibadat;

2.    Rusia Paska;

3.    Perayan Rusia kiniteken Gereja.

Kerehenta ras pengelakonta ibas ibadat e me kap tanda kiniersadan Gereja

erpalasken ras ertampukken Kula Kristus ibas paksa ertoto. E maka

metungung me adi tep-tep lakon liturgi irayaken ibas kiniras-rasen ibas

persadan kalak si erkiniteken. Ibas sekalak-sekalak kita notoken Ibadat

Segedang Sada Wari jine situhuna kita perlu kiniras-rasen,  erkiteken

pertoton e erpalasken Kula Kristus, maka erguna me dingen nehken

kiniulin man kerina Gereja ibas rarasen persadanna.

Tep-tep perayan-perayan sakramen e me kap lakon kerna Rusia Paska.

Ikataken Rusia sabap perbahanen lako perumah tendi Bapa, Anak ras Kesah

tangkas teridah ibas diri uskup, malim, diakon bage pe ibas umat si

erkiniteken. Rusia e jine iperanggut ku kejadin Paska, sabap kerina si

icakapken lako iberitaken erpalasken ku kematen Jesus kempak dosa ras

kekekenNa ku kegeluhen si tetap ras Dibata. E maka si niarapken, maka

kita pe mate nangdangi dosa ras keke kempak kegeluhen si mbaru lako

nggeluhken pertendin Dibata ibas tep-tep perayan sakramen e.

Nggermeti lakon sakramen selaku perayan, e me pendahin penebusen ija

kerina kalak si erpengendes ibas kiniteken arus muat bagin raduken ras

kalak si badia. Liturgi i babo pertibi iperanggut ras liturgi i surga

raduken Maria si sokeliamen ras badia, malekat-malekat ras kerina kalak

si badia, sabap ibas persadanta ras Jesus Kristus e, kerina erpengala

ras erpenuju kempak Bapa ibas Kesah Sibadia. E maka sirayaken me

pendahin penebusen Dibata e ibas keriahen dingen lako pegeluhkensa ibas

kegeluhen sakramen-sakramen  ibas persadan umat kekelengen Dibata si dem

kekelengen, kiniteken ras arapen.

Kai kin Sakramen e?

Sakramen e me tanda si ergegeh ras erguna si erbuahken berkat ras pasu-pasu dingen nehken kegeluhen pertendin kedibatan man banta janah itetapken Kristus selaku tading-tadingen man Gereja selaku penadingNa. Pengelakon si teridah alu uga sakramen i irayaken, ngelitken janah nehken pemere, dingen si e lit ibas tep-tep sakramen. E maka man umat si erkiniteken si ngaloken pemere e alu pusuh si erlayas maka sikap ka me ulihna sialoken.

Uga Kesah Sibadia Iperakut Ras Sakramen?

Ibas liturgi me Kesah Sibadia nempa kiniteken umat Dibata janah ngelakoken pendahin-pendahin si mbelin ras mehaga ibas Dibata nari, e me sakramen Padan Simbaru. Kinitedehen kerna pendahin Kesah Dibata e turah ibas diri Gereja eme gelah kegeluhenta iperakut ras kegeluhen Kristus si enggo keke. Ibas Ia ndapeti ibas kita jabap “ue” si ipeturahNa jine, maka seh me paksana lako nggeluh sada arih sada odak, e me liturgi si jadi kegeluhen ras Kesah Sibadia ras Gereja.

Kai Si Nilakoken Kristus ibas Sakramen?

Sakramen-sakramen si irayaken alu metunggung ras ibas kiniteken, mereken pasu-pasu sue ras si niikataken. Kalak si ngerayaken sakramen jadi ergegeh ras erguna sabap Kristus jine si lit dingen erdahin ibas dirina; Ia jine si mperidiken ia, Ia jine si reh dingen ngelaken sakramen-sakramenNa, nehken berkat ras pasu-pasu bagi si lit ibas sakaramen e. Dibata Bapa megiken ras ngueken pertoton Gereja AnakNa, si ngakuken kinitekenna kerna gegeh ras kuasa Kesah Sibadia ibas pertoton epiklese e me pertoton guna nusurna Kesah Sibadia lako nggemgemi tep-tep sakramen. Api si erbahan gurlah ranting raduken minak, bagem me Kesah Sibadia nalihken kerina si reh dingen ngadep man BaNa ku kegeluhen erpalasken gegeh Dibata.

Piga Kin Sakramen Ibas Gerejanta? 

  

Lit pitu sakramen ibas Gerejanta, e me: Peridin, Krisma, Ekaristi, Pengakun Dosa, Perminaken Kalak Sakit, Imamat ras Perjabun. Kerina sakramen e, e me pemere si ialoken kita ibas tep-tep kejadin-kejadin si penting ibas kegeluhen ras kinitekenta. Tupung kita ibas kinitekenta “danak-danak” denga, sialoken me pasu-pasu peridin si ergegeh dingen erguna lako ngaloken kita jadi anak Dibata. Tupung kita ras kinitekenta enggo mbelin, sialoken ka pasu-pasu lako pegegehken janah kenca kita ras kinitekenta enggo parang, ergegeh dingen ngasup me kita milih erjabu: alu ngaloken pasu-pasu idur sakramen perjabun, tah pe milih lako jadi malim: alu ngaloken pasu-pasu idur sakramen imamat. Ibas ngaluri kegeluhen, man banta pe ibere bekal, e me kiniersadan ras Gereja bage pe ras Dibata jine alu sakramen Ekaristi ras sakramen Pengampunen Dosa kune kita ndabuh. Ras ibas paksa kita la ergegeh nari, man banta pe isehken sakramen Perminaken Kalak Sakit e me pemere lako pegegehken ras lako pepalemken.

