SANTO PETRUS LOUIS CHANEL

St. Petrus Chanel tubuh i deher kuta Belley i Prancis ibas tahun 1803. Sanga ia nguda denga ibahan orangtuana ia ermakan biri-biri jadi lako jabatna. Amina gia geluhna mesera, dekahen i mbalbal asangken itengah-tengah jelma si enterem, banci ikataken ia sekalak si pentar dingen bujur: bagi batu permata ibas kubang, erdilap-ndilap tupung iparpari matawari.

            

Ibas sada wari, sekalak malim paroki si mediate, jumpa ras Petrus. Kenca malim e ngidah kebujuren ras kepentaren Petrus maka erburak ukurna, maka ia enggo ngidah permata ibas diri Petrus. E maka idahina orangtua Petrus lako mabasa gelah isekolahken.

            

Ibas sekolah si idalanina seh ku Seminari pe, Petrus erlajar alu tutus. E maka seh me Petrus itangkuhken jadi sekalak malim ras itetapken ia erdahin ibas sada paroki si kitik dingen kurang denga umatna. Pastor Petrus Chanel e me sekalak pastor si tutus ertoto ras nggeluh idur pengarapen ras kekelengen. Ia bujur ras mediate man tep-tep jelma, e maka telu tahun denga pe pastor e erdahin i paroki, enggo teridah ulih perbahanenna si nigejapken umat i parokina. Enterem umat mulihi erkeleng ate nangdangi Jesus ras Gereja, ras ncidahkensa ibas perbahanenna asa gegeh ras ukurna lit.

            

Ibas pusuhna si mbages, St. Petrus ersura-sura jadi sekalak missionaris, emaka ipersadana me bana ras ordo religius serikat Mario (missionaris-missionaris Maria), erpalasken kinitedehen ate ras arapenna gelah ia ipake pebelangken Berita Siberiah kempak kalak si langa erkiniteken man Tuhan.

            

Piga-piga tahun kenca si e, seh me bagi si  nisuraken Petrus Chanel, ija ia ras piga-piga temanna sada rarasen ibas missionaris Maria i utus ku pulau-pulau i Lauten Fasifik. Pastor Chanel ras sekalak bruder itama erdahin i pulau Futuna, janah i pulau pe enterem kalak si ermeriah ukur ngalo-ngalo ia bage pe ibas megiken pengajaren ras kotbahna. ”Mbelin kal kekelengen pastor ras bruder e man banta!”, bagem nina rusur kalak Futuna, ngalo-ngalo kai si nisehken pastor ras bruder e, bage natap-natapsa si nidalanken missionaris e ibas geluhna.

            

Bage gia, erkiteken cian ate pengulu suku Futuna, sanga anak pengulu e iperidiken pastor Petrus, gara me pusuhna,murta pengulu e janah isuruhna me tantera-tanterana lako munuh pastor e.

            

Sanga pastor e ibunuh janah tupung nangdangi peltep kesahna, ersumekah ia, nina: ”Aku lit ibas kejuah-juahen me!”. Tanggal 28 April 1841 e me wari kematen pastor Petrus Chanel. Kematenna nadingken kekeken semangat kerina kalak Futuna, e maka kerina e bengket jadi kalak keristen si tutus.

            

Ibas tahun 1954, lebih seratus tahun kenca kematenna, pastor Petrus Chanel itabalken  paus Pius XII jadi sekalak Santo alu gelar St. Petrus Louis Chanel. ”Tedeh ateku ras erpengarapen aku ikut muat bagin pebelangken Berita Simeriah!”, e me tading-tadingen si nitadingken St. Petrus Louis Chanel man banta kerina, terlebih-lebih man kalak si erkemalangen man bana dingen si nabalken gelarna jadi gelar peridinna tah pe gelar pengepkep lingkungen tah pe stasi  bagepe kalak si ertoto ras ia kempak Dibata.

Hendri Sitepu, S.Sos., Katekis Paroki St. Fransiskus Asisi Berastagi.