TELU MINGGU SI BADIA IBAS GEREJA KATOLIK

HENDRI SITEPU, SUKAJULU

Ibas Liturgi Gereja Katolik sope denga Paska kekeken Tuhan Jesus Kristus, kerina umat katolik enggo nikapken pusuh peratenna kidekah paksa Persikapen Paska.

Ibas minggu si perpudi persikapen Paska, umat katolik bengket ku bas minggu si nigelari Minggu Sibadia sini ibenai ibas Minggu Bulung-bulung, Kamis Simbentar, Jumat Simbelin, Berngi Paska ras Wari Minggu Paska. Kamis Simbentar, Jumat Simbelin ras Berngi Paska enda me sini igelari Minggu Sibadia. Terdauhen kerna Minggu Sibadia e ituriken me i jenda.

1.    Minggu Bulung-bulung

Kesemalen ngerayaken Minggu Bulung-bulung ibas Gereja Katolik e me sada usihen kerna perdalanen kegeluhen Jesus ibas Minggu si perpudi sope denga Ia ipakuken ku kayu persilang, mate janah ikuburken, dingen keke mlihi ibas wari si peteluken.

Ibas perdalinenNa si perpudi, Jesus bengket ku kuta Jerusalem alu dem kinihagan bagi sekalak raja. Paksa si e adi sekalak raja raja si mbelin bengket ku bas sada kuta maka idatasina me sada kuda e me sada tanda maka kinirajan e lit ibas bahaya, janah rayakna pe mbiar dingen lanai meteh tumburen. Tapi adi sekalak raja bengket dingen lawes ku sada kuta alu kundul i datas sada keledai e me tandana raja e reh maba dame. Janah bage me Jesus bengket ku kuta Jerusalem bagi sekalak Raja Simbelin. Telu wari dekahna umat katolik ngerayaken rusia penebusen si mbelin alu kiniseran, kematen ras kekeken Jesus Kristus.

2.    Kamis Simbentar

Ibas wari Kamis Simbentar kerina kalak si erkiniteken nginget mulihi “Man-man si perpudi” sini bahan Jesus ras ajar-ajarNa. Ibas wari e me bena-bena Sakramen Ekaristi ipantekken selaku kurban Jesus. I je me Jesus ngendesken diriNa alu Kula ras DarehNa dingen kerina si lit ibas Ia guna keselamatenta. Lakon e pe ncidahken sada usihen si mehuli man banta e me kap alu murihi nahe ajar-ajar ras mereken sada pedah si mbaru segelah kita si keleng-kelengen.

Ibas Kamis Simbentar e ka nge Jesus mereken sada perentah kempak ajar-ajarNa segelah nginget dingen erbahan bage guna persingeten man banta kerna kai si nibahan Jesus. Kamis Simbentar pe sada wari “Rekonsiliasi” eme wari si alem-alemen salah ija Gereja ngalo-ngalo kalak si atena jera dingen erkadiola ras ersada mulihi ras Dibata bage pe umat si deban. Kerna dung si e ibahan me upacara ngarakken Sakramen Siserta Badia ras pe tuguren entah erjaga-jaga dingen ertoto i lebe-lebe Sakramen Siserta Badia e.

3.    Jumat Simbelin

Ibas wari si e, Kristus, Anak Biri-biri Dibata ikurbanken i kayu persilang. Ibas ibadat karaben eme kap pukul 15.00, ije me Jesus mate i kayu persilang e.

Ibas paksa si e me si inget mulihi kerna kiniseran, kematen Jesus alu nghamati silang janah paksa si e kita labo ngerayaken Ekaristi. Gereja erbahan puasa paska ibas wari Jumat janah adi banci min seh ku wari Sabtu Sibadia segelah kita banci ngerayaken keriahen kerna kekeken Tuhan.