Engkai Maka Pitu Sakramen Ibas Gerejanta?

Ibas bena-bena abad pe-12-ken, Pietro Lombardo ngataken maka lit pitu bilangen sakramen. Bernardus ngataken maka melala bilangen sakramen, tapi tupung ia kotbah bas Man-man Sibadia, ipilihna maka Peridin, Ekaristi ras Mburihi Nahe me jadi sakramen.

Arnoldus i Cambia nari pe ngataken maka Mburihi Nahe patut jadi sakramen alu ngumpamakensa bali ras Peridin. Ugo San Vittoria ngataken maka seakatan Peridin, Krisma ras Ekaristi maka Kata Sibadia bage pe Pasu-pasu erbage Perkakas termasuk sakramen, umpamana lau Sibadia, Pendampelen Abu, Pemasu-masun Cabang Saitun ras sidebanna.

Algero Legi ngataken maka Peridin, Ekaristi, Minak Sibadia me sakramen, tapi alu merambo-rambo ia pe ngakui Penangkuhen Malim ras Pengakun Dosa pe bagin sakramen. Ermannus ngajarken maka lima ngenca bilangen sakramen, eme Peridin, Krisma, Ekaristi, Perminaken Kalak Sakit, dan Perjabun. E maka seh ku perpudi abad pe-12-ken lenga erketetapen piga bilangen sakramen sThomas Aquinas ngataken maka lit pitu bilangen sakramen sabap si pitu e jine lit ibas rakuten si bali pentingna lako keselamaten. Thomas Aquinas nentuken bilangen sakramen e rikut ras paksa-paksa si penting ibas diri sekalak-sekalak jelma, erbena ibas ketubuhen, paksa tambah ku belinna, parang seh ku paksa metuana jelma. E maka si pitu sakramen e bagi si iajarken Thomas e me pitu sakramen bagi si nitandai kita ibas paksa genduari enda. Gia ikataken Thomas maka kerina sakramen bali pentingna, i ajine ngakui maka sakramen Ekaristi me si mbelinna ibas kerina sakramen e sabap ibas sakramen Ekaristi me lit ras ringan alu kuh diri Kristus jine, ras kerina sakramen e patur me erpengala ras nuju ku sakaramen Ekaristi selaku tampukna. E maka kerina sakramen tentu reh tunggungna adi iperanggut ras sakramen Ekaristi.

Betlehem Ketaren

TAKTAK RAS CIBAL LILIN IBAS PERAYAN EKARISTI

Erbage-bage Lilin Ibas Perayan Liturgi

Lit piga-piga lilin si nipake ibas perayan Ekaristi, janah si pentingna guna lako e,  e me kap:

1.   Lilin Altar. Semalna ipake ibas peraraken janah lilin e me si nitamaken ku sekelewet altar. Maun-maun lit ka si nitamaken ku deher mimbar, tapi si enda labo penting kal;

2.   Lilin Paska. Ipake ibas perayan Paska ntah pe ibas liturgi tah pe sakramentali tertentu;

3.  Lilin Adven. Empat lilin ipake guna lengkaren Adven (Corona Adven) lako ngingetken kerna empat minggu dekahna masa ertima ibas Adven. Kesemalen erbahan lengkaren Adven  erbena ibas lakon devosional, e me lakon guna petangkasken kiniteken umat i rumah-rumah. E maka labo lit denga aturen tah pe ketetapen kerna kiniarusen erbahan lengkaren Adven ibas paksa Adven.

Antusen Lilin ibas lakon/perayan kiniteken

1.    Lilin Paska. Lilin Paska e me kap tanda kerna Kristus jine si jadi terang doni. Lilin Paska ibahan ibas curak-curak ertanda-tanda, lako nangkasken kerna antusen Kristus jine. Bage gia lilin Paska ipakeken ka ibas perayan Berngi Paska bage pe ibas kidekah paksa Paska, ibas missa guna kalak mate ras ibas liturgi peridin.

2.    Lilin Adven. Lilin-lilin Adven arus iantusi ibas kesadan lengkaren Adven, e me kap si jadi tanda kemenangen ras kemulian, tanda kinikuhen kerina paksa, kiniersadan ibas ketubuhen ras kerehen Kristus mulihi ibas paksa si pepagin. Lilin-lilin ibas lengkaren Adven ipegara ibas tep-tep Minggu Adven, encidahken sada pengarapen ras ketedehen umat nangdangi penebusen umat manusia ibas pendahin Jesus Kristus.

3.    Lilin Altar ras Lilin Pengaraken, e me kap lilin si isamping Tabelnakel, e me si jadi tanda Tuhan ringan ras tading  i rumahNa, jadi persinget man banta kerna paksana ertoto ras ercakap-cakap ras Dibata bage pe guna keriahen ibas erliturgi (PUMR 117, 307).

Hukum Musa jine enggo petangkasken maka “Terang” e me si jadi tanda kiniliten ras kerehen

Dibata. E maka inganna ibahan ibas tenda bage pe ibas Rumah Pertoton alu curak lampu

bage pe lilin ibas pitu cabang (Kel 25:31-40; 27:20).

