KELENG ATE JESUS LA ERSIBAR

HENDRI SITEPU, SUKAJULU

Kerina manusia nggeluh enggo pasti mate. Tapi banci kataken maka teptep jelma mbiar mate. Engkai? SabaP pengantusen manusia kerna kematen e me kap tampuk kerinana. Adi kita enggo mate maka kita lanai banci erbahan kai-kai pe, erkiteken sie me maka manusia teptap  erusaha segelah banci cawir metua seh pe banci ngidah-ngidah kempuna entahpe entena. Janah adi banci min manusia nggeluh rasa lalap. 
Tapi banci si idah jaman gendudari enda maka tampuk umur jelma sindekah na kal 70 tahun entah pe 80 tahun bagi si nisuratken ibas kitab Mazmur. E me sababna manusia erusaha guna tetap ndatken geluhna.

 Bage gia adi si eteh kin ndigan warina kita mate, kai me dage banci sibahan. Selaku sekalak kalak si erkiniteken entahpe kalak Kristen si tek kempak kegeluhen si rasa lalap e maka kita erusaha guna erlagu langkah mehuli dingen mpesikap dirinta jine ibas perbahanenta si la mehuli sedekah enda. Pengarapenta e me kap segelah kenca dung kegeluhenta i doni enda kita pagin banci nggeluh rasa lalap ibas kegeluhen si rasa lalap e.

Jesus ibas kiniersadanna ras ajar-ajarna ibas wari perpudina sope denga ia ngenanami kiniseran, mate janah ikuburken ras keke ka mulihi ibas wari si peteluken erbahan sada lakon man man siperpudi e me kap si nirayakenta ibas wari Kamis Simbentar. Si enda ibahan Jesus sabab Ia enggo meteh warina ndigan Ia mate. Erkiteken si e Ia erbahan sada persingeten kempak ajar-ajarNa. Kai si nibahan Jesus e me kap alu ndilo kerina ajar-ajarNa si sepuluh dua e ras man ras-ras ibas sada meja persembahen.

Situhuna alu man ras-ras ibas wari sope denga Paska labo sada kejadin si istimewa ibas paksa si e sabab e sada kesemalen ibas kalak Jahudi. Bage gia lit sada kejadin si la semal si nibahan Jesus ije ibas berngi e me kap sanga Ia nangtangi jubah-Na dingen erbentingken sada uis ibas awakna dingen murihi nahe ajar-ajarNa. Murihi nahe e me sada pendahin si meterukna kal ibas kesemalen kalak Jahudi. Sabab si e semalna ilakoken sekalak budak ija nahe e me tanda kinihagan si meterukna kal. Dage adi Jesus si kin anak Dibata nggit murihi nahe ajar-ajarNa, e me antusen maka Ia tuhu-tuhu peteruk bana dingen mereken sada usihen kerna ukur si meteruk dingen pe nggit ngelai janah pe nggit erkurban guna kejuah-juahen ras pe keselamatenta manusia.

Adi kita manusia labo bagi Jesus si meteh ndigan warina kita mate.  Ija Jesus Anak Dibata enggo meteh kerna kematen-Na janah uga Ia arus mate pe enggo me itehna ndube. Bage pe Jesus enggo meteh maka sekalak ibas ajar-ajarNa sini kelengi nari mpersoken Ia telu kali janah itadingken bangsana, iendesken kempak Imam-Iman Simbelin ras si meteh Taurat ras sidebanna seh Ia ipersilangken, mate janah ikuburken pe enggo itehNa sope denga si e jadi.

Tambah-tambah sie pe ibas bena-bena na nari enggo ibereken kuasa i surge ras i doni. Dibata Bapa-Na enggo ngendesken kerinana man Jesus, “kerinana” antusenna e me kap kerina si jadi kempak diriNa jine. Erkiteken kuasa e banci nge min Jesus mulahi bana ibas kiniseran rasp e kematenNa. Tapi sie la i lakokenNa.

Jadi genduari penungkunenna man banta, Engkai maka Jesus nggit ndalani kerinana e? Jababna e me kap erkiteken kekelengen ras perkuah ateNa kempak manusia. Kai kin “keleng ate e? Memang keleng ate mbue nge pengantusenna. Lit kalak ngataken maka keleng ate e me kap kini nggiten mereken si lit ibas kita kempak sapih-sapih kita, lit ka ngatakensa kini nggiten erkurban man jelma sideban ras si debanna.

Keleng ate Jesus kempak manusia kepeken labo terjeng nggit erbage ras erkurban saja ngenca tapi lebih asangken sie e me “keleng ate si la ersibar” e me kap keleng ate si la ngarapken ulih ibas kita nari seakatan ertoto dingen ngataken bujur ras tetap erpengendes.

Payo memang keleng ate arus lit pengurbanen. Erkiteken keleng ate Jesus kempak manusia Ia nggit peteruk bana bagi sekalak budak, murihi nahe ajar-ajar ras nggit mate i kayu persilang bagi sekalak si jahat umpamana kalak si munuh, nangko ras ngerampuk. Lang adi si nehen maka situnuha Jesus labo salah ras labo erdosa. Jesus mate erkiteken Ia iakap bai ras sekalak pemberontak ras sekalak pengacau man Imam-Imam Simbelin ras si meteh undang-undang bagepe cian ate kalak e erkiteken Jesus i tandai ijapa pe janah enterem kalak si ngikutken Ia. Kerina e ilakoken Jesus labo guna man bana saja jine tapi guna keselamaten manusia.

 Turi-turin Jesus murihi nahe ajar-ajar mereken piga-piga si man germetenta e me kap:

1.       Jesus tuhu-tuhu erkeleng ate kempak kita. Keleng ate si nibereken Jesus man banta e me kap keleng ate alu la ngarapken ulih ibas kita nari. Erkiteken sie me maka la pe mindo ibas kita nari segelah kit ape mereken si lit ibas kita alu ersimulih man sapih-sapih kita manusia dingen sisampat-sampaten ras meteruk ukur. Sie banci silakoken adi ktia pe nangtangi bajunta e me kap “EGO” nta selaku manusia, erkiteken Tuhan enggo erbahan bage leben man banta.

2.       Keleng ate sapih-sapih kita manusia banci torah adi kita erkeleng ate kempak dirinta jine alu ngataken bujur ibas kerina pemere Dibata si enggo si aloken ibas geluhta janah nggejapken maka kerina e labo bekasta beluh ras kini ngasupen nta saja tapi sie kerina rehna ibas Tuhan nari kap.

3.       Erkeleng ate kempak kerina bekas tinepaNa. Si enda antusenna e me kap maka kit ape arus erkeleng ate kempak sekelewetta si ikut nampati kegeluhenta.

4.       Erkeleng ate kempak Tuhan. Si enda banci silakoken arah sura-suranta guna jumpa ras Ia alu ertoto, er ibadat ras-ras, reh ku perpulungen, ku gereja ras sidebanna dingen tetap erdame ras sapih-sapih kita bage pe ras Dibata.

Mbera-mbera arah usihen sini bahan Jesus guna sikeleng-kelengen ras si sampat-sampaten kita pe banci ncidahken pengataken bujur ibas geluhta siteptep wari. Bage pe erkeleng ate pe man bekas tinepaNa sideban e pe banci maba keselamaten ras kejuah-juahen man banta janah siperluna kal e me kap ngkelengi kita alu la ngarapken simulihna ibas kita nari seakatan ngataken bujur ras ngelakoken pedah-pedahNa ibas kegeluhenta siteptep wari. Selamat  Paska 2014. (hs)