Ibas Jumat Simbelin ibagi ibas 3 bagin e me: Ibadat Lakon Kata Sibadia, Penghamaten Silang ras Komuni, sada kesemalen ibas Gereja Katolik ope denga ibadat lakon kata si badia i gereja ibahan me Dalan Silang  entah alu drama bage pe alu ngendesken turi-turin kiniseran Jesus Kristus e me si ikataken “Passio” (Latin) si antusenna e me penggejapen si mbelin lebih-lebih kerna kekelengen.

4.    Berngi Paska (Vigili Paska)

Berngi Paska e me berngi si badia kerna kekeken Tuhan Jesus. Si jadi tampuk lakon

“TELU WARI SIBADIA”  (Tri Hari Paska).

Berngi Paska itandai alu “Vigili Paska” si antusenna e me kap “persikapen”. Ibas berngi e Gereja erjaga-jaga nimai kekeken Kristus ras sini rayaken ibas berngi si badia. Janah sada kesemalen ibas Gereja maka ibas berngi e ka nge ibahan peridin man katekumen. Kesemalen e ibahan erpalasken sada kinitken maka lau kematen Kristus, ikuburken janah keke mulihi bage ka me pe kalak si iperidiken mate erkiteken dosa, ikuburken (igedapken ku bas lau), keke mulihi guna nggeluh si mbaru jadi anak-anak Dibata.

Ibas ubungen si bagenda rupana me kerina kalak si erkiniteken iajuk guna mpelimbarui mulihi kerna padan peridinna. Ibas lakon Berngi Paska kai si ate Jesus sini pesehna arah perdalinen e e me kap: sipemena, maka Jesus e me sakalak Raja, sipeduaken, Jesus reh maba dame sejahtera kempak rayat Jerusalem.

Perdalanen Jesus i Bukit Zaitun nari ku lembah Kidron kin gia labo bagi ukur erkiteken labo bagi perdalanen sekalak si erkuasa jaman genduari enda erkiteken dalanna kitik, medalit ras si debanna. E maka gelah raja e ula guling ntah dabuh ibas perdalanen e, maka kalak Israel entahpe rayat kuta Jerusalem ngalo-ngalo Ia alu ngkimbangken uisna bage pe namaken ranting-ranting entah pe bulung-bulung segelah keledai sini datasina e ula sempat celus janah raja e pe selamat ibas perdalinen. Sanga Jesus erdalin nususr-nusuri dalan, kalak si nterem ngalo-ngalosa alu sora megang nina: “HOSANNA RAJA ANAK DAUD” si antusenna e me: Selamatken kami.

Engkai maka ranting-ranting palma ipake? Kerna si enda Johanes ngenca si nuratkensa ibas Berita Simeriah. Ija isuratkenna maka kalak e makeken ranting-ranting ibas palma nari. Janah adi sinehen ibas Injil si deban Matius, Markus isuratken kerna ranting-ranting saja ngenca bage pe ibas Injil Lukas tersurat kerna enterem jelma ngkimbangken uisna i dalan si nibentasi Jesus e.

    

Antusen Telu Wari Sibadia

Telu Wari Sibadia ibenai alu man-man si perpudi karaben ibas Kamis Simbentar seh ertampuk ibas Wari Raya Berngi Paska seh erkedungen ibas Ibadat Karaben Minggu Paska. Erkiteken si e maka Lakon Berngi Paska jadi sada berngi lakon kekeken kinitekenta selaku sekalak si erkiniteken. Mate erkiteken dosa, ras nggeluh si mbaru jadi Anak Dibata.

Liturgi Berngi Paska enda ibenai alu upacara cahaya (Berngi Sinalsal) si ertampuk kempak Kristus Sinalsal Doni. Kerina liturgi kidekah Telu Wari Sibadia sini ibenai ibas Liturgi Kamis Simbentar, Jumat Simbelin, ras Berngi Paska labo teridah selaku peristiwa si lepas sada ras si debanna tapi sada peristiwa rusia keselamaten. Erkiteken si e me maka Misa Perjamun Berngi Siperpudi Tuhan ibas ibas Wari Kamis Simbentar la idungi alu pasu-pasu pendungi sabab pasu-pasu pendungi e ilakoken ibas pendungi Misa Berngi Paska. (HS)