OMK: PENGARAPEN RAS PERBEBENNA

P. ALBINUS GINTING, OFM CAP.

1.     OMK, ise kin ia?

OMK= Orang Muda Katolik. Arah isi katana enda enggo tentu ncakapken kerna kalak si nguda (anak tanggung, anak bajar-bajar, anak perana-singuda-nguda) ibas gereja Katolik. Kata si semal si i pake e me Mudika (Muda-mudi Katolik), Remaka (Remaja Katolik). OMK ise dage ia? Sue ras isi “Pedoman Karya Pastoral Kaum Muda KWI tahun1986”, maka si  ikataken OMK e me kap kalak singuda si umurna enggo 13 tahun seh ku 30 tahun ras lenga erjabu. 

Tapi anem bage gia nina maka labo ka i tutup gumbar man kalak si umurna enggo lebih ku 30 tahun, sabap nina pedoman ah ndai …”sambil memperhatikan situasi dan kondisi setempat”. Jadi banci sikataken maka, gia umurna enggo ku datas 30 tahun, banci denga nge ikut anggota OMK, adi ia lenga bo erjabu.

2.     Pengarapen man kalak si nguda

Adi siperdiateken ibas geluhta, maka man kalak si nguda enda melala kal pengarapenta nandangi ia perbahan, ibas ia gegeh, kinibayaken nggeluh, dingen dalin  ku lebe. Ia ka me pengarapen man geluh Gereja bage pe geluh man si enterem (masyarakat). Tuhu, ukurna pe rusur nge ergiah-giah lako pelimbarui dingen pemajuken  geluh Gereja ras Negara.

Gereja Katolik pe erpengarapen tuhu-tuhu kal ku kalak si nguda,  ia min jadi tiang si paguh nandangi  geluhta. Ibas Pustaka Sibadia banci si oge kerna pengarapen ras pengendesen man kalak si nguda gelah ia jadi si ngelai ras jadi si mimpin.  Umpamana Jakup i pasu-pasu bapana Ishak, nina: Dibata mereken embun man bandu I langit nari si mahan jumandu mehumur….Bangsa-bangsa jadi suruh-suruhenndu gelah, janah nembah ia kerina man bandu. Kamlah si merentah senina-seninandu, sinursur nandendu pe nembahlah man bandu…” (Kej. 27:28-29),   Daud itangkuhken jadi Raja (1 Sam 16: 12c-13).

Bage ka pe ibas Padan Simbaru si oge kerna kuga Jesus mperdiateken kalak si nguda. Umpamana: Jesus mpediat anak-anak reh man bana (Mat 19: 13-15), Jesus ngajarken anak perana si bayak gelah makeken ertana ku si mehuli (Mat 19: 16-21), Jesus pepalem anak Jairus (Mrk 5: 41-42),  Ipegeluh Jesus sekalak anak perana si enggo mate I kuta Nain (Mrk 7: 14-15), ras si debanna.

Kalak si nguda, e me sada terpuk ibas kegeluhen manusia. Janah tuhu ia me si pegedang geluh ku wari sireh. Adi la lit kalak si nguda maka kuga pa pe peltep me kegeluhen ras sura-sura nggeluh nandangi ku kemajun ku wari-wari si reh. Ia me tuhu pengarapennta lako nerusken dahin geluhta, pekena-kena dingen pemajuken si enggo lit genduari ras pagin.

Ibas perdalinen si enggo lepus maka siidah kuga ia muat bagin erbahan kita merdeka, si inget persadanna arah Sumpah Pemuda si i pesingeti tep-tep tanggal 28 oktober, ia ersada ikut muat bagin lako pesusur ku teruh si mimpin negaranta piga-piga tahun si lepus erkiteken lanai sentudu bagi si arapken bangsanta. Banci ikataken ia nggit ku lebe adi lit si man pekena-kenan.

Ibas kegeluhen Gereja pe banci sigejabken kuga perluna ia ikut muat bagin gelah banci nggeluh perdalinenna, ikut ergotong royong, ikut pesikap Gereja bage pe lakon-lakon totona.

3.     Perbeben kalak si nguda

 
Tuhu mengga kal ateta natap-natap ku kalak si nguda perbahan melala si banci si arapken ibas ia nari. Anem bage gia maka si eteh ka nge maka melala kal perbebenna, janah nggit mawen erkiteken si e, urak ukurta si gedang nandangi ia. Kemajun kegeluhen, entah pemeteh, entah barang-barang, bage pe erta, erbahan kerina ikut pe rubah.

