KATEKUMEN

BETLEHEM KETAREN, BERASTAGI.

                 

Tep-tep reh reh Wari Kamis Sibadia tah pe megati ka igelari Kamis Simbentar, pulung me kerina pastor lako ngerayaken Permalimenna dingen ije uskup masu-masu minak Perminaken Sisakit, minak Krisma ras minak Katekumen. Tapi nina pastor-pastor jine maka minak katekumen e menam-menam la urak seh ku tahunna ija arus ilakoken ka pemasu-masun minak Katekumen. Engkai? Jababna, mungkin langa tangkas man banta pengurus-pengurus i stasi kerna kai ras uga kin katekumen e tah pe mungkin erkiteken belinna kekelengenta man si mbaru reh ku Gereja erpalasken turi-turin peradaten, uga maka mesunah ras meriah ukur pekepar, minter siendik-endik pastor gelah erban peridin alu la ngikuti aturen si lit. Gereja ma ingan sikeleng-kelengen, ninta ngkapiti sura-suranta, gia dungna kemer me siakap maka erkiteken la megegeh palas kiniteken anggota-anggota Gereja maka melukah kubas melukah ndarat bagi bengket ras lawes i Jambur nari janah erkiteken si e maun-maun Gereja enggo jadi ingan sikeng-kengen, lanai si keleng-kelengen!

             

Mehuli kal maka ibas Rapat Paripurna paroki St. Fransiskus Asisi Berastagi si nilakoken ibas tanggal 15 januari 2011 e, pastor paroki P. Ignatius Simbolon, OFM Cap arah penggermetenna enggo majekken “bendera” maka arus me imulai igeluhken semangat “sensus catholicus” ibas kerina pengelan dan pendahin Gereja, ras si e tentu rubungen ras katekumen.

             

E maka icubaken kami me nenahken tulisen si gendek-gendek enda alu arapen erguna banta ibas majekken kesemalen-kesemalen Gereja, si tuhu enggo me ndekah lit tapi mari sigeluhken alu semangat si mbaru e, e me sensus catholicus e.

Kerna Katekumen Ibas Kanon Gereja

             

Lako ngantusi uga katekumen e sentudu ras ketentun Gereja, maka perlu igermeti kanon  206 si ngataken, bagenda:

Pasal 1:  “Katekumen, e me kap kalak si ibas penjembaan Kesah Sibadia ngataken sura-surana lako mindo ipebengket  ku kula Gereja, iubungken alu palas si tertentu, ras erkiteken ketedehen atena jine, bagi kegeluhen kiniteken, arapen ras kekelengen si nidalanina, ipersada ku rarasen Gereja si enggo ngkelengisa bagi anak-anakna jine”.

Pasal 2: “Katekumen ndatken perdiaten si dem kegermetten, ija Gereja si ertenah kempak ia lako nggeluhken Berita Simeriah ras naruhkensa lako ngerayaken liturgi, lako nguseken man bana erbage-bage keliasen ate si sentudu bagi si nialoken kalak Kristen”.

           

Pengertin Katekumen

            

Bagi litna tersurat ibas pasal 1 kanon 206 e, katekumen emekap kalak si ibas penjemban Kesah Sibadia ngataken sura-surana guna  ipebengket ku rarasen Gereja. Si ni perlu igermeti erpalasken ketentun e, maka Gereja ngakui pendahin lako keselamaten manusia reh dingen ersumbul ibas Dibata nari. St. Johanes pe ibas suratna ngataken: “Enda me kekelegen e, labo kita si enggo ngkelengi Dibata, tapi Ia nge si engkelengi kita. Emaka isuruhNa AnakNa ku doni enda arah Ia kita iperdamenken ras Dibata alu ngalemi dosa-dosanta (1Joh4:10). Tambah-tambah si e, St. Paulus pe sada penggejapen ras Johanes maka isuratkenna Suratna, alu nina: “Sabap Kesah si ibereken Dibata bandu labo erbahanca kam jadi budak si mulihken, seh maka kam mbiar rusur, tapi Kesah e erbahanca kam jadi anak-anak Dibata, janah erdandanken si e kita ngerana man Dibata, “O Bapa!, O Bapa kami! (Roma 8:15). Emaka, kiniteken e, e me pemere Dibata me, janah pengelakon si metunggung selaku kalak si erkiniteken e me kap erkata bujur ras  ermengkah ate kerna berkat pemere kiniteken e. Katekumen min ngataken sura-surana alu tangkas lako bengket ersada ras rarasen Gereja.

Ubungen Katekumen ras Gereja

             

Kanon 204 ras 205 negasken maka lit dua dampar ubungen kalak si erkiniteken ras Gereja, e me dampar teologal ras dampar yuridis. Ikataken ubungen teologal e me ubungen manusia ras Gereja si turah ibas paksa manusia erpenggejapen ras erpengaloi kerna sora Dibata si erlebuh man manusia. Dampar yuridis e me ubungen manusia ras

Gereja si jadi ibas turahna sura-sura ibas diri manusia alu ngikutken pengelebuh Dibata lako ialoken alu sah ibas peridin tah pe ialoken alu resmi. Situhuna, sekalak katekumen langa resmi ibas dampar yuridis (hukum) tapi enggo rubungen ibas dampar teologal ras Gereja.