Rupa Lilin Arus Mbentar

Lilin-lilin si nipake ibas perayan liturgi semalna rupana mbentar. Alu bage rupa lilin enda labo arus sentudu ras paken liturgi si nipake peminpin liturgi. Rupa si mbentar e, e me rupa kekeken ras kemulian si sentudu ras rupa uis altar. Makeken rupa-rupa si pelain (lebih-lebih lako lengkaren Adven enda labo irarang).

Kerna Buena Lilin

Buena lilin ibas perayan liturgi, si perluna kal e me kap guna lilin-lilin guna altar. La banci lang ipesikap min dua lilin guna altar (PUMR 117). Bage gia arus siinget maka makeken lilin si melala labo usur ncidahken kinibayaken liturgi, apai ka adi lilin-lilin si nipake e, labo ibas inganna labo lit antusenna tah pe maun la ipegara.

Ibas PUMR 117, lit ikataken maka buena lilin lit empat tah pe enem lako nambahi keriahen missa, lebih-lebih ibas wari Minggu ras wari Raya. Janah adi Uskup Diosesan maba missa ibas keuskupen banci ipasang pitu lilin.

Ibas kesemalen kiniteken kalak Israel, api ipegejapken jadi tanda kerehen ras perbahanen Dibata nangdangi umatNa (terlebih-lebih lako mperingeti kepulahen kalak Israel i Mesir nari). Ibas perdalanen sejarah keselamaten, kerehen ras perbahanen Dibata tuhu-tuhu teridah tangkas ibas kekeken Kristus, si enda teridah alu tanda lilin si mehaga ras galang e me kap lilin Paska si jadi tanda lako Kristus jine.

Ibas liturgi Berngi Paska lilin-lilin si kitik tah pe lilin umat, ipegara ibas lilin Paska nari ncidahken maka terang ras sinalsal Kristus sipepaler man kerina umatNa. Bage me lilin si ersinalsal e jadi tanda Kristus rikutken ras KataNa jadi terang ras ketuhu-tuhun sireh dingen ringan lako kerina umatNa.

Hendri Sitepu, S.Sos.

ERDOSA ERKITEKEN DILAH

Ise kin si erpengakap maka ia kalak si ragama? Adi la ijagana dilahna sia-sia me ia eragama e, janah itipuna dirina (Jak. 1:26).          

Ise kin si la ersalah erkiteken perkatanna, ia me kalak si serta si ngasup ngaturken kerina anggota badanna. Megati si idah kalak namaken sangam ibas babah kuda, gelah ia ngikutken kai sinikataken perkuda-kuda. Alu sangam e itama,  kuda pe banci erdalin ras erdahin rikutken sura-sura si si mada kuda. Nehenlah pe kapal-kapal, gia galang kapal e, ras galang ka ombak si atena ngole-ngolekensa, tapi banci erdalan mehuli rikutken sura-sura si mabasa, erkiteken lit putar-putarna, gia kitik tapi mbelin kal ertina.

Bagem pe dilah, gia ia anggota badan si kitik biakna, tapi erkiteken perasatna banci jadi ipegalangna perkara si kitik, apai ka perkara si galang. Bagi sada nakan colok si ngkernepken sada kerangen, bagem pe dilahta ngasup maba badanta kerina ku api neraka si gularah la erngadi-ngadi.

Kerina rubia-rubia subuk si kiam-kiam ba gepe si nggarang, binurung-binurung si nggeluh i lau kerinana banci ipelemuk alu diajari erkelangken dilah manusia, tapi sekalak jelma pe la mesunah akapsa pelemuk dilahna jine. dilah meliar liaren asang linggarung, dilah erbisa, bisana gegehen asa bisa nipe upar. Tapi arah dilah e ka me kita muji Tuhan, janah erkelangken dilah si nipuji kita me kita itepa sue ras tempasNa, janah arah dilah si e ka me kita ncekuraki, numpahi tah pe ngisakken temanta manusia si ia pe itepa sentudu ras tempasNa.

Dilah si Ercabang

Sekalak malim galang-galang i ingan medemna nimai kerehen malekat si ngelegi ia. Dilahna si ercabang enggo ngelketti geluh ras perbahanenna. Tupung si e reh ka me sekalak diberu, si ia me ndube mabai malim e melket gelarna, tapi metedeh gelah jera. “Pastor, erkadiola aku kerna dosa-dosangku, enggo kubahan melket gelar ras geluhndu!, …katakenlah kai si arus kubahan?” nina alu iluh si erdire-dire mambur seh ku tentenna.

               
Itarik malim e bantal si jadi kalanguluna iteruh takalna si enggo kote, ras isehkenna man diberu e, nina: “Laweslah ku menara gereja, bukalah bantal enda ras kuseken kerina mbulu ndrapati si lit ibas!”.

            
Diberu e ndalanken kai si nipedahkenna. Angin si rembus minter maba mbulu-mbulu e marpar merap ku kerina desa. E maka mulihken ka me diberu e ndahi malimna.

“Gundari pepulunglah kerina mbulu nderapati si enggo marpar merap e janah masukken mulihi kurung ku bantal!. “Tapi pastor, uga kubahan”, nina diberu e. “Enggo ipemerap angin ku sebelang-belang ingan.