Tentu demparna mbelin kal man kalak si nguda erkiteken ia nukah denga ngikut-ngikut saja, mesikel nandangi kai si mbaru. Erkiteken si e maka melala kange kalak si nguda la mperdiateken geluhna ras geluh sienterem bage pe geluh Gereja. Melala ka lanai lit semangatna nggeluh, kugapa pe akapna enggo seri (menurun kualitas hidup) , melala ka lanai i etehna apai siman pilihen (krisis nilai), lanai ietehna apai perbahanen si mehuli apai  si lang (krisis moral), lanai ersura-sura ku kemajun ras bene semangatna jadi simimpin (krisis kader), megati ka enggo mbiar nandangi wari sireh pagin (cemas akan masa depan), nggeluh bagi lanai lit siman ikutenken (kenakalan remaja), ras si debanna. 

Doni simbelang mekapal rusur ka ncidahken kegeluhen  si nukah alu la perlu nari rukur (instant), ngukuri ku dirina si sada (individualis), merincuh rusur makeken barang-barang simbaru dingen si ngena ka ate (konsumerisme), lanai mediate ke kawes-kemuhen (apatis). Erkiteken si e, ia nggeluh ersenang-senang saja, leket bagi cukandit man nande bapana, lanai ngukuri ku wari geluhna pagin, minen inemen si erbanca mabuk-mabuk, ngisap-ngisap ganja ras si debanna. Bage me deba pergeluh ras perukurenna seh maka tuhu erbahan tumpat ukur dingen latih ngukurisa.

4.     Gereja mperdiateken kalak si nguda

Paus Yohannes Paulus II, tahun 1983-1984 tupung gereja mpesingeti 1950 tahun wari “penebusan ras penyelamatan Kristus”, janah tengteng warina ibas wari Kematen ras Kekeken-Na, iundang kerina kalak singuda katolik sebelang-belang doni lako ngerayakensa I kota Roma. I idah maka seh kal  teremna kalak singuda reh lako ngikutisa. Ngidah bage semangatna kalak singuda reh I Negara ras I kuta japa nari pe, maka ibas bulan Desember 1985 Paus erbahan momo maka tep-tep tahun ibahan wari perjumpan kalak singuda sebelang-belang doni si igelari WYD (world youth day). WYD si pemena I bahan I kota Roma tahun 1986, jenari tep-tep tahun ibahan perjumpaanna, janah inganna pe erganci-ganci ku kota ras Negara si deban. Ibas tahun 2013 enda ndai ibahan perjumpanna I kota Rio De Janeiro, Brazil tanggal 23 seh 28 Juli.

Ibas perjumpaan I kota Rio De Jenairo ndai igejabken kerina si ikut maka seh kal riahna akapna perbahanken banci ia jumpa ras temanna i kuta ras Negara si deban nari. Sekalak mereken penggejapenna maka nina: “… enda lanai kal lang-lang belinna dingen riahna, kami reh i kuta kami nari maba adat kami, bahasa kami sekalak-sekalak, tapi I jenda kami I pesada alu sada ingan, alu sada ende-ende, dingen sada kiniteken…” Pesan Paus Fransiskus man kalak si nguda nupung si e: “Kujapa pe kam lawes Pakekenlah Kristus alu kiniteken, pengarapen, ras keleng ate…”

La ketadingen gerejanta i Indonesia, maka SAGKI 2010 (Sinode Agung Gereja Katolik Indonesia), ersada arih erbahan perjumpaan kalak singuda umat katolik si Indonesia. Perjumpaan pemena ibahan i Keuskupan Sanggau, Kalbar, tanggal 20-26 oktober 2012, inganna i kota Sanggau ka. Kurang lebih 2500 kalak singuda katolik ikut reh ku Sanggau. 

Meriah ukurna kerina, banci jumpa ras teman-teman si ikepar lawit ras si ikuta dauh-dauh nari. Sada kel kap tujunna, pesada arih ibas kiniteken lako pemajuken Negara ras gerejanta. Uskup Saklil ketua komisi kepemudaan KWI erpengarapen man kalak singuda katolik maka, kalak singuda katolik min kalak si pentar erpemeteh ras erkiniteken, kalak si banci nggeluhken geluhna alu gegeh dirina jine dingen ertanggung jabab man kai si i lakokenna, kalak si ergiah-giah muat bagin lako pejoreken ku si enterem.

Tentu, keuskupan ras parokinta pe ikut nge tetap nemani kalak si nguda katolik alu erbahan perjumpaan I paroki-paroki.

5.     Dalinta rukur

Adi sipegermetken  tuhu-tuhu, maka tergejap man banta kuga belinna erga kalak singuda man banta, erkiteken ia me si pegedang-gedang geluh ras sura-sura.

Janah adi si pepayo ka kalak singuda enda maka melala kal nge perbebenna, janah mesikel kal nge ia penuduhi dalin man bana.

E maka kuga ninta, adi mindo ia erbahan perpulungen kalak singuda i stasinta, entah ikut atena ku perjumpaan kalak singuda katolik i terpuk nasional.

Bage kange man kam kalak singuda katolik, enggo i idahndu kuga belinna pengarapen nandangi kam, kai nge si banci i cidahkenndu ibas geluhndu lako njabab pengarapen e. (ag)