             

Adi si germeti terbagesen kerna pasal 1 kanon 206, lit kata “mindo ipebengket” (mohon dimasukkan), “iubungken” (dihubungkan) ras kata “ipersada ku rarasen Gereja” (igabungkan dengan Gereja), maka arah perkatan-perkatan si pelain e, lit me si perlu si antusi alu mbages, e me kerna pelain-lain kebagesen ubungen ras Gereja: ibas diri katekumen, ia mindo lako ipersada alu bulat (sangkep) jadi anggota kula Kristus. Tapi ibas dampar si pelain, Gereja ngaloken ia alu tingkat tah pe tahap si pemena tah pe si pertangtangna, alu ubungen si enggo erpalas ras tangkas. Tahap pengalonken Gereja nandangi katekumen ertambah-tambah alu nggermeti kegeluhen katekumen si reh tutusna ngikutken sora pengelebuh Dibata, ibas ketedehen atena dingen kegeluhen si ncidahken kiniteken, arapen ras kekelengen.

             

E maka erpalasken si nicakapken idatas, Gereja nandai kesemalen “baptis in voto” (peridin ibas ketedehen ate) bagi si tersurat ibas kanon 849, ija nina: “Peridin, e me labah ku sakramen-sakramen si niperluken lako keselamaten, tah ilakoken alu arusna (in re) tah adi lang ilakoken ibas ketedehen ate (in voto).

Masa Katekumenat

            

Kalak si megiken pengelebuh Dibata, sope resmi ialoken selaku anggota Gereja perlu pebelin dingen nggermeti kinitekenna ibas masa persikapen, bagi si nikataken ibas Ad Gentes artikel 14 alinea si pemena, nina: Metunggung me adi ia si enggo ngaloken kiniteken kerna Kristus ibas Dibata nari arah Gereja, ialoken ku bas katekumenat alu lakon liturgis. Guna si e Gereja labo terjeng nangkasken kerna ajaren-ajaren Gereja ras kiniarusen-kiniarusen, tapi pe penegun ibas kerina kegeluhen kalak Kristen ras jadi masa uji-coba si dekahna cukup lako nampati si erlajar lako ersada ras Kristus Guruna.

            

Kitap Hukum Kanonik 1983 ngaturken masa katekumenat, bagenda: kalak dewasa si ersura-sura ngaloken peridin, metunggung adi ialoken selaku katekumen, ras asa bancina itegu-tegu ku inisiasi sakramental arah erbage-bage tahap sue ras torosen perayan inisiasi ras sue si nitentuken Konfrensi Waligereja bagepe ketentun-ketentun si niitetapkenna (kanon 851 n.1).

Kalak si enggo dewasa banci iperidiken alu ia arus nuduhken kebulaten ukur lako ngaloken peridin, ndatken pengajaren si cukup kerna kebenaren-kebenaren kiniteken ras kiniarusen-kiniarusen selaku kalak Kristen ras enggo teruji ibas geluhna alu katekumenat; dingen iingetken pe gelah erkadiola ras jera kerna dosa-dosana (kanon 865 pasal 1).

             

Kai kin si jadi hak kalak si enggo iperidiken?  Alu kata si gendek maka kerna hak kalak si enggo iperidiken (umat) e me: 1). Ielai ibas administrasi; 2). Ielai ibas keperlun pertendin; ras 3). Pebelinken kegeluhen pertendinna. Alu lit hak tentu lit ka kiniarusen-kiniarusen selaku umat. Kai kin si jadi kiniarusen-kiniarusen (kewajiben) umat? Alu gendek kata ka, emekap: 1). Ngikuti alu patuh kai si nipedahken Gereja; 2). Ngikuti kesemalen Gereja sirulo, contana: erminggu teptep minggu ras ibas wari-wari si nitetapken Gereja. 3). Patuh man ketentun-ketentun Gereja Keuskupen bagi si nitempasken paroki, contana: DAMANG ras sidebanna. Uga ka dekahna masa katekumenat si nitentuken Konfransi Waligereja Indonesia? Masa Katekumenat si nitentuken Konfrensi Waligereja Indonesia, emekap: 1 tahun man katekumen sir eh ibas agama si pemena tah pe Islam nari ras 6 bulan man katekumen si reh ibas gereja-gereja Protestan nari.

Status Hukum Katekumen

             

Gereja alu dem kekelengen ngaloken sura-sura katekumen lako pegeluhken kinitekenna. Gereja ngkelengi ia bagi anak-anakna jine. Konsili Vatikan II enggo ngukurken status hukumna, alu ketentun sibagenda: “…status hukum katekumen arus itetapken alu tangkas ibas Kitap Hukum si mbaru…Erkiteken ia enggo ipersadaken ras Gereja, enggo jadi anggota jabu Kristus ras la jarang enggo nggeluhken kegeluhen kiniteken, arapen ras kekelengen (Ad Gentes 14.e)

             

Kanon 206 ibas netapken status hukum katekumen, netapken bagenda: “katekumen-katekumen ndatken pengelan si tertentu ibas Gereja nari…ras enggo nguseken erbage-bage keliasen si sentudu bagi kempak kerina kalak Kristen. Hukum Kanonik nehken pendahin kempak Konfrensi Uskup lako norosi si jadi hak-hak si niakui Gereja kempak katekumen (kanon 788 pasal 3), janah enggo mereken hak tertentu man bana, contana e me pemasu-masun guna katekumen (kanon 1170) bagepe lakon penguburen alu acara Kristen (kanon 1183 pasal 1).

            

Bagenda me si ngasup kami nehkensa, ibas kurang lebihna ersentabi kami man banta kerina, bujur ras mejuah-juah.