            
“Bagem pe, lanai banci iulihkenndu mulihi gelarku si enggo ipemelket ras si nikisamkenndu!”, nina si malim.  

Kalak Sepanyol ngataken:Ise si nehken berita bual bandu, ia pe tentu nehken kujah-kuje maka kam perbual kap. Kalak Italia ngataken: Dilah la ertulan, tapi banci nggetemken tulan-tulanndu!. Kalak Cina pe ngataken: Tuhan nepa dua pinggel manusia janah sada ngenca babah itepana. E maka engkai maka la kita dua kali ndengkehken sope melala ngeranai?. St. Karmilus de Lelis ngataken: Rukurlah alu benar, Ngeranalah alu benar ras Erlagulalah alu benar. Teluna enda me, si alu perkuah ate Dibata mabai manusia ku surga!

Uga jadina Adi Jesus La Njagai DilahNa?

            
Nangdangi Wari Raya Paska, ilakoken me sada derama si mbelin kerna kegeluhen Jesus sope denga ia ngenanami kiniseran, mate janah keke. Tupung seh ku turi-turin perjumpan Jesus ras Sakius, jadi me bagenda:

            
Umat salu ras-ras muat batang kayu ras namakensa i kesain gereja. Tupung ibenaken lakon derama, Sakius nangkih batang e, tapi erkiteken batang kayu e galang ras la mbages batangna isuanken, maka iembus angin menam-menam mbulak me atena. Mbiar kal Sakius ras idakepna batang kayu e asa gegehna ras matana pe menam-menam ndarat perbahan biarna. Si turin ajar-ajar ras turin Jesus ras kalak si enterem enggo gugup i teruh batang kayu e. “E Sakius galang mata, nusur ko!” Ngilas kal ate Sakius sabab ikataken si galang mata, tempa-tempa ipebali ras nurung belang mata, maka la ia nggit nusur. E maka merawa si turin Jesus ras iugur-ugurna batang kayu e. “Engkai ko maka la megiken kata Sakius, mate atem…”, nina ka alu ipegalangna ka matana. Maka ibas wari si e, nakan tasak si enggo sikap irumah turin Sakius lanai surung ipan turin Jesus ras turin ajar-ajarna. Em Adi Jesus la ngasup njaga dilahna.

SANTO PETRUS LOUIS CHANEL

St. Petrus Chanel tubuh i deher kuta Belley i Prancis ibas tahun 1803. Sanga ia nguda denga ibahan orangtuana ia ermakan biri-biri jadi lako jabatna. Amina gia geluhna mesera, dekahen i mbalbal asangken itengah-tengah jelma si enterem, banci ikataken ia sekalak si pentar dingen bujur: bagi batu permata ibas kubang, erdilap-ndilap tupung iparpari matawari.

            

Ibas sada wari, sekalak malim paroki si mediate, jumpa ras Petrus. Kenca malim e ngidah kebujuren ras kepentaren Petrus maka erburak ukurna, maka ia enggo ngidah permata ibas diri Petrus. E maka idahina orangtua Petrus lako mabasa gelah isekolahken.

            

Ibas sekolah si idalanina seh ku Seminari pe, Petrus erlajar alu tutus. E maka seh me Petrus itangkuhken jadi sekalak malim ras itetapken ia erdahin ibas sada paroki si kitik dingen kurang denga umatna. Pastor Petrus Chanel e me sekalak pastor si tutus ertoto ras nggeluh idur pengarapen ras kekelengen. Ia bujur ras mediate man tep-tep jelma, e maka telu tahun denga pe pastor e erdahin i paroki, enggo teridah ulih perbahanenna si nigejapken umat i parokina. Enterem umat mulihi erkeleng ate nangdangi Jesus ras Gereja, ras ncidahkensa ibas perbahanenna asa gegeh ras ukurna lit.

            

Ibas pusuhna si mbages, St. Petrus ersura-sura jadi sekalak missionaris, emaka ipersadana me bana ras ordo religius serikat Mario (missionaris-missionaris Maria), erpalasken kinitedehen ate ras arapenna gelah ia ipake pebelangken Berita Siberiah kempak kalak si langa erkiniteken man Tuhan.

            

Piga-piga tahun kenca si e, seh me bagi si  nisuraken Petrus Chanel, ija ia ras piga-piga temanna sada rarasen ibas missionaris Maria i utus ku pulau-pulau i Lauten Fasifik. Pastor Chanel ras sekalak bruder itama erdahin i pulau Futuna, janah i pulau pe enterem kalak si ermeriah ukur ngalo-ngalo ia bage pe ibas megiken pengajaren ras kotbahna. ”Mbelin kal kekelengen pastor ras bruder e man banta!”, bagem nina rusur kalak Futuna, ngalo-ngalo kai si nisehken pastor ras bruder e, bage natap-natapsa si nidalanken missionaris e ibas geluhna.

            

Bage gia, erkiteken cian ate pengulu suku Futuna, sanga anak pengulu e iperidiken pastor Petrus, gara me pusuhna,murta pengulu e janah isuruhna me tantera-tanterana lako munuh pastor e.

            

Sanga pastor e ibunuh janah tupung nangdangi peltep kesahna, ersumekah ia, nina: ”Aku lit ibas kejuah-juahen me!”. Tanggal 28 April 1841 e me wari kematen pastor Petrus Chanel. Kematenna nadingken kekeken semangat kerina kalak Futuna, e maka kerina e bengket jadi kalak keristen si tutus.

