MOMO SI MEHULI IBAS PERAYAN LITURGI

BETLEHEM KETAREN

Pernah sekali jadi i kuta kami, ngidah mbaru denga itukur Kepala Desa sada megapon minter merhat sekalak perbapan ermomo. Si tuhuna tupung si e labo lit si penting kal imomoken man anak kuta, tapi nina perbapan e si merincuh ncubaken megapon e man Kepala Desa: “Perlu ka nge sekali imomoken man anak kuta gelah ibanna waktuna pekena-kena pekarangenna sekalak-sekalak,” nina mindo gelah ibere ia ermomo alu megapon si mbaru e. “To dage, adi merhat kal kam ermomo, sikap ban!”, nina Kepala Desa. Sekali dua kali ia erbelas, sikap denga man si ermomo e. Kenca bage ipecekna tombol sora ambulan, reh semangatna ka ia ermomo, e maka sope tiap ia erbelas pecekna lebe si si erbahan sora ambulan e. Seh i suki kuta, ija ibas sada rumah kerina anak jabu paksa erugandia kerna nandena si sangana sakit mekelek i rumah sakit. Ndubem kepeken sada jabu e sengget megi sora ambulan e ras simpek akapna megi momo si la penting e. Ipersingetina si ermomo kerna kai si lit ibas jabu e paksana, tapi sekali nari ka si ermomo e erbahan sora ambulan, tah maun la sengajana. Erkiteken mungkin iakap kalak e si ermomo e sombong ras nentang, maka mis ipekpekina ras-ras si ermomo e, piah besar ayona rikut pe perper megapon si e.

Tersingetna, genduari enda momo i gerejanta pe, subuk si tasi bage pe i gereja paroki, megati lanai sikap bagi biakna momo ibas sada perayan liturgi. Janah kejadin-kejadin e enggo erbahan aru ate Komisi Liturgi KAM. E maka pastor Elio Sihombing, OFM Cap selaku si ndalanken komisi e, sempat erbahan runggu kitik-kitik ras Tim Missale Romawi Karo bas kelang-kelang pendahin Tim e. 

“Merari kuidah gedangen momo asa kotbah tah pe asa gedang lakon perayan, janah maun si imomoken e erbahan si megi-megi lupa kai isi kotbah tah pe tenah lakon. Maka adi isungkun ia i rumah kai si ibegikenna i gereja, isi momo ngenca si ingetna”, nina Marhen Ginting, Porhanger Stasi Suka ras Ketua Rayon Tigapanah kerna si enda. 

“Perbahan mejile nge mik i gereja maka gedang momo e. Tupung mate lampu ras la nggeluh mik, mis nge gendek momo kuidah”, nina ka Adil Tarigan nambahisa. 

“Maun-maun si ermomo lanai ngikuti perayan erkite-kiteken arus erpiket nimai kalak si mesan momo i lebe-lebe gereja seh tegunna ermomo!”, nina ka anggota si deban. 

Pastor Elio bage pe Osber Sinurat mulihi njelasken taktak cibal momo ibas perayan liturgi. “Numpang nge momo e. Adi si numpang enggo jadi pematang, e lanai mehuli. Pas bagi wili si enggo erban i bas karang babi kuta!”, nina ras si e ibelaskenna ka sitik ibas missa si ipinpinna i gereja St. Petrus-Paulus, Minggu 21 Juli si lewat.

Taktak Cibal Momo ibas Perayan Liturgi

Andreas Tarigan, sekalak si sikap ras mehuli  ermomo (Dok.Par)

Nai nari seh genduari, momo labo sada bagin si arus lit ibas perayan liturgi. Ibas Pedoman Umum Missale Romawi no. 166 isuratken: “Momo man umat, adi lit iogeken kenca toto komuni”. Pernah pe jadi, momo ibahan sope perayan ibenaken, kenca Berita Simeriah iogeken, kenca Nuri-nuri ras kenca dung perayan liturgi. 

Cibal momo genduari enda e me ibas ritus penutup (kenca toto komuni ibas Perayan Ekaristi; kenca Toto Pendungi ibas Lakon Kata Sibadia). Lit perpayona maka isi momo labo terjeng berita-berita tapi pe kerna pengendesen pendahin man si ertugas ibas segedang minggu si ikataken. 

Sue ras si isuratken ibas Pedoman Umum Missale Romawi no. 184, momo e iogeken diakon seakatan malim jine nggit ngogekensa. Ertina, labo tep-tep pengurus banci ermomo, seakatan pengurus si enggo itentuken rikutken Pedoman Umum e. I Keuskupen Agung Medan alu isueken ras kinatana, Porhanger me si patut ermomo tah pe pengurus si deban si itentuken guna si e. Momo isehken arah arah ingan dirigen, labo arah mimbar Kata Dibata, ngingetken maka Kata Dibata ndauh pentingen asa momo. 

