HENDRI SITEPU
Enggo
semal maka ibas tanggal 6 Januari, Gereja Katolik ngerayaken Wari Raya Epiphania
entah pe Wari Raya Tuhan Ncidahken Bana. Amina bage gia erkiteken ibas wari si
e labo Wari Minggu, maka sentudu ras kiniersadan Uskup ibas Konferensi, banci
nge wari raya ilakoken ku wari Minggu si terdeherna kal. Bagi lit na
istilah-istilah kinigerejan e me Ekaristi, Liturgi, Epiklese ras si debanna,
bage ka me Epiphania e me sada istilah si rehna ibas cakap Junani nari si
antusenna: “Encidahken diri” entah pe “Ngakuken Bana”.
Epiphania bena-benana enggo
irayaken ibas abad si peteluken i
Gereja-Gereja Timur (si makeken Ritus Timur e me kap arah Timur Jerusalem) ibas tanggal 6 Januari alu tujun guna
nghamati Peridin Kristus. Kedungenna epiphania enggo lit ibas salah sada
beligan Telu Wari Sipenting seyakaten Paska ras Pentakosta.
St. Krisostomus ibas kotbahna i Antiokia tanggal
6 Januari 387, nuriken uga pentingna epiphania jadi sada wari raya si mehaga
lebihen asangken wari Raya Natal. Engkai maka ikataken Epiphania?, erkiteken
labo sanga Ia Tubuh, Ia ncidahken bana kempak kerina jelma tapi kepeken sanga
Ia iperidiken.
Kedungenna
Epiphania turah ibas kalender Gereja Barat e me Gereja alu Ritus Latin si lit i
sekelewet Barat Jerusalem ras erpusat i Roma. Ibas abad sipeempatken alu fokus
si pelain. Tempa-tempa ngerayaken wari peridin Kristus, Epiphania iubungken alu
Kristus ncidahken bana kempak bangsa si labo Jahudi e me kap kempak diri telu
kalak, kalak Majus.
Adi idarami ibas
tulisen-tulisen si ndekah-ndekah kal ikataken maka wari Peridin Kristus ras
tanda sengget perjabun i Kuta Kana pe irayaken ibas perayan epiphania e. sanga
lit pelimbarun Liturgi ibas tahun 1955, maka
“Vigili ras Oktaf) (e me 8 wari seh wari raya) epiphania, lain si e
pesta Peridin Tuhan genduari irayaken ibas wari Minggu kenca Epiphania.
Pelimbarun e kedungenna i
ikuti alu netapken sada aturen si mereken sada kebebasen man Konferensi
Keuskupen i sekelewetna guna erbahan wari raya Epiphania ibas wari Minggu ibas
tanggal 2 seh ku tanggal 8 Januari, segelah wari raya epiphania e banci pe
irayaken kerina umat alu meriah, alu nginget maka wari raya epiphania labo
banci itetapken jadi wari libur nasional.
Situhuna adi metenget kita
kerna liturgi wari raya epiphania maka banci sidatken 3 kejadin si penting ka
ije e me kap: Kerehen kalak Majus, Peridin Kristus jine ras bage pe Tanda
Sengget perjabun i kuta Kana. Tambah tolena maka adi erpengenen ka kita ibas
Ibadat Erpagi-pagi pe teridah uga kinibayaken wari raya Epiphania iba
puji-pujin Zakaria (Nehen buku Ibadat tep-tep wari hal. 96): “Wari sisendah
penganten surgawi ipersadaken ras Gereja, sabab i Lau Jordan, Kristus enggo
pelikas dosa umat alu mbasuhsa”. Kerina sarjana pe ikut maba persembahen guna
perjabun raya, ras kerina temue ermeriah ukur ibas enggo isalihken lau jadi
anggur, Alleluya”.
E maka antusen Epiphania
dungna reh tangkasna man banta, kune kita erpengenen kerna ubungen ogen Berita
Simeriah ibas wari raya Epiphania ras ogen Berita Simeriah ibas wari raya
Paskah. Umpamana kerna Jesus si ndatken tekanen ibas si erkuasa nari e me Raja
Herodes sanga ibegina Jesus enggo tubuh, janah ersura-sura nge Raja Herodes
gelah Anak e (Jesus) i bunuh, bage pe sanga pimpinen kalak Jahudi nari sope
denga Jesus ipersilangken.
Jesus ncidahken bana kempak
bangsa kafir si labo Jahudi si niwakili kalak Majus, bage pe tentara Romawi epe
labo kalak Jahudi si kedungenna nandai Jesus e me Anak Dibata sanga iteruh kayu
persilang. Ubungen kejadin si menam seri enda me mpersingeti man banta maka
tema liturginta si mbelinna e me kap maka selaku Gereja Sisada, Badia, Katolik
ras Apostolik kita arus ngerayaken rusia Paska e me: Kegeluhen, kematen ras
kekeken Jesus Kristus si jadi tampuk Kiniteken Gereja, bage pe wari raya si
debanna pe arus ka nge sipehaga guna mpebagesi kinitekenta e.
Bujur ras Mejuah-juah: Selamat
Wari Raya Epiphania mbera-mbera Tuhan rasa lalap nemani kita. Amin
Isalihken
ku cakap Karo: Hendri Sitepu.
Tidak ada komentar:
Posting Komentar