            

Ibas tahun 1954, lebih seratus tahun kenca kematenna, pastor Petrus Chanel itabalken  paus Pius XII jadi sekalak Santo alu gelar St. Petrus Louis Chanel. ”Tedeh ateku ras erpengarapen aku ikut muat bagin pebelangken Berita Simeriah!”, e me tading-tadingen si nitadingken St. Petrus Louis Chanel man banta kerina, terlebih-lebih man kalak si erkemalangen man bana dingen si nabalken gelarna jadi gelar peridinna tah pe gelar pengepkep lingkungen tah pe stasi  bagepe kalak si ertoto ras ia kempak Dibata.

Hendri Sitepu, S.Sos., Katekis Paroki St. Fransiskus Asisi Berastagi.

WARI MINGGU: WARI NGERAYAKEN RUSIA PASKA

Wari minggu e me kap wari si pematang iba geluh kalak Kristen. Engkai? Erkiteken bagi nina kalak Portugis wari minggu e me Domingo, tah pe nina kalak Latin nina Dominus, wari Minggu e me kap wari Tuhan!. Ibas wari Minggu me Tuhan keke idur kematenna nari, janah wari kekekenna e igelari wari paska. E maka tep-tep wari minggu, umat Kristen pulung ras erliturgi lako ngerayaken rusia paska Kristus.

            

Ndiganai mulai kalak Kristen erminggu tep-tep wari Minggu? Kesemalen kalak Kristen pulung ibas wari Minggu megati kal isingetken ibas Pustaka Sibadia. St. Paulus ibas 1Kor 16:1-2 nuriken maka kalak Kristen tep-tep wari Minggu pulung. Bage pe Perb 20:7-12 nuriken kecibalen perpulungen i Troas “ibas pemenan wari Minggu e”.Perpulungen pulung lako ncepik-cepik roti, bagem isuratken ibas Pustaka Sibadia janah perkatan ncepik-cepik roti e ngataken kata maka ibas wari ilakoken me perayan Ekaristi (bdk. Luk 24:35; Perb 2:46; 1Kor 10:16). Bage pe ibas Ketangkasen 1:9-10 ikataken maka wari Minggu e me kap wari Tuhan.

            

Berita Simeriah ibas terpuk sinopsis alu sempabu ngataken maka wari kekeken Tuhan bage pe wari-wari Ia nteridahken bana, rembang ka katakana ibas wari Minggu (nehen Mat 28:1; Mark 16:2; Luk 24:1). Johanes pe ikut nuratken maka ibas “wari pemena kenca Sabat” diberu-diberu e berkat ku kuburen (Joh 20:1), janah idapetina kuburen enggo lume, janah tupung ben wari ibas wari e Jesus pe nteridahken bana kempak ajar-ajar (Joh 20:19). Tole pe ituriken Johanes, maka…ibas wari Minggu si rehna, Kristus si enggo keke pedukaliken nteridahken bana man ajar-ajar janah paksa si e Tomas reh lako ikut pulung (Joh 20:26). Bage pe Jesus tupung nteridahken BaNa man ajar-ajar i Emaus rembang ka ibas wari si seri ras wari kekeken (Luk 24:13). Gereja Pemena ibas nuratken kerna Jesus nteridahken bana tuhu-tuhu alu kinigermeten si mbages, bage pe kerna uga Jesus si enggo keke e ituriken man ras-ras ajar-ajar (Luk 24:30.42; Mark 16:14; bdk. Perb 1:4; 10, 41). Ekaristi si nai nari enggo ilakoken jadi pematang perayan ibas tep-tep perdemun wari Minggu, iubungken ras lakon man-man si nilakoken Jesus ras ajar-ajarNa e.

            

Tuhu, nai, kalak kristen Jahudi tetap ngikuti ibadat agama Jahudi ibas wari Sabat (Sabtu) i Sinagoga ras Kenisah (bdk. Perb 13:14; 44; 17:2; 18:40) janah i Pilipi gia la lit Sinagoga, kalak Kristen tetap pulung ibas wari Sabat i ingan-ingan si nilakokenna jadi ingan pertoton i luar serpang kuta (bdk. Perb 16:13). Kalak Kristen ibas terpuk Gereja Pemena la mecembua, gia enggo lit wari minggu jadi wari perjumpanna tapi selaku kalak Jahudi tetap ka iikutina ibadat kalak Jahudi, gia ibas wari Minggu alu tutus ka ia ngerayaken kinitekenna. Kenca tahun 70, kalak Kristen lanai ngikuti lakon pertoton wari Sabat sabap tupung si e me rumah pertoton ikernepken kalak Romawi, e maka kalak Kristen e pulung ibas wari Minggu jine lako ngerayaken paska Kristus.

            

Ibas abad sipeduaken, wari Minggu enggo jadi wari perayan man kalak Kristen, ija perayan e itorosi alu megiken Kata Dibata, ncepik-cepik roti dingen erbahan kolekte guna nampati kalak si perlu. Ibas abad e, kalak Roma si la tek nggelari wari Minggu selaku Wari Matawari, janah penggelaren e terbaba dungna ku cakap kalak Eropah, contana Inggris Sun Day. Ibaspenggejapen simbaru erpalasken semangat kekristenen penggelaren Wari Matawari  e dungna iubungken ras Kristus selaku Terang si enggo naluken kegelapen dingen Simaba pelimbarun kegeluhen raduken ras arapen. Sun Day iantusken selaku Wari Si Terang tah pe Wari Tuhan.

