DEVOSI IBAS GEREJA KATOLIK

HENDRI SITEPU

Antusen Devosi

Kata “Devosi” rehna ibas cakap Latin “devotion” si antusenna erbakti, erkurban, erpengendesen, ersumpah ras si debanna. Bena-benana devosi ibas budaya Romawi ipake ibas kegeluhen si tep-tep wari e me arah mereken persembahan tah pe ngendesken diri tah pe barang-barang kempak “Dewa” alu pengarapen sura-surana isehken; ersumpah guna ngelakoken pendahinna dingen alu patuh ngelakokensa. Gendek ranan banci ikataken maka devosi eme pengendesen diri alu patuh guna nghamati sekalak jelma entah pe sekalak si niakap mehaga.
 
I tengah-tengah kesemalen umat Katolik, devosi e me kap penghamaten kempak sada rusia kiniteken ras penghamaten kempak sada kalak si badia. Penghamaten si bagenda rupana erbahan kalak Katolik nggejapken maka ubungenna pe ras Dibata enggo reh deherna janah alu bage, geluhna pe banci reh ulina. Dage alu bage banci ikataken maka devosi ibas Gereja Katolik ncidahken sada ubungen si mehuli si itujuken kempak:

* Diri Dibata Sitelu Sada jine janah;

* Maria si badia nande Dibata ras kalak si badia, e me kalak si enggo itetapken selaku kalak si tutus ngkahulken bana guna kegeluhen Gereja.

Sejarah Devosi

Adi si uri mulihi ibas Pustaka Sibadia, maka ije pe lit nge kepe piga-piga pendahin “devotional” si enggo ilakoken kalak Jahudi tah pe umat Gereja Sipemena. Umpamana: kesemalen “ziarah” ku Rumah Pertoton si ilakoken sekali sada tahun ope denga wari raya Paska. Kesemalen nuratken ayat-ayat Pustaka Sibadia ibas sada kertas janah itamaken i perdempaken tah pe i pergelangen tan, gelah alu bage igejapkenna  kerembaken dirina ras Dibata.
 Janah adi si uri pe sejarah devosi enda ibas Gereja Katolik, situhuna enggo lit ibas bena-bena lit kalak Kristen. Ibas “abad-abad“ si pemena kalak Kristen enggo turah penghamaten kempak martir-martir, janah reh mehumurna ibas “abad-abad” si peempatken amina gia erbatas kempak  ingan ija martir e ibunuh entah pe ikuburken. Kedungenna devosi e, itujuken kempak kalak pertapa tah pe rahib, la ketadingen pe devosi kempak malekat lebih-lebih malekat Mikael. Penghamaten kempak Maria Sisokeliamen enggo turah  mehumur lebih-lebih sanga Kaisar Nestorius erpenulak kerna Maria nande Dibata (Theotokos) si nitukarken jadi nande Kristus (Christokos). 

Dage seh paksa “abad” si peempatken devosi tuhu-tuhu turah mehumur i tengah-tengah umat bage pehumurken liturgi. Emaka Paus Gregorius mereken sada pengajaren si mehuli gelah min liturgi tuhu-tuhu ipebayak arah devosi-devosi janah ula ka min ertentangen ras liturgi e sabap liturgi e me tampuk tujun tep-tep lakon kiniteken Gereja ras pe ulu kerina gegeh kiniteken situhu-tuhu bagi si isuratken ibas “Sacrosanctum Consilium” (SC).

Devosi labo itujuken kempak sada barang tah pe benda

Ibas devosi mekatep sipake sada-sada barang tah e medali, relikwi, rosario, skapulin, monstran ras barang-barang si badia si deban. Bage gia perlu siinget maka labo kempak barang-barang e kita erdevosi tapi kempak Dibata jine tah pe kalak si badia si icidahkenn arah si e ibas kiniersadan ras Kristus. Sabap barang tah pe simbol-simbol e, erguna ngingetken  kita ras pe si makekensa gelah nggeluh badia ibas erbage-bage situasi seh ku kedungen geluhna guna ndatken kegeluhen si rasa lalap e.

Bage ka pe devosi arus min ipedauh ibas bahaya praktek-praktek si la payo (magis). Si enda banci jadi adi kita erpengakap maka gegeh kebadian ras keselamaten e rehna arah barang-barang, tah pe “jampi-jampi”  ras si debanna e nari. Situhuna e reh erkiteken keleng ate Dibata ras pe rikutken toto ras pengendesenta man Dibata. Janah devosi kempak kalak-kalak si badia labo maka kalak si badia e timbang kayo Kristus man banta tapi kalak e si nampati Kristus ibas pendahinNa ras Ia me kap si jadi kelang-kelang si tuhu-tuhuna man banta kempak Dibata. Erkiteken si e, ajaren rasmi Gereja Katolik ngatakensa man banta maka kalak si badia e me si jadi “objek” penghamaten (venetratio, dulia) labo banci jadi “objek” penyembahen (adoration, latria).

