RUSIA DIBATA SITELUSADA SISERTA MULIA

Ibas kegeluhen kiniteken kalak Katolik kerna Dibata Sitelusada Si Serta Mulia situhuna enggo semal sibegi. Bage gia pengantusenta kerna si e situhuna perlu reh bagesna sigejapken janah labo iukurken.

Erkiteken si e mbue nge penungkunen-penungukunen kerna kai kin  Dibata Sitelusada e, janah uga kita selaku kalak awam erpengangka dingen ngantusi rusia e? Lit nge sada gambaran doni si banci nuriken gelah reh tangkasna man banta kerna rusia e? Mari dage sipelajari terdauhen kerna rusia e uga arusna kita ngantusi dingen nggejapkensa rikutken kinitikenta.

Sipemana, situhuna la mungkin ngantusisa alu erkedungen kerna rusia Dibata Sitelusada Si Serta Badia, sabap adi banci siantusi alu erkedungen kerna rusia e; selaku manusia si labo sempurna janah erbatas, tinepa Dibata, e me sabapna maka labo kita ngasup ngukuri kerna Dibata si penepa alu erkedungen. Dibata lanai bo nari ikataken Dibata si penepa adi kin manusia ngasup ngukuri kerna Ia. Dage bujur nge maka kita labo ngasup ngukuri Ia. Rusia Dibata Sitelusada Si Serta Badia e me kap Dibata si petangkasken dirina jine si niberekenNa kempak kita erkelangken Jesus Kristus si jadi suruhenNa ras diri Dibata.

Sipeduaken ibas Dibata Sitelusada Siserta Badia e, kiniteken kerna Dibata Sitelusada Serta Badia e me sada pemere Dibata kempak kita selaku manusia si lemah ras erbatas nge kengasupenta. Sipeduaken, lit piga-piga cara si banci nampati kita gelah erpengangka sitik kerna Dibata Sitelusada Si Serta Badia uga kin Sitelu e Sada kap janah Sisada e Telu. Umpamana banci si bahan sada conta api. Api e sada nge tapi ibas api lit sada gegeh si la terkira, ija api pedalan kereta api. Api pe mereken sinalsal guna nerangi gelap. Bage pe api banci nge mereken las segelah ula kita bergehen.

Gegeh, sinalsal ras las api e me telu si pelain-lain tapi api e sada nge. Alu cara pengantusen si bage banci nampati amina gia labo bage kal. Gegeh, sinalsal ras ibas api nari labo kap tuhu-tuhu lepas kinilitenna enda ras si deban. Kai si niajarken Gereja kerna dibata Sitelusada Si Serta Badia e sada kap, tapi telu pribadi jine. Teptep pribadi e kinilitenna lain-lain sabab ras si deban. Tapi kai si nituriken kerna api banci sitik nampati kita ngantusi uga kin Sisada e Telu janah Sitelu e Sada.

Sipeteluken, kiningasupen manusia guna ngantusi rusia Dibata Sitelu Sada alu kuh banci nge sieteh alu sada turi-turin kerna St. Agustinus. St. Agustinus sanga ngukuri alu mbages kerna rusia Dibata Sitelu Sada Si Serta Badia, ia erdalan-dalan janah rukur i duru lawit. Sanga ia erdalan-dalan janah rukur jumpa me ia ras sekalak danak-danak sanga naruhken lau lawit alu sudu janah iamburkenna ku bas sada lubang si ibahanna ibas kersik duru lawit.

Ngidah si e mutuk kal ukur St. Agustinus janah nungkun man anak e: “Kai si nilakokenndu ije anakku?” Jabab anak e: “Aku sangana mindahken lau lawit e ku bas sumurku enda”. Megi jababen anak e, tawa kal St. Agustinus janah nina: “Uga banci lau lawit si mbelang enda itamakenndu ku bas surmurndu si kitik e? La kin lah e pendahin si sea-sea?”. Alu natap St. Agustinus, enak e njababsa: “Bage me pe kai si nilakokenndu e bapa.

Labo mungkin rusia Dibata Sitelusada Si Serta Badia si mbages ras bage belangna e itamaken ku bas otakmanusia si kitik ras erbatas”. Jabapen anak e alu tangkas erbahan St. Agustinus sadar maka susah kap manusia banci ngantusi alu erkedungen rusia Dibata Sitelusada Si Serta Badia. E maka manusia labo banci ngantusisa alu ukurna saja.

Sipeempatken, Jesus enggo petangkasken ubungenNa ras Dibata Bapa ras Dibata Kesah Sibadia, e maka kitabanci ngukuri rusia e sue ras si nicidahken ras ibereken Jesus. Jesus ndilo Dibata selaku Bapa ras idur Ia me ulu kerinana. Jesus ngataken diriNa jine e me Anak si niisuruh Bapa jadi jelma guna nebusi dosa manusia.

Dibata Kesah Sibadia e me si penampat janah si maba keriahen si niisuruh Bapa ras Anak. Kesah Sibadia si mereken ras si nampati kita selaku anak-anak Dibata guna ngukuri ras nggejapken rusia Dibata Sitelusada Sertabadia. Alu kai siniajarken Jesus, rusia si mehaga e banci si gejapken ras “si antusi” arah penggejapen geluhta si teptep wari. “Alu perukuren” si meciho kita banci ngantusisa lebih asangken kai si lakoken alu akal budi.

Hendri Sitepu. S.Sos.