            

Wari Minggu dungna jadi wari la erdahin (Sabat) e me kenca Kaisar Konstantianus ibas abad peempatken mereken ijin gelah agama Kristen banci ipebelangken. Subuk kalak ibas perkawanen, si erdahin ibas pemerintahen ras kerina si erdahin, ibas wari Minggu ibebasken erdahin gelah banci ras-ras pulung lako ngerayaken rusia paska.

            

E maka, selaku wari perayan si pematang ras si enggo nai-nai nari ilakoken, Konsili Vatikan II ibas Sacrosanctum Concilium No 16 petetapken kerna Wari Minggu nina, bagenda:

“Wari Minggu e me kap benana kerina perayan. Wari Minggu min iajarken alu tandes lako kesalihen kalak si erkiniteken, dingen pe jadi wari keriahen ras wari la erdahin. Seakatan tuhu-tuhu penting kal, perayan-perayan si deban ula ibahan ibas wari Minggu, sabap perayan Minggu e me palas ras utuk kerina paksa liturgi”.

Adi bage, ma enggo me arusna sihamati ras si pehaga Wari Minggu e selaku wari ija Tuhan petangkasken BaNa ras sura-suraNa gelah kita ersada ibas perayanNa lako ngantusi sura-suraNa kerna geluhta ras gelah kita tetap ersada bagi Ia pe ersada ras Bapa si nisurga? (Apaika kerna Wari Minggu enggo itetapken jadi wari si man haganken ibas Hukum Gereja: la gia kita mbiar nangdangi Grotius singataken “ise si waras arus ngikuti hukum e”, arusna kita mbiar nangdangi dirinta lah gia, si nipakeken Dibata jadi kemahNa).

Betlehem Ketaren

KURSI PEMINPIN

Ibas tep-tep perayan liturgi, sekalak peminpin liturgi si nitangkuhken selaku peminpin (malim) minpin perayan ibas kursi peminpin nari. Kursi peminpin tah pe ikataken ka kursi malim, e me si jadi tanda kerna jabaten selaku si minpin perjumpan ras umat, minpin pertoton umat Dibata (PUMR 10). Lako jabat sekalak peminpin ibas liturgi tuhu-tuhu penting janah erkiteken si e, perlu ka ilitken sada inganna kundul si metunggung si jadi tanda lako jabatna.

Kursi peminpin: erbenana kempak katedra uskup

          

Tep-tep kursi peminpin si lit ibas gereja subuk i paroki tah pe i stasi-stasi, situhuna jadi tanda penerusen tahta uskup (katedra, chatedra) janah gereja e iantusken selaku gereja si sada ibas rarasen keuskupen.

          

Tahta uskup e me katedra, ingan kundul uskup selaku peminpin simeganjangna lako jabatna ibas keuskupen. Nai, tahta e iantusken selaku tanda kuasa lako ngaturken kerinana kerna kegeluhen Gereja, tapi genduari katedra e iertiken selaku kuasa lako pengajaren ras pengepkepen kerna kiniteken ras dampar-damparna kerina.

Kursi peminpin ras teologi-na

          

Erpalasken teologi-na, kursi peminpin ngataken maka uskup me malim si pematang si nitangkuhken erpalasken kemalimenna. Ia pe lako guru janah si jadi permakan man kerina umatna, janah kerina dampar lako jabatna e tangkas me tupung ia minpin perayan liturgi.

          

Tupung uskup kundul ije, maka ia paksana ndalinken pendahinna selaku guru, janah tupung pesuruhen uskup kundul ibas katedra e, e ngataken maka ibas malim lit kuasa ngajar uskup. Malim e pesuruhen uskup janah kursi si inganina pe jadi tanda maka ia peminpin si muat bagin kerna kiniersadan umat sue ras penuruhen uskum kempak ia.

Ingan si metunggung lako kursi peminpin

            

Erpalasken pengukuren maka kursi peminpin e jadi bagin kerna kiniersadan umat, seh kal tunggungna adi kursi peminpin itama ibas ingan si metunggung dingen mehaga. Kerina umat min ngidah alu tangkas kursi peminpinna.

            

Ibas paksa-paksana malim cinder tah pe kundul, ras kerina perbahanen-perbahanenna i sekelewat kursina, pengelakon ras perbahanenna e ngataken kata ras tanda-tanda (komunikasi) kerna pengepkepen ras pengajaren si jadi pendahinna. E maka cibal kursi peminpin arus erpengala kempak umat.

Kursi peminpin labo kursi kinirajan

            

Kursi peminpin selaku katedra tah pe tahta tentu perlu metunggung dingen mehaga. Maun-maun guna erbahan kursi peminpin gelah metunggung dingen mehaga, kursi e lanai ncidahken telu dampar lako jabat uskup, eme selaku malim, guru ras permakan tapi maun-maun pe katedra e jadi tanda maka si ringan ije e me sekalak raja.

            

Tuhu, ernembas-nembas ibas jaman-jaman siadi lit nggeluh sura-sura tah pe perasat si njemba perukuren maka peminpin e iantusken selaku raja, janah si e banci pe maun-maun alu la sengaja terbaba denga seh asa gundari ibas erbahan kursi peminpin ibas sada paroki tunggungen dingen hagan asangken katedra i keuskupenna. E maka PUMR (310) nentuken maka kursi peminpin la metunggung ibahan sibagi sada kursi kinirajan.