Kai-kai saja perlu iperdiateken ibas devosi

Devosi ula pernah min siakap selaku si nggantiken liturgi, sabap ibas Gereja lit piga-piga tingkaten. Ibas kerina liturgi si sah ibas Gereja, lakon Ekaristi Sibadia e me si meganjangna janah e me si pemenana tingkatenna, kerna si  e, maka lit sakramen-sakramen si debanna. Bage gia erdevosi banci ka nge iubungken ras liturgi umpamana: novena ibas lakon Ekaristi, Dalan Silang ras Ekaristi bage pe si debanna.
 

Devosi arus pe tetap sentudu ras kiniteken Gereja bagi tersurat ibas Pustaka Sibadia ras kesemalen-kesemalen Gereja. Kai si jadi kiniteken kalak si erdevosi tah ia “pribadi lepas pribadi”  bage pe perpulungen-perpulungen arus jadi kiniteken Gereja Sirulo (Universal). Erkiteken si e amina gia lit piga-piga (mbue) kejadin-kejadin (penampaken), Gereja arus metenget muat sada keputusen kerna si e.

Devosi pe perlu ka nge mperdiateken kerna kinidibatan ras pe kemanusian Jesus Kristus. I ja Jesus Kristus me kelang-kelang si tuhu-tuhu Dibata ras manusia alu nginget maka Jesus me si mereken pasu-pasuNa man banta guna banci ndatken keselamaten e.

Erbage-bage devosi

Umumna ibas Gereja Katolik devosi banci ipelainken jadi telu erbage:

1.    Devosi kempak Dibata (Adoration, Latria)

Arah praktek erdevosi si bagenda  rupana, kita ibabai gelah nggejapken maka kita enda manusia tinepa Dibata si dem alu kekurangen ras kelemahenta. Erkiteken si e kita ngendesken dirinta ras kerina si lit ibas kita kempak Dibata si mada. E maka Ia ngenca si patut si sembah, ipuji dingen ipemuliaken. Umpamana: Adorasi Sakramen Maha Kudus, Dalan Silang ras sidebanna.

2.    Devosi kempak kalak si badia ras malekat (Venetration, Dulia)

Kesemalen Gereja ubungenna ras penghamaten kempak kalak si badia si tuhuna enggo ndekah kal umurna, bage gia si enda tetap denga nge ipakeken janah ipeteguh arah Konsili Vatikan II lebih-lebih ibas peringeten “Perayan Suci Tahun Liturgi) (SC, 104, 1111). Kiniersadan kerina “Anggota Tubuh Mistik Kristus” e me kap Gereja (LG. 50,51). Ibas dokumen Gereja si dua enda ikataken maka Gereja erpengakap perlu kal guna nghamati kalak si badia si ibereken Dibata gegehNa janah kenca ndatken keselamaten si rasa lalap ia pe ngelakoken puji-pujin si tuhu-tuhu kempak Dibata ras pe jadi kelang-kelang man banta. Bage gia perlu si inget maka Jesus Kristus me si jadi kelang-kelangta kempak Dibata arah Kesah Sibadia. Umpamana: Litani-litani.

3.    Devosi kempak Maria, nande Jesus

Selaku “objek” devosi, nandenta Maria ipuji, ikelengi janah sipindoken penampatna guna nehken totonta kempak Dibata, enda si tuhuna menam bali ras si ilakoken kempak malekat ras kalak si badia.

Bage gia erkiteken kiniersadan Jesus ras Maria si jadi nande Jesus Kristus Anak Dibata, Maria ganjangen tegunna i surga bage pe i doni. Maka devosi kempak Maria arus ganjangen penghamatenna asangken kerina kalak sibadia si deban. Erkiteken si e, devosi kempak Maria mekatep ikataken alu “Devosi Hyperdulia”. Amin gia Maria ganjangen inganna ras pengelakona ibas rusia keselamaten manusia, ia ihamati labo bali ras penghamaten kempak Dibata. Janah penghamaten kempak Maria arus pe ipelain ras nembah kempak Dibata. Dage adi bage lit dua  ektrim arus ipedauh ibas erdevosi kempak Maria e me kap:

“Mariophobia” e me pengakap kerna Dibata ngenca si erdahin ibas keselamaten manusia, ija Dibata labo lit kerja sama ras manusia erkiteken si e labo sekalak pe manusia patut ihamati termasuk Maria sabap banci ngurangi kemulian si itujuken kempak Dibata.

“Mariocentricisme” si enda ngataken maka Dibata perlu Ia ncidahken diriNa kempak doni enda e me kap arah “Dibata enggo jadi jelma ibas Jesus Kristus” si enggo tubuh arah bertin Maria. Arah penghamaten kempak Maria antusenna, kita pe enggo nghamati Jesus e pe enggo bias.

Piga-piga devosi kempak Maria  umpana: Novena Telu Kali Sentabi Maria, toto Malekat Tuhan (Angelus), Pertoton Sentabi Maria, Pertoton Rosario ras si debanna. (HS).