BUDI UTOMO SEMBIRING
Umumna si ngemo reh ku Taneh
Karo erkiteken ingan asalna la mereken sada pengarapen pehuliken ekonomi ras
penanggulangen kebutuhen si tep-tep wari, erkiteken taneh la mehumur, lit pe
sinuan la lit si nukursa, janah sinuan pe sikap bagi i Taneh Karo.
Kehumuren Taneh Karo enda tuhu enggo
mbelang beritana ku sebelang-belang dunia, mabai enterem jelma reh gelah tading
ras-ras ije, maun-maun ibenaken alu erdahin kai-kai saja, termasuk ngemo-ngemo.
Genduari adi megermet kita niksiki kinata
nggeluh, maun enggo surung jadi kai nina kuan-kuan “Aras jadi namo, namo jadi
aras!”. Ise kin si ngemo ras ise tuan, lanai jelas ibas kinatana. Si enda jelas
adi sisungngkuni si ngemo ku inganna ertunggu, milih-milih dahin melala ia, adi
la iakapna bagi sura surana dahin e, la ia nggit berkat. La kin lah enda
tanda-tanda maka kita mesera muat majuna? Sabap labo kita banci ngelakoken
rencana si lebihen ninta asa gegehta.
Pilih-pilih Tebu, dungna dat si macikna
Sada perhitungen si motu-motu banci kap mabai kita jadi pentar.
Adi 30 wari sekalak si ngemo erdahin tetap alu gaji si patut ibee man si
erlajar erdahin, katakenolah Rp. 30.000 perwari, maka ulihna ialokenna me Rp.
900.000 perbulan. Tapi ekiteken kitiksa iakap, tertima-tima ulih si terbelinen,
umpaman iarapken gaji Rp. 1000.000 perwari, uga adi 3 wari ngenca erdahi sada
bulan? Tentu ulihna seperteluna ngenca. E me si banci jadi adi ndarami si
ntabehna ngenca kita ibas erdahin ngemo
Min kita ertanggung jawab man si aloken
kita bas dahinta, labo dalih kita ngejar upah si meherga tapi sue min ras
pemerenta man si mada dahin.
Ibas dampar si deban, kalak si mere upah
mbelin ibas pendahin si kitik pe, banci ikataken ngelketi kap dahinna, nempa
kinijahaten ia alu la igejapna. Sabap erkiteken jile-jilena e, si enteren
ndatken sui ate jadina. Adi lit sada si erdahin si la terpake
ulanai ise pe min nggit ngalokensa, maka alu bage, lit dalinna rukur, apai nge
si la payo ibas perbahanenna. E me sada usaha ngergaken manusia jadi manusia.
Rusur erkiteken kepeelun si rempet-rempet si cedai me torosen kegeluhen si
gedang denga i lebe-lebenta.
Perlu sada sikap gelah seh ku tujun si mehuli
Ibas si ituriken idatas, ngataken maka perlu kal kap pemerintah
erban sada peraturen, asakai kin upah erdahin
ndahiken dahin i juma, gelah banci jadi sukat-sukat si enterem. Alu bage lit
kompetisi ras mutu. Enda me sada perukuren uga kita erlajar ras erjuang jaman
ku arah kemajunagelah kita ngasup bersaing ras bangsa si deban. I negeri China si bagenda rupa kap
ilakoken maka jaman si perpudi enda banci bangsa e sejajar ras bangsa-bangsa maju. Sabap pemerintah ngasup mereken kai si man
bahanen, janah rayat ngasup ndahikenca alu tutus erpalasken tororsen ras
sukatt-sukat si ibahan pemerentah.
Pilihen si deban, tah adi
si timai pemerentah erbanca bali nge ras nimai buah parimbalang, maka ibas
Gereja banci kap si enda si benaken manjar-anjar. Umpamana ibas lembaga-lembaga
tah pe yayasan-yayasen Katolik si lit, min si erdahin ije erpalasken kepentaren
ras ketutusen, labo erpalasken perkade-kaden tah pe palas-palas si deban si la
sentudu ras kepentaren ukur si enterem. Adi mutu si ipeganjang, tentu banci reh
buena ulihna ras reh jilena ka perkembangenna janag pengaruhna si mehuli pe
niar ku rayat i sekelewetna jadi usihen si mehuli.
Perjuma kurumah banci erpendahin alu lebih ermartabat
Pemena sisadari lebe maka genduari lit masalah, si ergantung kita
man kalak si erdahin (si ngemo). Tole, sisadari maka pendahin kujuma kurumah
labo pendahin si melket, maka arus kap megah ateta gia kita perjuma-juma. Siterusna,
mari erlajar ngaturken pendahinta alu sikap. Bahanlah prosedur dahin ras target
pendahin. Kenca bage adi kita enggo paham, kita enggo banci ngukurken pasar erpalasken
penggermeten paksa-paksa. E perlu ka si tingkatken pengolahen asil-asilta
kujuma. Umpamana siukurken gelah ula sidayaken
biji kopi tapi erlajar kita ndayaken bubuk kopi sini bahan kita. Ibas piga-piga daerah Indonesia enda, enggo
lit ia pang erbahan si bagenda rupa, gia asilan labo mejile kal tapi ia pang
ngata-ngatakensa (iklan) maka kopina e kopi si nomor sada.
Mari sipekena ukurta gelah kita bijaksana
ngelola si ngemo sabap ije nge si mbelinna biayanta erjuma adi la lit pemetehta.
Ula kita nggit kongsi, kita biaya ia gegeh ngenca, sabap adi bagi adi bage ia
nge tuan e, kita si iemona.
Mpekena uga maka ngemo enda ermartabat.
Adi iban sada perhitungan ras pengelako si mehuli maka pendahin ngemo enda banci sada peluang pendahin si ermartabat meganjang. Umpamana upah erdahin gundari Rp 50.000. Adi 2 kalak erdahin bas sada jabu enggo erpenghasilen Rp 100.000/wari, sada bulan erdahin rata-rata 20 wari maka penghasilen enggo Rp 2.000.000. Jadi adi kita nggeluh bas kuta, banci iban penghematen-penghematen. Banci sibandingken piga-piga pegawe si nggeluh i kota melala nge si erpenghasilen iteruh Rp 2000.000.
Adi sibandingken
sada jabu si nuan lacina bas jumana. Isuanna 2500 batang, buahna lit datna
1500/kg, kali rata-rata Rp 10000/kg datsa hasilna Rp15.000.000. Ence potong
modal nuan Rp 7.000.000, maka asilna Rp 8.000.000. Tuhu seh kal runtungna ia
enda. Tapi mari sebagiken. Adi si e ndahikensa 6 bulan maka sai. E maka Rp
8.000.000 ibagi 6 jadina Rp 1.333.333. e me ngenca penghasilen sebulanna. Jadi
adi ngemo ndai banci nge dat sisitikna Rp 2.000.000/bulan, tapi tuan taneh
erpenghasilen Rp 1.333.333? Siapai nge si mbelinna ibas ia duana?
Jadi enda me sada si perlu jadi pemikirenta gelah kita sadar, uga arusna
kita nggeluh sebagai perjuma-juma. E maka perlu kita erlajar gelah kita banci
erban si terulin ibas kai gia si dadap dahinta.(BUS).
Tidak ada komentar:
Posting Komentar