            

Si perlu itimbang-timbang, min kursi e min ngantusken kata maka malim e me kap peminpin umat bage pe peminpin pertoton. Erpalasken perukuren e maka kursi peminpin subuk ibas curak bagepe ibas tempasna ipelain ras ingan kundul umat. Kayu si nipake tentu kayu si mejile janah sempabu ras mimbar bagepe altar si lit ibas gereja e.

           

Kursi peminpin ipasu-pasu uskup

            

Kursi peminpin sope ipakeken selaku kursi malim tah pe katedra, arus perlebe ipasu-pasu uskup. Adi kursi e kursi si mbaru iban, maka kenca ipasu-pasu uskup, uskup me pe si perlebe ngkundulisa. Malim pe banci nge masu-masu kursi malim si mbaru tah pe si nipesikap tah pe si niperbarui, bage gia kuasa si pematang lako masu-masu kursi peminpin lit ibas uskup.

Sada kursi peminpin ibas sada gereja

            

Bali ras altar si sada ngenca banci lit ibas sada gereja, sada ngenca mimbar ibas sada gereja, bage me pe maka sada ngenca kursi peminpin ibas sada gereja. Si enda ngantusken kata maka sada ngenca uskup ibas sada keuskupen, kune pe lit dua uskup si deban e igelari usup si nampati tah pe uskup emeritus. Bage pe i gereja paroki sada ngenca kursi peminpin, janah kursi e, e me si jadi penading katedra uskup si lit ibas keuskupen.

Kursi-kursi Malim sinampati

            

Adi iperluken lako kursi-kursi man malim-malim sinampati, banci ilitken tapi inganna labo arus ndeher ras kursi peminpin. Bage pe kursi-kursi si ilitken lako ingan kundul man singelai si deban umpamana putra-putri altar, e pe tentu la perlu ndeher ras kursi peminpin.

            

Kursi-kursi e perlu iaturken rikutken ras torosen ruang gereja, janah si e arus ncidahken kursi peminpin jadi ingan uskup lako ngajar, ngelai ras mpermakani umat-umatna.

Hendri Sitepu, S.Sos., Katekis Paroki St. Fransiskus Asisi Berastagi.

KECANDUN NARKOBA, NCEDAI SI MEDANAK

Isuratken : Dinamis Bangun, SH

Pinakit, e me kap sada subuk si reh-reh ras pe maun erkiteken i legim ngganggu kula tah tendi, ukur ras pe maun seh ku kesah  manusia.

Pinakit, semalna jadi banci erkiteken:

1.       Gen/susuren

2.       Kurang gizi

3.       Pengaruh lingkungen/murmak, udara si lanai sehat, ruangan sempit, la lit dalan angin bengket-luar,  rsd.

4.       Pengaruh cuaca, erkiteken kena udan, matawari, banjir, asap deleng si mbeltuk, pengaruh lau si la bersih perban enggo cemar si erban daging gatelen, merutu rsd.

5.       Pinakit danak-danak, jadi erkiteken kurang iimunisasi tah pe sanga bas bertin. Nina tua-tua, banci ka kurang kurang kuning, sembur, gulasah, bage pe kurang minaki.

Pinakit Sigundari

Gundari, adi si nen ku rumah sakit, rata-rata si ertambar e me kap erkiteken:  1.Pinakit rematik, asam urat

1.       Demam Berdarah

2.       Kencing manis / diabetes

3.       Hipertensi

4.       Asam lambung, maag

5.       Jantung koroner

6.       Asma, TBC, influenza (ISPA)

7.       Sakit ginjal

8.       Lumpuh

9.       Kanker, ras

10.   Kecandun Narkoba.

Kai kin ertina narkoba e?

Narkoba e me kap singkaten narkotika dan obat-obatan berbahaya. Menurut UU RI NO. 22 Tahun 1997 tentang narkoba ibas pasal 1 ayat 1 ikataken maka narkoba emekap zat tah pe obat si reh arah sinuan labo pangan, cara penggunaanna arah suntik, isap, itelan si erbahankurang kesadaren/perubahen kesadaren , bene rasa ras banci pe erbahan  ketergantungen janah  kerja otak pe kurang.

Narkotika terbagi 3 golongen:

a.     Narkotika golongen I

b.    Narkotika golongen II

c.     Narkotika golongen III

Narkotika golongen I derek i gunaken guna keperlun ilmu pemeteh. Janah i rarang igunaken man kepentingen si deban. Golongen II ras golongen III igunaken man keperlun paramedis guna pendahin kesehatan umpamana guna obat bius ras obat medem.

Mbue kalak kena ketergantungen narkotika, erkiteken silakokenna sendiri. Adi la kenca i pakena enggo lanai jore ukurna enda ikaten enggo kecandun.

Narkoba (narkotika, psikotrapika ras obat si irarang) bage ikataken si meteh hukum. Narkoba erbahaya sabap ngganggu kesehaten manusia. Contona: narkoba si idur zat zat psikoaktif, la masuk peraturen perundang-undangan tentang narkotika, tapi rusur isalah gunaken ras ngerugiken bana ras masyarakat., umpamana:

a.     Alkohol minuman keras (miras)

b.    Inhalansia/solvin, gas tah pe zat si nukah nguap, igunaken man keperlun pabrik, kantor, ras rumah tangga.

c.     Nikotin (mbako), isap kalak ras nagih.

d.    Kafein kopi, kepe rusursa minum kopi labo mehuli kempak kesehaten kula, danci erbahan mesera tunduh.