Momo e sisipen kap ku bas perayan liturgi. E maka momo arusna isehken alu gendek, tangkas ras arah petugas tertentu. Petugas min la ngutamaken uga gelah sorana metunggung terbegi, petempa-tempa bagi penyiar radio rah si ngoge berita i tv, tapi ngusahaken uga gelah isi momo bali itangkap kerina si ninggelkenca. E maka Teptep baris momo arus enggo ikonsep sikap sope perayan ibenaken. (Paroki-paroki si enggo maju netapken momo ibas umat nari seh asa wari Sabtu pukul 16.00 saja, ras ije me isusun Sekretaris Paroki alu erlayas). Engkai maka bage? Momo si la ipesikap alu mehuli erbahan umat la sabar megikensa ras banci pe ncedai erti perayan liturgi e. 

E maka i tep-tep stasi apai ka paroki enggo patut lit papan momo, ingan momo si termurin ras banci alu lengkap itempelken. Alu bage momo i perayan liturgi banci iban alu ngataken poin-poinna saja.

Conta Momo Perayan Liturgi si Mehuli

1.Minggu si reh Minggu... Petugas: Peminpin: Bp. Payo. (Ras seterusna). Tanggal, bulan ras tahun minggu si reh la padah ibelasken. Bage pe merga petugas la perlu i kataken seakatan lit dua gelar si seri i stasi/lingkungen si imomoken.

2.Perpulungen Jabu-jabu. Selasa rumah Bp. Erlayas. Tanggal, bulan ras tahun wari Selasa e la padah ibelasken. Sabab ise pe metehsa Selasa si e e me wari Selasa si kedunna kap. Bage pe merga petugas la perlu i kataken seakatan lit dua gelar si seri i stasi/lingkungen si imomoken.

3.Kolekte tanggal 4 Agustus. Kolekte I = Rp. 285.000. II = Rp. 267.000. Tahunna la perlu ibelaken sabab tentu me si imomoken e me tahun si sangana erdalan.

4.Umat si reh minggu si lewat 100 kalak: Perbapan 25, pernanden 50, Mudika 25. La padah i tambahi komentar.

Rikutken situasi kerna anak tubuh, peridin, perpindahen, si mate-mate, ras sidebanna. Umpamana:

a. Anak Tubuh. Enggo tubuh ibas tanggal 5 Agustus anak dilaki ibas jabu Bp. Adil. La padah belasken i rumah bidan si apai, ras kejadin-kejadin si biasa-biasa saja: nandena ras anakna lit ibas keadan si sehat-sehat saja. Bage me seterusna adi lebih sada si tubuh. Momo Anak Tubuh imomoken sabap lit ubungenna ras Data Umat, ula imomoken adi lit pengataken bujurna saja.

b. Calon Peridin. Calon peridin gelah idaptarken ku Pengurus Lingkungen tah pe Pengurus Stasi.

c. Ersura-sura ngaloken sakramen Tumbuk Erjabu: Ria ras Roi tanggal 2 September. Enda Momo si peduaken. Beren Beluh ras Layasina tanggal 18 September. Gelar orangtua, asal lingkungen ras stasi bage pe parokina la perlu ibelasken bage pe inganna pasu-pasu. Si e itamaken i papan momo saja. Bage pe kerna undangen pesta ibas jabu man stasi ras man Mudika.

d. Erbena ibas tanggal 26 Juli Bp. Romanus Silalahi bengket ku lingkungen St. Jakobus.

e. Erbena ibas tanggal 4 Agustus Bp. Matius sada jabu pindah ku paroki Bandarbaru.

f. Ibas tanggal 10 Agustus enggo ngadep ku Dibata, Diana i lingkungen St. Theresia, ikuburken tanggal 12 Agustus.

g. Universitas St. Thomas Medan sangana ngaloken mahasiswa mbaru. Surat tah pe mbosurna la perlu iogeken, cukup umat iiahken ngogesa i papan momo.

h. Surat pemerentah, organisasi, undangen i paroki nari, la perlu iogeken alu lengkap. Umat iiahken ngogesa i papan momo. Umpamana: Rapat Pernanden tanggal 18 Agustus pukul 15.00 i Aula paroki; Rapat kuta berngi mulih Sabtu pukul 20.00 i Jambur guna pesada arih ngelawan Laneng buah Rimo, ras seterusna.

Adi bagenda ibahan momo i perayan liturgi i gereja stasi tah pe i gereja paroki, tentu la sempat mabai perbapan petempa-tempa kentisik ku kamar mandi piah kenca si e ngisap i pudi gereja, tah pe pernanden si kuskas pinter min kiam ku rumah. Sekali nari, si ingetlah momo si mehuli ibas perayan liturgi e me informasi-informasi penting si perlu ieteh kerina umat si rubungen langsung ras kegiaten Gereja ras arus itumpangken ibas lakon liturgi. Si la arus la padah iarus-arusken itumpangken. Adi bage, ijamin ise pe la medu nangdangi bagin momo, ras la rate mbukbuk man si ermomo. (BK).