MARI ERDEVOSI

PASTI PATRISIUS SITEPU

Sada kesemalen ibas Gereja Katolik nai nari seh asa gundari e me, adi kita iperidiken ibereken me gelar peridin. Gelar e ibuat arah gelar kalak si badia, entah pe igelari santo ras santa. 

Enda ilakoken erkiteken Gereja Katolik tek, kalak si badia e me si ngkawali kiniteken ras geluh kalak si erkiniteken, ras kite kite guna reh deherna ras Jesus Kristus. “Sabab seri ras persadan kalak kristen, sangana ibas perdalinen naruhken kita gelah reh rembakna ras Kristus, bage me kita muat bagin ras kalak si badia, si nghubungken kita ras Kristus, si desken sumbul ras ulu si pepalir kerina pemere ras kegeluhen Umat Dibata jine” (LG 50). 

Erkiteken si e teridah me maka kalak si badia nuduhken persadan kalak kristen si enteguh itengah tengah kalak Katolik, si nggeluh denga idoni enda ras kalak si enggo bengket ku bas kemulian surga. Kalak si badia tuhu-tuhu jadi penampat man banta, lako nandai Jesus Kristus terdeheren ras mbages. 

Gua Maria Sapo Malem, Jaranguda

Ibas ras arah geluhna erburak me erbage-bage, ketuhu-tuhun kegeluhen, ketuhu-tuhun kekristenen, perjuangen kiniteken, si banci jadi usihen ras ipeturah kalak si ernikiteken. Gelar peridin ibas kalak Katolik selaku pelindungna, min iarapken si makesa ngeteh turi-turin kegeluhenna. Subuk si rubungen ras perjuangen kinitekenna, entah pe ketuhu-tuhun kegeluhen, bage pe kekristenenna, si erpenujun ku kerembaken ras Kristus. Alu kata si deban labo erkiteken kesemalen saja, entah gelah reh jilena gelarna, tapi si pentingna e me, alu ngeteh turi-turin kegeluhenna, terjadi min ubungen pribadi si make gelar e ras kalak si badia si jadi pelindungna. Gelah min kalak Katolik si enggo iperidiken nggeluhken geluh kinitekenna sue ras kalak si badia e.

Ibas prefasi kalak si badia ikataken: “Sabap kesaksin kalak si badiaNdu, mereken gegeh si mbaru man Gereja ras peteguhken kami kerna kekelengenNdu. Erkiteken usihen si mehuli si ilakokenna, kami iajuk menbah man banNdu ras erkiteken totona, kami pe ijemba, gelah ikut muat bagin ibas pendahin pengkeliniNdu” (TPE 2005, hal. 91).

Guna nghamati kalak si badia e ilakoken alu ngerayaken pesta ras peringeten kalak si badia, enta e sekalak-sekalak, bage pe alu ras-ras. Sue ras tanggal ras wari si enggo itetapken ibas penanggalen liturgi. Penghamaten nandangi kalak si badia e ilakoken alu ngerayaken pesta ras peringeten si enggo itetapken ibas penaggalen liturgi.

Wari Raya kerina kalak si badia irayaken tep tep tanggal 1 November. Alu bage, arah penghamaten si terjadi ibas lakon liturgi e, umat Katoluk iajuk maka min reh sedarna selaku kalak si erkiniteken, ras iarapken ngasup nggeluh sue ras usihen geluh ras kiniteken kalak si badia.

Adi sigermeti paksa si gundari enda kalak si nguda (OMK) sangana ibas “krisis panuten”. Lanai lit “idola” si banci jadi usihen. E maka, petandaken kalak si badia, si enggo ipilih tah ibereken man bana sanga ia iperidiken, banci jadi nampati ia ndatken “idola” si mbaru. Sabap labo bagi jelma si sendah merandal, pagi enggo murde, sendah terteki pagi nebu-nebu. Kalak si sendah jadi “idola” na pagi eggo mehado. La sue cakap ras perbahanen. Banci jadi e pejabat negara, bintang pilem, politikus, pengurus gereja ras si debanna. Kalak si nguda kebenen si man usihen. Labo bagi santo ras santa, si ngasup mpertahanken kiniulin-kiniulin nggeluh sura-sura si mehuli ras pang mate mpertahanken kinitekenna.

Sue ras turi-turin geluh kalak si badia e, adi tuhu-tuhu ieteh kalak si nguda, iarapken e me si jadi usihen, jadi “idola”, si banci iteki, si nampati, si ngkawali, si labo nghakimi ras si tetap setia. 

Erdandanken si e, perlu kal ipegeluh ras ipeteguhi kegeluhen devosi nandangi si nguda denga. Uga carana? Alu erbahan torosen aturen devosi guna sekalak-sekalak, ntah pe guna ras-ras. Seh ulina ka pe adi lit ensiklopedia kalak sibadia. Jadi torosen aturen e banci ipake ibas perpulungen OMK i stasi ras lingkungen, gelah lit variasi ibas perpulungenna maka la medu. Siidah gundari, perpulungen OMK iaturken bagi perpulungen kalak dewasa, si kurang sue ras paksa kengudanna. Tambah si e pe alu erdevosi, janah erpenggurun nandangi kalak si badia e, iarapken turah semangat si mbaru ibas erlajar, erteman, ergereja, ermasyarakat, janah dungna banci jadi usihen man kalak si deban. (pps)