Narkoba psikotropika si irarang rikutken kata WHO, si jiakap erbahaya si lit pengaruhna man kula ras ukurta, eme:

1.       Ganja (mariyuana) si banci mahan ukr la erturi-turin: lebih riangna maun lebih sedihna ras senang rukur sisada;

2.       Opioida (opium/morfin) mahan ngkurangi dengut-dengut, tapi pe erbahan melukah madat mata ras kurang kesadaren;

3.       Kokain (bulung koka) erbahan terincuh erdahin patk ras urat si debanna;

4.       Alkohol dat idur minumen keras, erbahan senang erlebihen ras emosi la stabil.

5.       Halusinogen = mereken halusinasi (khayal) contona: LSD

6.       Sedatia ras hipnotika (obat penenang/obat tidur) contona: pil, BK, MG, PCP (fensiklidin)

7.       Solvin ras inhalansi, gas tah pe uap si i sirup contona: tinner, lem. Adi lit kalak idahndu nganggeh lem, enda enggo termasuk kena narkoba.

8.       Nikotin = terdat ibas mbako, nimbulken kecandun.

E maka labo derek bangkrut pabrik isap, erkiteken enggo kenca cubaken ngisap ngisap ate lalap la erngadi-ngadi. Kalak si melala kena nikotin = ngasup ngisap 3 bungkus perwari, banci njadiken sakit jantung koroner.

Pengaruh Narkoba

1.       Ingeten reh lemahna (nukah lupa).

2.       Mesera musatken pikiren kempak sada dahin, nukah gelisah.

3.       Nukah emosi, beti-betin.

4.       Erpenggejapen impulsif: mawang-awang ukurna, tawa tah pe ngeranai sisada.

5.       Lanai mbelin sura-sura erdahin, erlajar mekisat, erteman pe kisat sabap sisada ngenca akapna nggerak.

Jenis-Jenis Narkotika

A.   Golongen Opioda

1.    Bunga poppy/candu

2.    Morfin HC /candu enggo i proses

3.    Ganja : bulung ganja kerah.

      Isap ganja enggo i gulung ibas Cigaret,

      Mbako ganja enggo kerah i ires alus   (gelek, cimeng).

B.   Golongen I

1.    MDMA (Methylene Diaxy-Meth Ampethamin). Enda jenis narkoba si nikataken ekstasi, tulisen aslina XTC, istilah kerenna “inex”.

2.   Psikotropika Golongen II:

a. amphetamin / ibas rupa kapsul;

b.metamphetamin (sabu-sabu) ibas rupa tablet ras kristal;

3. Psikotropika Golongan III

a. sekorbabital

b. amomarbital

4. Psikotropika Golongen IV

a. lexo (bromazepax)

b. MG nitrazepab

c. DUM (nitrazepam)

Sabap-seba Erbanca Kecandun

Kai nge erbanca kalak kecandun narkoba? Melala pendapat kai sabapna kalak kecandun narkoba. Kalak si nggunaken narkoba tentu i tangkap si njaga hukum ras masuk penjara. Tapi engkai maka melala si medanak terjerat/kecandun narkoba? Mbue alasan engkai maka melala kalak menyalahgunaken narkoba, contona:

1.    Ngurangi stres perban PHK.

2.    Gelah lit kinipangen ras kinigenggengen ngadepi perbeben geluh.

3.    Ngurangi kebosanen.

4.    Sekalak si make narkoba, ndatken kesenangen kentisik la iukurina si e ncedai kula ras ukurna

5.    Adi enggo kecandun ras ketergantungen enggo mberat. Man si pemake, arus lit lalap obat si irarang e adi la lit ukurna la jore, janah regana merga, subuk ganja/cimeng, sabu-sabu, ekstasi, alkohol kerina e erbahan si engkerikena sen, janah erkiteken si enagko pe nggit.

6.       Pengaruh pergaulen, erbena alu cuba-cuba i  babai sindikat pengedar narkoba: 2 seh 4 kali i la nggalar, je nari cinanamen terpaksa nukur. E maka man kita orang tua hati-hati jagai anakta ula sempat salah teman anakta. Adi enggo kecandun narkoba, enggo bahaya.

7.       Penambari kesehaten man si enggo kena narkoba, seh asa mulihna perlu paksa si ndekah. Biayana pe mahal ras erkiteken si e arus me ipilih apai akap kelengen jelma asangken erta.Si rusur si erdaya amin gia ia aparat ula kam mbiar ngelaporsa.

8.       Melala anak muda kena narkoba, perban la lit kesibukenna, e maka perlu anak muda erbahan tah pe ngikuti kegiaten si erguna.

9.       Sura-sura si meganjang ibas paksa si hgenduari kerna kinibayaken, kinihagan ras kekuasan erbahan adi la seh melala kalak bene ukurna ras nggunaken narkoba si akapna banci maba kinilayasen.

Bage, si ngasup kami nehken kata perseinget, mbera-mbera erguna terlebih-lebih man si medanakta, ula min sempat ercuba-cuba make barang-barang si la mehuli enda. Sekali kita celus, bene ras terdaya me kerinana termasuk erganata selaku jelma.